Luke 11 - New Testament-et Akuzipigestun

Jesus Apeghtughilghii Yughalleghmeng

¹ Ataasimi pilleghmi nani Jesus yughaamalghii, taaqaquqlu yughaneghmeng, ataasim maligsaaghtengan pikaa, “Ataneq, apeghtuqaghqut yughalleghmeng, katam John‑em apeghtullghatun yughalleghmeng maligsaaghteni.”

² Jesus‑em pikii, “Whaten yughaghaqitek, ‘Ataay, agleghnalghii aatghen quulvallengli, yughaghtukut Ataneghpagullghen tagisqelluku.

³ Aghhutanga tamaghhaan neghyaghqaliteqeghtikut.

⁴ Seghevutaghtiki seghleghqelleput qayughllak seghevutaqaput qamaglluki seghletun pisteput. Nanghiiqullengestegpenaamtallu.’”

⁵ Taagken Jesus‑em pikii, “Ilakumtaalguyaquvek unugem qukaani mangteghaanun piluten, tungsighyaquvek, ‘Ilakumtaamni, pingayuneng neqekrangllaghhiisiin?

⁶ Ilakumtaaqa igleghalghii kaatuq, ellnganun neghyaghqaqraggiitunga.’

⁷ Qamaken ilakumtaaghpek kiimsighyaqumiten, ‘Qinuyugtegpenanga. Amik maghqatngaaq, taghnughaqullghiini ingaghquusimaakut. Maketepagningitunga tuunyaghqaaluten sameng alngunak.’

⁸ Ungipaatamsi, qaywa ilakumtaaqeghngaaghmiten makennaanghituq tuunyaghqaaluten sameng. Iwernga makellequq tuunaluten aklukegkaghpeneng qayughllak sagiqeghllagulghiiten.

⁹ Enkaam whanga ungipaatamsi, aaptek, allgeghullequsi; ivaghitek, naalkullequsi; tenglugtughtek amigkun, qelpeghulleqiisi.

¹⁰ Qayughllak kina alngunak aapleghhii, allgeghusaghqaaguq; kina alngunak ivaghilghii, naalkusaghqaaguq, kina alngunak tenglugtulghii amigkun, qelpeghulleqaa.

¹¹ Nalighpesi atani, ighneghpek iqallugniighviksaqangaten, yeghlegi tuunayaghsiguu nemeghyameng?

¹² Nalighmeng ighneghpek manigniighviksaqangaten, tuunayaghsiguu scorpion‑meng?

¹³ Seghleghqestengughngaaghpesi, liisimakusi pinilghiimeng tuunilleghmeng avaqutaghpesinun. Ata qilagmelnguq tuuniighataghaghyugluni ayuquq Agleghnalghiigneng Taghneghneng tamaakunun aapleghhiinun!”

Jesus‑enkuk Beelzebul‑enkuk

¹⁴ Ataasimi aghneghmi Jesus‑em aanestekaa tughneghaq yugmeng. Tughneghaam yuuk akuzisigalkanga. Tughneghaq aanyan, yuuk akuziyagutkaq enkaam qamaglluteng yuget tawanlenguut saghiighayagutkaat.

¹⁵ Iwernga ilangita yuget pikaat, “Aanestiiquq tughneghaghneng aghtughyaghqaanghillghakun Beelzebul‑em, tughneghaat igleghutistengitgun.”

¹⁶ Ilangita yuget anagniilqavigighnaluku Jesus, allaaghlluwhaghtisqegkaat kelguvikesqelluteng Kiyaghneghmun kayagtekaqutanga.

¹⁷ Iwernga Jesus‑em liisimakegkangi sumeghtaghallghit enkaam pikii, “Alngunak ataneghpagulleq aafquulluni pilluguskumi, naavellequq. Nengllugutet aafquulluteng pilluguskumeng, qerngaghmennaanghitut.

¹⁸ Enkaam Tughneghaam ataneghpagullghanilnguut aafquulluteng pilluguskumeng, Tughneghaam ataneghpagullgha kenletghuullequq. Elpesi aanesqughniiqaghpesinga tughneghaghneng aghtughyaghqaanghillghakun Beelzebul‑em, iwernga anaggutusi.

¹⁹ Aanesquungukuma tughneghaghneng Beelzebul‑kun, natenmi ilagpesi aanesqughaqatki tughneghaat? Enkaam ilagpesi nanqiglleqiisi anaggunnilusi.

²⁰ Iwernga Kiyaghneghem aghtughyaghqaanghillghakun aanesquungukuma tughneghaghneng, taawa taam ipapighqaa Ataneghpagullgha Kiyaghneghem kaasimaaq elpesinun.”

