Luke 10 - New Testament-et Akuzipigestun

Jesus‑em Kayagtekangi 72‑ghyaget Maligsaaghtet

¹ Taam kingunganeng, Atanghem maligsaaghtemineng nakmikegkii 72‑ghyaget yuget. Takuughaghyaghqaminun kayagtekii malghukaghtiita igleghtekestiisqelluki.

² Pikii, “Uglalghiim yugem ugpeqsugaqiit Pinilghiit Ungipat. Tamaakunguut usputngalghiit nunivagseghanun unataghyaqleggiinaaghtekat. Taawanginaq palapigtut qepghaghtet. Enkaangam yughaghtek Atanghanun unataghyaghqat kayagtisqelluku qepghaghtekaghqameng unataghyaghqaanun.

³ Aghulaqitek! Taawa kayagtamsi penniighaghaastun ayuqlusi qungangitnun amaat.

⁴ Kelqegpenasi manimeng, aqeftaghaaghmeng, simiitkaghqameng kamegmeng. Tumeni aghuliighlusi kimaawisightughpenasi aleghqughyaghqaaluki yuget.

⁵ Iteneghpesini mangteghanun, sivuklusi whaten piiqiteki, ‘Kiyaghneghem nekeggmellelisilli!’

⁶ Mangtegham yugan upughaskangisi nekeggmellelighluni taawa Kiyaghneghem nekeggmellelilleqii. Iwernga upughanneghilkangisi, Kiyaghneghem nekeggmellelgusnaanghitii.

⁷ Tawantaqitek ataasimi mangteghami, neghaqluki sangwaat upughatusiit. Tawaten piiqitek qayughllak qepghaghta akileghtuusangaquq qepghalleghminun. Tukughpesineng aanaqlusi kinkunun nuugtaataghpenasi.

⁸ Kaanneghpesini nenun, tugukliqangisi upughatusiit neqet neghaqiteki.

⁹ Naallghuqughteki qinuyugtiighit, whatenllu piiqluki, ‘Ataneghpagullgha Kiyaghneghem whaa maantuq.’

¹⁰ Iwernga kaanneghpesini nenun, tuguklinghilkangisi, tuumngitnun aglaghlusi yugtuqami whaten pilghaasi,

¹¹ ‘Talwa nunagpesi pagulanga itegamteggun nevegkaq paallgaghput. Tawaten piikut kelguviknalusi anaggullghhiisi ighsakelleghpesigun Kiyaghneghem ungipaa. Iwernga neqamikiteggu Ataneghpagullgha Kiyaghneghem whaa maantuq!’

¹² Ungipaatamsi, Nanqigtillghem Aghneghani Sodom‑eghmiit aghyuulleghqestaaghaayaghqaagut taam nem yuganeng.

Jesus‑em Kelengasaaqangi Ugpeqaanghilnguut

¹³ “Seghleghwaaghunaqnguusi, Chorazin‑eghmiini! Seghleghwaaghunaqnguusi, Bethsaida‑ghmiini! Elpesini allaaghlluwaghtilleghllaget apeghiiqat pikaayaqata Tyre‑millu Sidon‑millu, yugit avuteghqegkaanayaghtut seghleghqennanighnayaghtut. Tamaaken apalluqluku aalluteng suvinalghiimeng qiipaghaghqameng aqumnayaghtut panetelleghteggun.

¹⁴ Nanqigtillghem Aghneghani, Tyre‑ghmiitlu Sidon‑eghmiitlu aghyuulleghqestaaghaayaghqaagut elpesineng.

¹⁵ Enkaam elpesi, Capernaum‑eghmiini! Qaywa anglisteghllagyaghngaaghpesi elpesineng katam, repall sumeghpesini usuqellengelleqnilusi qilagmi, yeghlegi ukiglleqiisi hell‑mun!”

¹⁶ Maligsaaghteni Jesus‑em pikii, “Kitum alngunak nagaskumisi, nagalleqaatnga whanga. Kitum alngunak ighsakegkumisi, ighsakelleqaatnga whanga, enkaam kitum alngunak ighsakegkuminga, ighsakelleqaat kayagtisteka.”

Uteghnillghat 72‑ghyaget Maligsaaghtet

¹⁷ Tagtalmi taakwani 72‑ghyaget maligsaaghtet uteghniqat quyaghllagumaghmeng. Jesus pikaat, “Ataneq, talwa tughneghaat qaatkaqiinkut ateghpegun qelenemteki!”

¹⁸ Jesus‑em pikii, “Aa‑a, esghaamaaqa Tughneghaq, qilagmeng ifkalghii nighwaagpagtastun.

¹⁹ Nagatek! Aghtughyaghqaanghillelisimaamsi tuutesqelluki nemeghyat, scorpion‑et, kayaalqesqellukillu qamaglluki aghtughyaghqaanghillghi anguyagem. Enkaam saam alngunak aqnighhnaanghitiisi.

²⁰ Itagnalghiinguuq quyalghiisi qayughllak tughneghaat qaatkegkangisi, iwernga quyaaghataghaghtek qayughllak atesi igaqelghiit qilagmi.”

