John 9 - New Testament-et Akuzipigestun

Jesus‑em Naallghuskanga Ayaakaq Yuuk

¹ Jesus‑em igleghutkelluku esghaqaa yuuk ayaangaghmi allgeqaq.

² Maligsaaghtengan aaptekaa, “Apeghtughista, kitum seghleghqellghan una yuuk ayaangaghmi allgeghtestagu, ellngan seghleghqellghaan nalighmeng angayuqagkenka?”

³ Jesus‑em kiimsiqii, “Uum yugem nalighmeng angayuqagkenka seghleghqellghita ayaangasneghitaa. Una yuuk ayaangaghmi allgeqaaguq esghiisqelluku Kiyaghneghem aghtughyaghqaanghillgha ellngakun.

⁴ Nagneghutepestaaghyaghqaqaput qepghaqii Kayagtistema paninang aghneghuluku. Unugyaghtughaa, kina alngunak qepghaghnaanghituq unugmi.

⁵ Paninang nunamellunga nighukaanga nunam yugan.”

⁶ Tawaten pitkelluku nunakun qesighluni sunameng akumluku angighhegkakek yugem iiskek.

⁷ Taagken yuuk pikaa, “Naayvaghaghmun Siloam‑emun aghmigyaghtaa.” (Siloam whaten pisiilghii, “Tuyuqaq”.) Enkaam yuuk aghmigyaghtughluni tagiyalghiimi esghaasagulluni.

⁸ Uvilighneghitallu ilangitallu awen esghaghaqegkangat taana yuuk tungsighralghii enkaam aapqughaaghutkat, “Unangunghitaa yuuk aqumluni tungsighraghaqsalghii?”

⁹ Ilangi pikat, “Aa‑a taananguuq.” Iwernga ilangi pikat, “Nakaa, allanguuq, kinanguuq ellngasugnilnguq.” Enkaam ayaangayalghiim pikii, “Taananguunga.”

¹⁰ Aaptekaat, “Naten esghaasagusin?”

¹¹ Kiimsiqii, “Yugem aatqelghiim Jesus‑meng qesighluni sunameng akumluku angighllukek iyegka aghmigyaghtiisqaanga Siloam‑emun. Enkaam aghmiglunga esghaasagutunga.”

¹² Aaptekaat, “Naagu taana yuuk?” Yugem kiimsiqii, “Saa, nallukaqa!”

Pharisees‑et Aapqughaaqangat Ayaangayalghii

¹³ Taagken ayaangayalghii yuget aglaatkaat Pharisees‑enun.

¹⁴ (Tawani aghneghmi Sabbath‑ngulghii Jesus‑em qesighluni sunameng akumluku esghaasagutestaqngamigu yuuk.)

¹⁵ Pharisees‑et aaptekaat yuuk, “Naten esghaghyagusin?” Kiimsiqii, “Yugem angighllukek sunameng iyegka, aghmigyalghiinga esghaghtunga.”

¹⁶ Ilangi Pharisees‑et pikat, “Una yuuk Kiyaghneghmeng pingunghituq, qayughllak qaatkigatii Liilightuusat Sabbath‑meng ayuqelghiit.” Iwernga ilangi pikat, “Yuuk seghleghqesta, allaaghlluwhaghtilaghnaanghituq tawatelngughmeng.” Aaghtiiraaghutkat.

¹⁷ Alla aaptekaat yuuk, “Ellngan esghaghtestaaten. Sameng pinayaghsigu?” Yugem kiimsiqii, “Uuknaliqistenguuq.”

¹⁸ Jews‑et igleghutistengita ugpequmangilkangat ayaangayaatangallu, esghaghyagutellghallu, enkaam aqfastekagket angayuqakek.

¹⁹ Aaptekagket, “Una ighneqestegnegu? Ayaangaghmi allgeghumanikesek, naten esghaghyaguta?”

²⁰ Angayuqagkenka kiimsiqii, “Liisimakaghpung ighneqaghpung. Liisimakaghpung ayaangaghmi allgeqaaguq,

²¹ iwernga nallukaghpung naten esghaghyagusimatanga. Talwa nallukaghpung kitum esghaghyagutestellgha. Aapteggu yugughtekaaguq, kiimsighnaaghiisi ellmineng.”