²¹ Iknaqelghiim yugem guututetuqam kelengakegkumigu mangteghani, qamaglluteng saghyangi paqniisaghqaagut.

²² Iwernga iknaqataghalghiim yugem sughukumigu kayaalqelleqaa. Enkaam tugulaghlleqii neghyukumtaaghi guututangi, uyeglleqiillu saghyangi.

²³ “Kina alngunak whangamninneghilnguq kipullginaaghtekaqa; kitum alngunak qerngughtilgusinghilkuminga mingitistenguuq.

Uteghnillgha Tughneghaam

²⁴ “Tughneghaq yugmeng aanegkumi, igleghllequq meqraggiilngughmi nunami, ivaghillequq meghnaalivigkameng. Naalkunneghisami pikaq, ‘Kiyaghfiksaqemnun uteghhnaqunga.’

²⁵ Kaasalghiimi, aallwhaaghluni, mingllegtengngwaaghluni ayuqeftuq.

²⁶ Taagken aanluni tagitkii maaghraghvinlek tughneghaat ellmineng seghleghataghalghiit. Iteghaalluteng yugmun tawantekat. Enkaam taana yuuk sivunghaneng wataqaaghaq seghleghwaaghughtekaq.”

Quyallepiik

²⁷ Tawaten Jesus piyan, yulghuteghllaget akulngitneng aghnam iglagtupiglluni pikaa, “Quyastekaaguq aghnaq ighniluten mamaghtikaq elpeneng!”

²⁸ Iwernga Jesus‑em pikaa, “Itupill, quyastaghaqaagut tamaakut Kiyaghneghem akuzitangi nagalluki qaatkegkangit!”

Yuget Esghaasulghiit Allaaghlluwhaghtilleghmeng

²⁹ Yulghutet nulanginaghyata Jesus‑em pikii, “Aghneghem uum yugi seghleghqumanguut. Naqam allaaghlluwhaghtitesqut whangamnun. Yeghlegillu! Taananginaghhaq allaaghlluwhaghtilleq esghaghlleqaghsi Kiyaghneghem allaaghlluwhaaghtillgha Jonah‑mun.

³⁰ Katam tawaten Kiyaghneghem atuqellghatun allaaghlluwhaghtilleq Jonah‑mun kelengasaaghnaluki Nineveh‑ghmiit, tawaten Kiyaghneghem atuqsaghqaqaa allaaghlluwhaghtilleq Ighneghanun Yugem kelengasaaghnaluki aghneghem maaten yugi.

³¹ Nanqigtillghem Aghneghani Kiyaghneghem nanqigtekangisi elpesi kiyaghlleghhiini aghneghmi whani, Queen‑ngan Sheba‑m nekevluni anaggutnganilleqiisi aghyuughyaghqapestaaghunilusi. Tagikaaguq uyavaghpanlengughmeng nemineng nagannaluku Solomon‑em peghqinellgha. Iwernga kina aangataghalghii Solomon‑meng whaantuq, tawalliima ighsakaqaghsi.

³² Nanqigtillghem Aghneghani, Kiyaghneghem nanqigtekangisi elpesi kiyaghlleghhiini aghneghmi whani, Nineveh‑ghmiit nekevluteng anaggunnilleqiisi aghyuughyaghqapestaaghunilusi. Uuknaliqista Jonah ungipaghyan, Nineveh‑ghmiit avuteghqelluteng seghleghqennaniqaagut. Iwernga elpesi avuteghqellusi seghleghqennaniimangitusi, qaywa nagatkaqeghngaaghpesigu kina aangataghalghii Jonah‑meng!”

Nighuga Yugusim

³³ “Kitum alngunak kenelghutak kumaghllukek iighnaanghitaak nalighmeng sagneghmun asingiinnaanghitaak. Itupill llilleqaak quulvaqun itelghiinun esghiisqelluku nighuk.

³⁴ Iyegken kenelghutastun ayuquk yugusighpenun. Iiskegtekuvek iingunaghmi yugusin nighugllagullequq, iwernga iyellugmeskuvek iingunaghmi yugusin mamlegllagullequq.

³⁵ Tamaaken apalluqluku kelengakigu nighuk ilugpenilnguq mamlegughtestegpenaan.

³⁶ Iingunaghmi yugusin esleqngakumi nighugmeng nalighneghhaa mamlengunaan, taawa kuukgullequten nighugraketun katam kenelghutak kuukgutellghegketun elpenun.”

