Luke 13 - New Testament-et Akuzipigestun

Avuteghqellusi Seghleghqennanightek

¹ Tamaani pilleghni ilangi yuget tamaanteftut, ungipaatkaat Jesus Pilate‑mun tuqutesimaniluki ilangi Galilee‑eghmiit aghqerraaghumaluki Kiyaghneghmun. Aawitlu akumutesimaniluki aawitnun teghikusat.

² Jesus‑em aaptekii, “Sumeghpesinii taakut Galilee‑ghmiit seghleghqengngaaghataghaghpetaat ilangitneng Galilee‑ghmiineng qayughllak tawaten tuqutkaalghiit?

³ Ungipaatamsi, nakaa! Avuteghqellusi seghleghqennaniimakufsi taawa qamagllusi elpesillu tuqullequsi ellngistun.

⁴ Neqamikenghistekii Siloam‑emi qula pingayuneng inglulek yuget tower‑em ulleghvikluki tuququqii? Sumeghpesinii taakut seghleghqengngaaghataghaghtaat Jerusalem‑emi kiyaghlleghhiineng?

⁵ Ungipaatamsi, nakaa! Avuteghqellusi seghleghqennaniimakufsi taawa qamagllusi elpesillu tuqullequsi ellngistun.”

Jesus‑em Ungipaghaatkegkanga Figs‑em Uqfiga Piitestinghilnguq

⁶ Taagken Jesus‑em ungipaghaatkii, “Yugem piitesighaghtestekaa figs‑em uqfiga grapes‑mun piitesighaghvigmini. Esghaghyaghtughaqegkanga piitestimanayukan, iwernga avangitaqelghii.

⁷ Enkaam piitesighaghteni pikaa, ‘Ii‑i, pingayuni ayumiqulleghni esghaghyaghtughaqsaghaqa uqfik piitestimanayukan iwernga avangitaquq. Kepigu! Piitfigillghaannaquq.’

⁸ Iwernga piitesighaghtem pikaa, ‘Yuguniiq, wiin whani ayumiqulleghmi avelghaghhu. Uvitanga laagnaqaqa, enkaam katagughvikelleqaqa piinnaasimeng.

⁹ Ayumiqun piitquumakumi pinighllequq, enan piitestinghilkan, kepesnaken.’”

Sabbath‑mi Jesus‑em Naallghuskanga Aghnaq

¹⁰ Taagken ataasimi Sabbath‑em aghneghani, synagogue‑mi Jesus apeghtughikaq.

¹¹ Tawanteftughnguq aghnaq qula pingayuneng inglulek ayumiqulleghni tughneghaam kayaaleghqegkaa. Pakegngastekaa enkaam taklaghruketun nekevigalnguq.

¹² Jesus‑em esghaghyamigu tagsighluku pikaa, “Aghnaq, itemutamken kayaaleghqengngalleghpeneng.”

¹³ Taagken saaftekaa, enkaam taklaghrukguutnginaamaghmi pikaq, usuqikaqlu Kiyaghneghmeng.

¹⁴ Synagogue‑em igleghutistengan ugumiyagutkaa Jesus qayughllak naallghutilghii Sabbath‑mi. Enkaam pikii yuget, “Aghvinleguut aghneghet qepghaghvigkaput, enkaam tagiiqitek taakuni aghneghni naallghutesqellusi, nakaan Sabbath‑mi!”

¹⁵ Atanghem pikaa, “Uyuq piniiyugneq! Sabbath‑mi, tamaghaghpesi ox‑esi nalighmeng donkey‑si itemulluki meghesaghtughaqasi.

¹⁶ Una aghnaq kingunqaa Abraham‑em, Tughneghaam asighqegkaqaa qula pingayuneng inglulegni ayumiqulleghni. Ipapestaaq anaggutellghunghituq itemutelleghqaa Sabbath‑mi!”

¹⁷ Jesus‑em tawaten piyisteng, qamaglluteng anguyagi kaynguyugutkat. Enkaam qamaglluteng yuget quyateghllakat pinighrakegtaneng apeghiiqaaneng.

Jesus‑em Ungipaghaatkegkanga Mustard‑em Piitutanga

¹⁸ Taagken Jesus‑em aaptekii, “Nateta Kiyaghneghem Ataneghpagullgha? Samun inglunnaqsikun?

