John 8 - New Testament-et Akuzipigestun

Gelgaghniiqaq Aghnaq

¹ Jesus aglaqaq Mount Olives‑mun.

² Unaanguluku aglanqigtekaq Temple‑mun. Yulghun tagilaghaasan Jesus‑em aqumluni apeghtuqii.

³ Liilightuusaneng apeghtughikayugetlu, Pharisees‑etlu tagitkaat aghnaq anguksakaq gelgaghniighumaluku. Nekevesluku sivungitgun yuget,

⁴ Jesus pikaat, “Apeghtughista, una aghnaq anguksakaaguq gelgaghniighumaluku.

⁵ Liilightuusaan Moses‑em qelghusaqaa, aghnat tawaten pikata tuqutesqelluki milughpagaataghhiinaq. Elpek sameng pinayaghsigu?”

⁶ Jesus aaptekaat tawaten Liilightuusat kipullegmun sameng pisqelluki, qayughllak anaggutesugukangat. Jesus peghleghlluni ighneghwaaghmineng igaqaq nunakun.

⁷ Aaptaataghyatni Jesus‑em nekevluni pikii, “Nalighpesi seghleghqelleqraggiilnguum milughyuwhaaghligu uyghagmeng.”

⁸ Alla peghleghlluni ighneghwaaghmineng igaqaq nunakun.

⁹ Nagasamegteggu Jesus, aghulaquutekestaqat. Nuyekliit sivukluteng, taagken tamaakut ilangit aghulaquutkat. Jesus ellnginaghhaaghtekaq, iwerngaqun taana aghnaq paninang nekevghalghii sivungani.

¹⁰ Jesus‑em nekevenqiglluni aaptekaa, “Aghnami, naaki anaggunnisteten? Nalighhiiniitaa‑a aghyuughyaghqaaniluten pinghitataan?”

¹¹ Kiimsiqaa, “Yuguniiq, nalighhiiniita pinghitaatnga.” Enkaam Jesus‑em pikaa, “Whangallu aghyuughyaghqaaniluten pinaqenghitamken. Aghulaqi, alla seghleghqegpenang.”

Jesus Nighuguuq Nunam Yuganun

¹² Taakwaningani Jesus‑em aleghqughlaataqii yuget. Pikii, “Whanga nighuguunga nunam yuganun. Kitum maligtekuminga mamlegmi kiyaghhnaanghituq, kenelgullequq unguvallelitikayugmeng.”

¹³ Pharisees‑et pikaat Jesus, “Taawa apeghlaataghtuten elpeneng, iwernga akuziteten ipapighqusighqiitut.”

¹⁴ Jesus‑em pikii, “Akuzitkeghngaaghma whangamneng katam, akuzitenka ipanguut qayughllak liisimakaqa naken tagikaatka, liisimakaqallu takuyaghqaqa. Elpesi nallukaghsi naken pimatka, talwa nallukaghsi takuyaghqaqa.

¹⁵ Nanqigtiiqusi nunam yugatun, whanga nanqigsigataqa kina alngunak.

¹⁶ Nanqigtinaqsaquma nanqigtilqa elqughutnganayaghtuq qayughllak ellnginaanghitunga: Ata Kayagtisteka whangamnituq.

¹⁷ Liilightuusaghpesini igaqngaaq maalghuk yugek sangwaa aapqumegnegu tawatengwaaq, akuzillghik ugpeqelleqiit ipanguniluki.

¹⁸ Enkaam whangamneng aapghaqunga, Atamllu Kayagtistema aapghaqaanga.”

¹⁹ Aaptekaat, “Naagu Atan?” Jesus‑em kiimsiqii, “Nallukaghpesikung Atakullghiigni. Iwernga whanga liisimaksaqufsinga, Atakallu liisimaknayaghaghsi.”

²⁰ Jesus apeghtughingulghii tawaten Temple‑mi manimeng aflengakivigan tungangani. Iwernga kitum alngunak tugumangitkaa, qayughllak pilleghqaa salin kaasigalnguq.