Jesus‑em Anaggunikangi Pharisees‑etlu Apeghtughikayugetlu Liilightuusaneng

³⁷ Jesus akuzineghmeng taaqsan, Pharisee‑m ellmeggnun neghyaghtiisqegkaa. Enkaam iteghluni aqumegkaq tipelegni.

³⁸ Pharisee‑m esghaghluku saghiighayagutkaa uughtunghilnguq neghelleghqami sivungani.

³⁹ Enkaam Atanghem pikaa, “Elpesi Pharisees‑eni, sangigtaqasi qaayngi qayuusighpesillu sagneghpesillu, iwernga ilugpesigun nukeggnaghtusi, esleqngaasi pakigneghmengllu seghleghmengllu.

⁴⁰ Liigikigatngwaaghtusi! Kiyaghneghem ulimaaqenghitaguu yugusim qaayngallu ilungallu?

⁴¹ Itupill tuunitek aklumalghiinun ilugpesineng enkaam qayesillu ilusillu iqangiitngwaaghlleqii.

⁴² “Seghleghwaaghunaqnguusi elpesi Pharisees‑eni! Tuunaqasi qulaghqellesi Kiyaghneghmun, talwa mint‑esi, rue‑si, alngunaklu neqem neqnighsaatangi. Iwernga avelghasingwaaghaqaghsi pinitun pilleq yulgutegpesinun, piniqingalleqlu Kiyaghneghmun. Taakuk piyaghqapestaaqagsi maligullukek tuunilleghpesistun qulaghqelleghpesineng.

⁴³ “Seghleghwaaghunaqnguusi elpesi Pharisees‑eni! Synagogue‑nni aqumyuneghtuusi aangwaaghet aqumutiitgun. Akilpegaghvignillu quyakesugaqusi aangwaaghulusi.

⁴⁴ Seghleghwaaghunaqnguusi elpesi! Leganqun nalluniighumangilngughestun lliivghestun ayuqusi yuget esghiigalkangit. Qaayngitgun piyuneghmegteki ukmangiinnanighaqut.”

⁴⁵ Ataasim apeghtughikayugem Liilightuusaneng pikaa, “Apeghtughista, tawaten pilleghpek kayngusaakiinkut!”

⁴⁶ Jesus‑em pikaa, “Seghleghwaaghunaqnguusi elpesillu apeghtughikayugni Liilightuusaneng! Apeghtughillesi piyaqnapigtut yugnun qaatkesaghqaaluteng. Uqigtuqastun akmagestun ayuqut yugnun akmagtestaqegkesi, naqamllu talwa ataasiq ighneghwaaghsi atuqigataghsi kayusiinnaluki akmagitneng.

⁴⁷ Seghleghwaaghunaqnguusi elpesi! Pinighnaghsaghaqasi lliivghit quulvaghnaluki uuknaliqistet sivuneghpesi tuququqiit.

⁴⁸ Tawaten pilleghpesigun kelgutngwaaghsi itagnaqilleghsi sivuneghpesi pillghitnun. Ellngita tuququqiit uuknaliqistet, elpesi pinighnaghsaghaqasi lliivghit.

⁴⁹ Tamaaken apalluqluku peghqinelleghmikun Kiyaghneq pikaaguq, ‘Kayagfikelleqanka uuknaliqistenengllu apostle‑enengllu, tuqulleqiit ilangi, amyuqetaatkelleqiit ilangi.’

⁵⁰ Enkaangam aghneghni maaten kiyaghlleghhiit aghyuughyaghqaagut apalluqluki sivunghita tuququqaqegkangit qamaglluki uuknaliqistet nunam ulimayuwhaallghaneng,

⁵¹ taagegken ima Abel‑em tuqutellghaneng Zechariah‑m tuqutellghanun. Zechariah tuqutkaqegkangat akulegkeni aghqefigemllu Agleghnalghiimllu Nengan. Aa‑a, ungipaatamsi, kiyaghlleghiit aghneghni maaten aghyuullengyaghqaagut tawaten pilleghnun.

⁵² “Seghleghwaaghunaqnguusi elpesi liisimallelegllagni Liilightuusaneng! Aghulaqusimaaghsi key qelpeghusighqaq amiganun liisimallghem Kiyaghneghmeng ayuqelghii; elpesi iteghyugigatusi enkaam tamaakut iteghnaqelghiit aghuliightaqasi.”

⁵³ Jesus iqisan apeghtughikayugetlu Liilightuusaneng, Pharisees‑etlu ugumiyaguteghllakaat. Taagken kenlanga seghlequughllagyagutkaatlu aapqughwaaghtaakaatlu piyaqnalghiineng,

⁵⁴ sameng pisqelluku anagngalghiimeng anagvigighnaluku.