¹⁹ Mustard‑em piitutangatun ayuquq, yugem tuguluku piitesighaqanga piitesighaghvigmikun. Naguyalghiimi uqfigughtekaq, enkaam avayaakun qawaaget unglusikat.”

Jesus‑em Ungipaghaatkegkanga Yeast‑a

²⁰ Allameng Jesus‑em aaptekii, “Samun inglunnaqsikun Ataneghpagullgha Kiyaghneghem?

²¹ Yeast‑atun ayuquq aghnam akuututaqegkanga avlawaghllagmun, enkaam akuutaghllak ghhuughtesteghllakaa.”

Kagpestaaghhaq Amik

²² Jesus aglaatkelluku Jerusalem‑emun, apeghtughimaghmi pikaq nenillu, nengiighhaghnillu.

²³ Kitum aaptekaa, “Ataneq, palasqughhaawaat yuget yuguliyaghqat?” Jesus‑em kiimsiqii,

²⁴ “Sagiqlusi iteghnaqutkitek kagpestaaghhaghqun amigkun. Ungipaatamsi, uglaapiglleghiit yuget iteghnaqutkellequt, taawanginaq iteghpagningitut.

²⁵ Mangtegham yugan makelluni amik umegyaghtughlleqaa. Enkaam tesqakmani nekevghallequsi, tenglugtughllequsillu whaten pimaghpesi, ‘Ataneq, qelpeghutaghtikut!’ Kiimsighlleqiisi, ‘Nallukamsi, nallukaqallu naken pingutsi.’

²⁶ Taagken pilleqaghsi, ‘Neghelghusighaqamkenllu, meghelghusighaqamkenllu, apeghtughikaagutenllu tumemnni.’

²⁷ Iwernga pilaataghlleqiisi, ‘Ungipaatamsi, nallukamsi, nallukaqallu naken pingutsi. Iqillaghaatek whangamneng elpesi seghletun pisteni!’

²⁸ Taagken qiyaaghwaghllagllequsi, ggutesillu terqitaagtaamiita. Tawaten pillequsi esghaqufsiki Abraham‑enkut Isaac‑enkut Jacob‑enkut, qamagllukillu uuknaliqistet. Ellngit Ataneghpagullghanillequt Kiyaghneghem, iwernga elpesi eslatmun miluulleqiisi!

²⁹ Enkaam yuget tagillequt asivaghmeng, pakfallameng, aywaaneng, ikevaghmeng. Taagken aqumellequt tipelegni Ataneghpagullghani Kiyaghneghem.

³⁰ Nagataghtekqun, tamaakut ukaliit megnunaghsaghqaagut, enkaam megnunalghiit ukaliighsaghqaagut.”

Jesus‑em Piniqillgha Jerusalem‑emun

³¹ Tawani pilleghmi ilangita Pharisees‑et takuluku Jesus pikaat, “Maaken iqilluten natmun aghulaqi qayughllak Herod‑em tuqutestesugaqaaten.”

³² Jesus‑em pikii, “Ungipaasaghtughteggu taana kaviiq, ‘Nagaten, aghneghmi aanesquugunga tughneghaghneng, naallghuquugungallu qinuyulghiineng. Unaamillu tawateghpigaq pillequnga. Taagken pingayaani aghneghem qepghaqaqa apeghiighlleqaqa.’

³³ Naqamllu igleghsaghqapestaaghuunga aghneghmi, unaami, awakaghaanillu, qayughllak itagnanghituq uuknaliqista tuqusaghqaaluni nani alngunak iwerngaqun Jerusalem‑emi.

³⁴ “Kaay Jerusalem, Jerusalem! Tuququqaqaten uuknaliqistet, milughpagaataghlukillu tuququqaqaten Kiyaghneghem kayagtekii elpenun. Uglaapiglluku qerngughsugaqsaghanka yugten whangamnun, katam tawaten qawaagem yaqugmi asinganun qerngughtellghatun amaaghani. Iwernga tawaten pistesimangitaghpenga!

³⁵ Nagaten, mangteghan paaghqiilleqaa qayughllak Kiyaghneghem uninnaqaatenllu paqniighsaghnanighnaqaatenllu. Ungipaatamken, esghaghnaanghitaghpenga kenlanga whaten pilleghqaghpenun, ‘Kiyaghneghem quyasligu tagilghii aatghakun Atanghem!’”