Jews‑elghutet Ugpeqegkangat Jesus

²¹ Allameng Jesus‑em pikii yuget, “Unilleqamsi, ivaghlleqaghpesinga, iwernga tuqullequsi seghleghqelleghtuumaghpesi. Takukamnun aglaghnaanghitusi.”

²² Taagken Jews‑et igleghutistengit pikat, “Jesus whaten piiq, ‘Takukamnun aglaghnaanghitusi.’ Qaa ellmineng tuqunnaquq?”

²³ Iwernga Jesus‑em pikii, “Elpesi maaken nunameng pinguusi, whanga pamaken pinguunga. Elpesi nunam pikiisi, whanga nunam pikenghitaanga.

²⁴ Enkaam ungipaatamsi tuqulleqnilusi seghleghqelleghtuumaghpesi. Aa‑a tuqullequsi seghleghqelleghtuumaghpesi ugpeqenghilkufsinga whanga whangangutka.”

²⁵ Aaptekaat, “Kinanguzinmi?” Jesus‑em kiimsiqii, “Whanganguunga aapghaqellemtun piinlighyuwhaalleghmeng ima.

²⁶ Akuzitkesaghqaghllaguunga elpesineng, nanqigtusighqaghtuungallu elpesinun. Iwernga Kayagtikaq whangamneng ipanguuq, enkaam nunam yuganun aapghaqanka nagatkanka ellnganeng.”

²⁷ Yuget liigikumangilkangat Jesus‑mun akuzitkengngutanga Ata.

²⁸ Enkaam Jesus‑em pikii, “Kefkufsigu Ighnegha Yugem liilleqaghsi whanga whangangutka. Liilleqaghsi sangwaa maana piiqegkegka whangamneng pingigatulka. Liilleqaghsi akuzitkegkayugutka Atam apeghtuusaqegkaghhiinaa whangamnun.

²⁹ Kayagtikaq whangamneng whangamnituq. Iiwleng atuqegkayuwaaqa efqughtinalghii ellnganun enkaam unisigataanga.”

³⁰ Jesus tawaten akuzimaluku, uglapiglleghhiim ugpeqegkaa.

Itemutelleq Seghleghqelleghmeng

³¹ Jesus‑em pikii Jews‑et ugpeqilghiit ellmineng, “Nagnequfsi qaatkullusi apeghtullemnun, ipapestaaq maligsaaghtekamsi.

³² Ipapighqelleq liilleqaghsi enkaam ipapighqellghem itemulleqiisi.”

³³ Pikaat, “Abraham‑em kingunqiinkut, qepghaghtelaaghungigatukut. Sangamta pizikut itemusaghqaaniluta?”

³⁴ Jesus‑em kiimsiqii, “Ipa ungipaatamsi, kina alngunak seghleghqengngalghii, seghleghqelleghmun qepghaghtelaaghestun ayuquq.

³⁵ Qepghaghtelaaq nengllugutenisaghqaanghituq quunperugllak. Iwernga nengllugutet ighneghat ellngitnisaghqaaguq quunperugllak.

³⁶ Enkaam Ighneghem itemestekangisi, ipapestaaq itemyaghqaagusi.

³⁷ Liisimakamsi Abraham‑em kingunqiisi. Iwernga tuqusuwaqaghpesinga qayughllak tugukliigalkesi apeghtuusanka.

³⁸ Ungipaatamsi Atama kelgutkaaneng whangamnun, iwernga elpesi atagpesi qelghutkaa piiqaghsi.”

³⁹ Kiimsiqaat, “Whangkuta atakaghput Abraham.” Jesus‑em pikii, “Ipa Abraham‑em avaqutaqsaqangisi, atuqaqnayaghaghsi Abraham‑em pikaa.

⁴⁰ Iwernga whaa elpesi tuqunnaqutkaqaghpesinga, whanga ipapigmeng ungipaatikayuk nagaquqamneng Kiyaghneghmeng. Abraham tawaten pinayanghituq.

⁴¹ Atuqngwaaghsi atagpesi pikaa.” Jews‑et pikaat, “Kiyaghneghhiinaaguq Atavut, enkaam whangkuta ellngan ighnepikiinkut.”

