Luke 12 - New Testament-et Akuzipigestun

Kelengasaalleq Piniiyugtelleghmeng

¹ Tawaten pimaluki thousand‑nelghutet yuget qerngughutkat, repall ilateng tuutqaghtaqluki pikiit. Jesus‑em sivukluki maligsaaghteni pikii, “Kelengalusi Pharisees‑et yeast‑angitneng. Piniiyugtellghat piiqaqa.

² Sangwaa saapegkaq saaputiighyaghqaaguq. Qamaglluni aksaqegkaq qayvighqesaghqaaguq.

³ Sameng pillesi aksaqluku nagaqughyaghqaqiit qagani. Sangwaatlu sigutquutkegkasi uumgullusi nemi ungipaqsaghqaagut tamangani.

Aliksaghqaqaghsi Kiyaghneq

⁴ “Ungipaatamsi ilakumtaamni, alikegpenaki tamaakut tuqutikayuget yugusimeng, iwernga taam kingunganeng alla sanaanghitiisi.

⁵ Iwernga kelengasaaghnaqamsi kitumeng aliksaghqameng. Alikiteggu Kiyaghneq, tuquskumisi aghtughyaghqaanghillelguuq miluusaghqaalusi hell‑mun. Aa‑a, ungipaatamsi alikiteggu!

⁶ “Tallimat qateghyiighaghhaat akikegkayugunghitaat maalghugegnun penny‑gnun? Tawalliima nalighhiiniit Kiyaghneghem puygunaanghitii.

⁷ Talwa nuyaghpesi uglaghtalangi Kiyaghneghem liisimakii. Alingegpenasi, Kiyaghneghem megnukataghaghiisi qateghyiighalghutneng pakiggullusi.

Tuguklighilleq Nalighmeng Ighsakilleq Christ‑ameng

⁸ “Enkaam ungipaatamsi, kitum alngunak ungipaaskaki sivungitni yuget whangamnun pikniluteng, Ighneghanllu Yugem piknilleqii sivungitni Kiyaghneghem yaqulelghutangan.

⁹ Iwernga kitum alngunak ungipaaskaki sivungitni yuget whangamnun pikenghinniluteng, Ighneghan Yugem pikenghinnilleqii sivungitni Kiyaghneghem yaqulelghutangan.

¹⁰ “Kitum alngunak seghletun akuzitkegkumigu Ighnegha Yugem, Kiyaghneghem seghevusaghqaqaa. Iwernga kitum alngunak seghletun akuzitkegkumikek Agleghnalghiik Taghneghak, Kiyaghneghem seghevunnaanghitaa.

¹¹ “Aglaaskangisi synagogue‑nnun, sivungitnun governor‑et, nalighmeng igleghutistet teggellghiighpenasi naten kiimsilleghqaghpesineng, nalighmeng sameng pilleghqaghpesineng.

¹² Tawani pilleghmi Agleghnalghiim Taghnegham akuzitkaghqalilleqiisi sameng pilleghqameng.”

Jesus‑em Ungipaghaatkegkanga Nalluuqaq Aklungilnguq Yuuk

¹³ Yulghuteghllaget akulngitneng yugem Jesus pikaa, “Apeghtughista, anglegutka ungipaataghtigu, atamtunguq unitkaaneng saghyameng nengitaghllinga.”

¹⁴ Iwernga Jesus‑em aaptekaa, “Yugmi whani, kitum nanqigtistengllaghtanga, nalighmeng nengighqistengllaghtanga elpetegnun?”

¹⁵ Taagken qamaglluki pikii, “Kelengalusi allaaghiinaghmeng pakigniightelleghmeng, qayughllak yugem unguvalleghpigaa saghyiightelleghqun ayuqenghituq.”

¹⁶ Taagken Jesus‑em ungipaghaatkii, “Yuuk aklungilnguq nunalguftuq piitestighllakayugmeng.

¹⁷ Sumeghtaghaqaq, ‘Naten sanaqsinga? Piitesteghllakamnun kagpagvigitunga.’

¹⁸ Ellmineng kiimsiqaq, Whaten pinaqunga. Kagpagvigenka ifkaghqughluki, aangataghalghiineng kagpagvigkaneng nekefqughnaqunga. Enkaam qamaglluki grain‑enka, saghyankallu kagpaglleqanka.

¹⁹ Taagken pillequnga unguvasimnun, ‘Unguvasimni, kagpagighllagtunga ayumiqullelghutnun! Taawa sananighnaqunga, neghaqlunga, meghaqlunga, pinighyuuggnaqunga!’

²⁰ Iwernga Kiyaghneghem pikaa, ‘Uyuq nalluuqaq! Unukun unguvasin tuqunaqnguuq. Kagpagllakaghten tamaakut kitum piknaqaki?’”