Jesus Quyaghllalghii

²¹ Tawani pilleghmi Agleghnalghiim Taghnegham Jesus quyastekaa. Pikaq, “Ataay, Atangha qilagemllu nunamllu, iqamsiqayugvikamken! Elpek tamaakut talughtaten peghqinelghiinengllu liitkanengllu, naqam liitestaten taghnughhaghestun ayuqelghiinun. Aa‑a, Ataay, taananguuq piyukellghen.”

²² Taagken Jesus‑em pikii yuget, “Atama tuunumaanga sameng tamaghhaaneng. Kitum alngunak nallukaa Ighneq kinangutanga, iwerngaqun Atam. Kitum alngunak nallukaa Ata kinangutanga, iwerngaqun Ighneghem. Ighneghemllu liitesleqaa Ata kitumun alngunak nakmikegkaminun.”

²³ Taagken qiivluki maligsaaghteni, ellnginiit pikii, “Quyastekaagusi esghaallghiisi sameng esghaqaghpesineng!

²⁴ Ungipaatamsi, uuknaliqistelghutetlu umiilgetlu esghaghyukiit esghaghasi, esghaamangilkangit. Nagaqughyukiit nagaqughasi, nagaquumangilkangit.”

Ungipaghaan Nangllegtalghii Samaria‑ghmii

²⁵ Apeghtughikayugem Liilightuusaneng takuluku anagvigighnaluku aaptekaa, “Apeghtughista, naten salunga allgeghhnayaghsikun kenlengilnguq unguvalleq?”

²⁶ Jesus‑em kiimsiqaa, “Sangwaa Liilightuusani igaqngaa? Naten liigikaqsiki atightuneghpeki?”

²⁷ Yugem kiimsiqaa, “ ‘Piniqsaghqaqan Ataneq Kiyaghneghen, qamaglluku ilugpegun, qamaglluku unguvasighpegun, qamaglluku iknaqelleghpegun, qamaglluku umyugaghpegun.’ Enkaam, ‘Piniqsaghqaqan yulguten elpeneng katam piniqelleghpetun.’”

²⁸ Jesus‑em pikaa, “Elqughaghtan. Tawaten pi enkaam kenlengilngughmeng unguvallengellequten.”

²⁹ Iwernga apeghtughikayuk Liilightuusaneng liigikesukaq Jesus‑mun qaatkutngwaaghluni ayuqniluni Liilightuusanun, enkaam aaptekaa, “Kinangaawa yulgutka?”

³⁰ Jesus‑em kiimsiqaa, “Taawanguq yuuk Jerusalem‑emeng ukikaq Jericho‑mun. Wayaghniightet sughugluku, qesugughluki aatkii, anagulqaat. Taagken tuqutevzighluku unitkaat.

³¹ Enraqlu priest‑a taakwagun tumetgun igleghtekaq. Iwernga esghaghyamigu yuuk naghughtekaa tumet inglungitgun.

³² Mulugpenani Levite‑a kaalluni, esghaghluku, ellnganllu naghughtekaa tumet inglungitgun.

³³ Iwernga Samaria‑ghmii, taakwagun tumetgun igleghangulghii. Kaalluku esghaghyamigu nanglegyagutkaa.

³⁴ Takuluku kiingi mesiighmengllu wine‑mengllu ughvughteghluki, qantaghtuqii. Taagken donkey‑minun qaakluku aglaatkaa aqelqalghutamun, tawani aflengakegkaa.

³⁵ Unaamingani tugulukek maalghuk denarii‑ek, tuunutkellukek aqelqalghutam aflengakistenganun pikaa, ‘Aflengakaghtigu. Kayusiitaghaamakuvgu uteghniquma llivikelleqamken.’”

³⁶ Taagken Jesus‑em aaptekaa, “Sumeghpeni taakuneng pingayuneng naliit yulgutepiigufta yugmun wayaghniightet amyuutkegkiitnun?”

³⁷ Apeghtughikayugem Liilightuusaneng kiimsiqaa, “Taananguuq nangllekikaq yugmun.” Jesus‑em pikaa, “Aghulaqluten, elpeklu tawaten pi.”

Jesus‑em Laalighfikegkek Martha‑nkuk Mary‑nkuk

³⁸ Jesus‑enkut maligsaaghtekullghiit igleghutkelluku kaatkat nengiighhaghmun. Tamaanteftuq aghnaq, aatgha Martha, Jesus‑enkut maligsaaghtekullghiit upughatkii ellmeggnitesqelluki.

³⁹ Anglegutangan aatgha Mary‑nguftuq; aqumluni Jesus‑em itegaan manungakun nagatkaa apeghtughilghii.

⁴⁰ Iwernga Martha‑m yataaghquteghllagukangi aqelqani neghyaghqameng, enkaam Jesus takuluku pikaa, “Ataneq, waakenghisiguu anglegutma ellnginaghma qepghaghtestekanganga? Kayusiitesqaghtinga!”

⁴¹ Atanghem pikaa, “Martha, Martha, uglalghiimeng sumeghyaliiqutenllu seghleliighaqutenllu

⁴² iwernga ataasighhaaguq aklunalghii. Mary‑m nakmikumaa taana pinillgha, ellnganeng iqisaghqaanghituq.”