⁴² Jesus‑em pikii, “Kiyaghneq ipa Ataksaqufsigu piniqnayaghaghpesinga, qayughllak tagikaagunga Kiyaghneghmeng, enkaam whaa whaantunga. Whangamneng tagimangitunga, Kiyaghneghem kayagtekaqaanga.

⁴³ Liigikigataghsi sameng pilqa qayughllak tuguklighyaghqaqenghilkesi apeghtughillghenka.

⁴⁴ Avaqutaqiisi atagpesi tughneghaam, enkaam atuqsuwaqaghsi atagpesi piyukellgha. Piinlighyuwhaalleghmeng ima yugtaghtenguuq. Ipapighqelleq atuqaghsigataa qayughllak ipapighqellghilnguq. Iqlengiqneghmini taawanginaghhaq ayghiitkani piiqegkanga qayughllak iqlengiqestengulghii, atakegkanga iqlengam.

⁴⁵ Iwernga whanga akuziiqunga ipapigmeng, enkaam tamaaken apalluqluku ugpeqigataghpesinga.

⁴⁶ Nalighpesi ipapighqutkennayaghtanga seghleghqestengutka? Qaywa akuzighngaaghma ipapigmeng, sangamangam ugpeqigastengnga?

⁴⁷ Kitum alngunak Kiyaghneghem pingan tuguklighaqii Kiyaghneghem akuzitangi. Iwernga elpesi tugukliigatasi Kiyaghneghem akuzitangi, qayughllak Kiyaghneghem pikenghilkangisi.”

Jesus Aangataghaghtuq Abraham‑emeng

⁴⁸ Jews‑et pikaat, “Piimken, Samaria‑ghmiinguuten, tughneghaamllu iitghumaaten. Ipa pizikaan?”

⁴⁹ Jesus‑em kiimsiqii, “Tughneghaam itellghitaanga. Quulvaghaqaqa Ataka iwernga elpesi quulviigataghpesinga.

⁵⁰ Quulvallengnaqutkengngunghitunga whangamneng. Iwernga Ataasiiguq quulvaghiyulghii whangamneng, ellnganguuq nanqigtiyaghqaq elqughulluni.

⁵¹ Ipa ungipaatamsi, kitum alngunak qaatkegkumiki apeghtughillghenka, tuqunaanghitngwaaghtuq.”

⁵² Jews‑et pikaat Jesus, “Taawa liitamken tughneghalguftuten ilugpeni. Talwa Abraham‑llu, uuknaliqistetlu tuqulaghaatkaagut. Iwernga elpek piiten, ‘Kitum alngunak qaatkegkumiki apeghtughillghenka, tuqunaanghitngwaaghtuq.’

⁵³ Sumeghpenii aangataghaghsiin atamnneng Abraham‑emeng? Abraham tuqukaaguq, uuknaliqistetlu tuqulaghaatkaagut. Kinanguniluten piiqsin?”

⁵⁴ Jesus‑em kiimsiqii, “Whangamneng quulvaquma taana quulvalleq sasiinaanghituq. Quulvaghikayuk whangamneng Atakaqa. Elpesi Kiyaghneqniiqluku

⁵⁵ nallukaghsi. Whanga liisimakaqa. Nalluknikumkun iqlengiqestengullequnga elpesistun. Iwernga whanga liisimakaqa, qaatkaqankallu sameng pillghi.

⁵⁶ Atazi Abraham quyaghllakaaguq esghaghlleqniluku tagilqa. Esghaqaqaa, enkaam quyakaaguq.”

⁵⁷ Jews‑et pikaat, “Ay? Sameng pizin? Esghaamangitngwaaghan Abraham. Talwa salin 50 years‑ngughsigatuten.”

⁵⁸ Jesus‑em pikii, “Ipa ungipaatamsi, talwa sivungani Abraham‑em Whanganguunga.”

⁵⁹ Jesus tawaten piyan, yuget uyghagmeng tugulaatkat milughpagaataghnaluku. Iwernga Jesus iighluni aanegkaq Temple‑meng.