²¹ Jesus‑em taaqniqii, “Taatun yugtun ayuqut tamaakut sameng tamaghhaaneng kagpagilghiit ellmeggnun katam, iwernga Kiyaghneghmi aklumalghiinguut.”

Neghyukilleq Kiyaghneghqun

²² Taagken Jesus‑em maligsaaghteni pikii, “Tamaaken apalluqluku ungipaatamsi, nulqaviighutkegpenaan unguvalleghsi, sameng neghelleghqaghsi, nalighmeng sameng aatelleghqaghsi.

²³ Unguvalleq megnunaghataghaghtuq neqneng, yugusiqlu megnunaghataghaghtuq aatkaneng.

²⁴ Esghaqaghtekiqun meteghlluget, piitesighiigatut, nalighmeng unatiigatut, nalighmeng kagpagingigatut, naqamllu Kiyaghneghem neghqaqii. Elpesi megnunaghataghaghtusi qawaagneng!

²⁵ Enkaam nalighpesi nulqaviighutkelluku unguvalleni taakughteregaghlleqaguu?

²⁶ Nulqaviighem uyguvleghaghnaanghitutanganeng unguvalleq, sanganꞌngam sangwaat alngunak nulqaviighutkaqesteki?

²⁷ Esghaqaghtekiqun piitesighaat nagulghiit, qepghiigatut nalighmeng aatkanglliigatut ellmeggneng. Iwernga ungipaatamsi, talwa Solomon, aklungiteghllagmini aasimangituq piitesighaghestun pinightutkalghiimeng.

²⁸ Kiyaghneghem aasightughaqii vegaaghet piitfigmeggnilnguut aghneghmi tawani, iwernga unaamingani qiitaqiit. Kiyaghneghem aasightuungukaki vegaaghet, elpesi aasightughataghaghnaanghitisii? Ugpeqilleghqestaapiguusi!

²⁹ Sumeghtaghaamanginaghpenasi sameng neghelleghqaghpesinengllu meghelleghqaghpesinengllu. Nulqaviighutkegpenaki tamaakut,

³⁰ qayughllak ugpeqingigalnguut Kiyaghneghmeng nulqaviighutkaqiit tamaakut. Atagpesi liisimakii aklukegkasi.

³¹ Tamaaken apalluqluku kiyaghtelleghpesini megnunalleghpigaaghtestekek Kiyaghneghem Ataneghpagullghallu piyukellghallu. Tawaten pikufsi Kiyaghneghem tuunelleqii qamaglluki aklukegkasi.

Qilagmelnguut Aklungit

³² “Alingegpenasi penniighhamni, qayughllak Atagpesi quyakusiqluku tuunyugaqaa elpesinun Ataneghpagulleq.

³³ Saghyasi akikluki maniliteki aklumalghiit. Enkaam elpesi kagpagillequsi aklungigpesineng qilagmi. Tawaten pikufsi qilagmi aqeftaghaalgullequsi naavyaghqaanghilngughmeng. Tawani aklungisi naangyaghqaanghilnguut, teglegniightetlu tugunaanghitiit, moth‑etlu naafqennaanghitiit.

³⁴ Aklungisi naantekata sumeghtaghallesillu tawanllequt.

Jesus‑em Apeghiighsiisqegkangi Tagilleghqaminun

³⁵ “Samun tamaghhaanun yataghqengngwaaghlusi, aatkasi aasaqleggiinaaghluki, kenelghutasi kumaghtengngwaaghluki.

³⁶ Tawaten pikufsi qepghaghtestun ayuqellequsi utaqiilghiit umiilegmeggneng uteghnilleghqaaneng nengughutellghem neqenghaghqellghaneng. Enkaam kaalluni tenglugtuqan qelpeghutqaghlleqaat.

³⁷ Quyanapigtut qepghaghtet teghhumaghmeng apeghiighwaaghluteng ayuqelghiit umiilgita kaaskumiki! Ipa ungipaatamsi, umiilgem qepghaghteni aqumuutesluki tipelegnekun, taagken kenigni tafsiillukek kepsiiqulleqii neqmeng.

³⁸ Tagiiqlillu unugem qukaghtestegpenaan nalighmeng unugem qukaan kingunganeng. Iwernga qakun alngunak tagikumi tamaakut qepghaghtet apeghiighwaaqat quyastellelguyaghqaagut.

³⁹ Iwernga liisimakluku una, mangteghalgem liisimaksaqumigu qakun teglegniightem tagilleghqaa, uninnaanghitaa mangteghani tegleghniighta naafqulluni iteghnayukan.

⁴⁰ Elpesillu apeghiighsaghwaaghlusi pitek qayughllak Ighnegha Yugem tagiyaghqaaguq waakenghillghaghulluni.”