²² Angayuqakek tawaten pikak alinglutek Jews‑et igleghutistengitneng. Igleghutistet ataasiightengngwaaqat kitum alngunak ugpeqnikagu Jesus, Christ‑anguniluku iqitesaghqaaluku synagogue‑nneng.

²³ Taana apalluqluku angayuqakek whaten pikak, “Yugughtekaaguq, aapteggu.”

²⁴ Enkaam Jews‑et igleghutistengita tuqlunqiglluku ayaangayalghii yuuk, pikaat, “Usuqigu Kiyaghneq. Liisimakaghput taana yuuk, Jesus, seghleghqestenguuq.”

²⁵ Pikii, “Nallukaqa seghleghqestengutanga, iwernga liisimakngwaaghaqa ayaangayalghiinga whaa esghaghyagutunga.”

²⁶ Jews‑et igleghutistengita aaptekaat, “Saaten? Naten esghaghyagutestaten?”

²⁷ Kiimsiqii, “Ungipaatngwaaghamsi, iwernga nagasugigataghpesinga. Sangan alla nagasugesteggu? Elpesillu maligsaaghtengughsugetsii ellnganun?”

²⁸ Taagken ugumiyagulluku pikaat, “Elpek maligsaaghtekaaten. Whangkuta Moses‑em maligsaaghtekiinkut.

²⁹ Liisimakaghput Kiyaghneghem aleghquqaqaa Moses. Iwernga taana yuuk, Jesus, nallukaghput naken pingutanga.”

³⁰ Yugem pikii, “Kii! Elpesi igleghutisteni nallukumasteggu naken tagikaatanga, naqamllu ellngan esghaghyagutestaanga.

³¹ Qamaglluta liisimakngwaaghaghput Kiyaghneghem nagasigatii seghleghqestet. Iwernga Kiyaghneghem nagatkayuwaa kina alngunak maniguullghii, qaatkullghii ellminun.

³² Ima nuna piinlighyuwhaallghaneng kitum alngunak nagaqiigataa kina alngunak esghaghtestiniluku ayaangaghmi allgeqameng.

³³ Taana yuuk Kiyaghneghmeng pingunghisaqumi sanayanghituq.”

³⁴ Pikaat, “Seghleghqestenguuten ima allgenghaghhaategpeneng, sanganꞌngam whangkuta apeghtughnaqutkesikut?” Taagken aanestestekaat synagogue‑meng.

Jesus‑em Akuzitkegkanga Ayaangalleq

³⁵ Jesus‑em nagaquqaa ayaangayalghii yuuk aanesimaniluku synagogue‑meng. Enkaam ivaghluku naalkesamigu pikaa, “Ugpeqsigu Ighnegha Yugem?”

³⁶ Yugem aaptekaa, “Yuguniiq, kingangaawa Ighnegha Yugem? Ungipaatinga enkaam ugpeqlakun.”

³⁷ Jesus‑em pikaa, “Esghamaan, aleghqughaqaaten.”

³⁸ Yugem pikaa, “Aa‑a, Ataneq, ugpeghtunga.” Taagken segesqughlluni maniguqaa Jesus.

³⁹ Jesus pikaq, “Taginguunga nunamun aafqughnaluki yuget, tamaakut esghiigasalghiit esghiisqelluki, tamaakut esghaqayuget ayaasnaluki.”

⁴⁰ Ilangita Pharisees‑et tunganganilnguut Jesus‑em nagalluku aaptekaat, “Sameng pizin? Whangkutallu ayaanganizikuut?”

⁴¹ Jesus‑em kiimsiqii, “Ayaangayaqufsi Kiyaghneghem pinayanghitiisi seghleghqestengunilusi. Iwernga whaten pikaategpesineng, ‘Esghaqayuguukut’ tamaaken apalluqluku Kiyaghneghem piiqiisi seghleghqestengunilusi.”