Ataasiighmelnguqlu Ataasiighmenneghilnguqlu Qepghaghta

⁴¹ Peter‑em aaptekaa, “Ataneq, ungipaghaan aapqan, whangkunnun pingwaa, nalighmeng tamaghhaanun?”

⁴² Atanghem kiimsiqaa whaten, “Kinangaawa ataasiighmelnguq, peghqinelghii qepghaghta? Taananguyaghqaaguq umiilgan igleghutistengllaqaa qepghaghteminun, neqelitaatiisqellukillu aghhutanga tamaghhaan.

⁴³ Taana qepghaghta quyastellengyaghqaaguq, umiilgem kaalluni esghaqumigu qelelleghmitun pilghii.

⁴⁴ Ipa ungipaatamsi, taana qepghaghta umiilgan igleghutistengllaghyaghqaqaa saminun tamaghhaanun.

⁴⁵ Iwernga taana qepghaghta sumeghtaghaamakumi whaten, ‘Umiilka muluuq tagigpenani’, enkaam qevutqughyagulleqii qepghaghtet yugetlu aghnatlu. Neghaqluni, meghaqluni, suumaqlunillu pillequq.

⁴⁶ Taagken umiilga kaallequq nallutghaaghulluni, sighimakenghilkangani aghneghem. Enkaam umiilgem aghyuughmigtaaghllaglleqaa, ilatesleqaallu ataasiighneghilngughnun.

⁴⁷ Qepghaghta apeghiighsallghilnguq nalighmeng umiilegmi piyukellghatun piyunghilnguq anagulellengeghllagllequq.

⁴⁸ Iwernga qepghaghtem nallukegkumigu sasqesullgha umiilegmi, anaggutkaayaghngaaghmi aghsaan ayuqluku anagulellengellequq. Yuuk tuunellengeghllakaq sameng, sayaghqaghtullequq; yuuk wata tuunellengeghllakaq sameng, wataqaaghaq sayaghqaghtughllagllequq.

Jesus Aafqemeraaghutestilghii

⁴⁹ “Tagikaagunga keneghmeng milughnaluku nuna, whaatuq maaten kumalghii!

⁵⁰ Iwernga taam sivungani paaptaayeyaghqaagunga ikfiqelleghqunllu tuqulleghqunllu. Enkaam seghleliighllaguunga kenlanga paaptaayelqa apeghiillghanun.

⁵¹ Sumeghpesini taginnilunga nekeggmelleghmeng pistengngaa nunamun? Yeghlegillu, ungipaatamsi, aafquutestiyaghtuugunga.

⁵² Whaken kenlekluku nengllugutkullghiit tallimat aafquullequt apalluqlunga whanga. Pingayut kipullginaaghlleqagket maalghuk, enkaam maalghuk kipullginaaghlleqiik pingayut.

⁵³ Ellngit aafqemeraaghullequt; atam kipullginaaghlleqaa ighneni, enkaam ighneghem kipullginaaghlleqaa atani. Naam kipullginaaghlleqaa panini, enkaam panigan kipullginaaghlleqaa naani. Aghnam kipullginaaghlleqaa ukaani, enkaam ukaaghan kipullginaaglleqaa aghnaq sakini.”

Jesus‑em Kelengasaaqangi Nagatesteni

⁵⁴ Taagken Jesus‑em yulghuteghllaget pikii, “Esghaqufsigu qilagwaaq mayulghii pakfallamelluku, tawaninginaq pillequsi, ‘Eslallugughnaqaa’ pinaqnilleghpesistun pillequq.

⁵⁵ Anuqa ikevaaghtekan, pillequsi, ‘Puqlaghqwaanaqaa’ pinaqnilleghpesistun pillequq.

⁵⁶ Liisimakisighwaalghiini elpesi! Nunamllu qilagamllu nekegnegha esghaneghpesigu, eslam natetulanga liisimakaqaghsi. Sanganꞌngam liisimaksunghisteki maaten sangwaat sallghet sameng pisiitangi?

Jesus‑em Apeghtuusaqegkanga Qaniqutellghem Nallghusallgha

⁵⁷ “Sangan liigikigasteggu elpesineng katam sangwaa pinitun pillghutanga?

⁵⁸ Avutkistegpek nanqigtivigmun aglaasimaluten, tumemi taakwani kaatfagilgaftek nallghusaghnaken qaniqutelleghtek. Pinghilkuvek ighsagpegun aglaalleqaaten nanqigtistemun. Enkaam nanqigtistem tuunelleqaaten umiilwaaghmun anusiminglliisqelluten.

⁵⁹ Ungipaatamken, aanaanghituten kenlanga kingulighpigaq manin llivikuusaqelleghpenun.”