John 7 - New Testament-et Akuzipigestun

Jesus‑em Anglegutangita Ugpeqenghilkangat

¹ Kingunganeng taam Jesus igleghakaq Galilee‑mi. Igleghayugumangilnguq Judea‑mi, qayughllak Jews‑et igleghutistengit tamaanlenguut tuqusugukangat.

² Jews‑et neqenghaghqelleghqaat aatqelghii tabernacles‑meng kaasaghtungestalghii.

³ Jesus‑em anglegutangita pikaat, “Aghulaqi maaken, aglaa Judea‑mun maligsaaghteten esghapagesqelluki allaaghlluwhaghtilleghpeneng.

⁴ Kitum alngunak apeghseghuuyulghiim aksaqigataa salleni. Enkaam tawaten pinaqngukuvek tamaghhaghmi yugem esghapagliten!”

⁵ (Talwa anglegutangita Jesus ugpeqenghilkangat.)

⁶ Jesus‑em anglegutni pikii, “Judea‑telleghqaqa salin kaasigatuq, iwernga elpesi alngunak aghneghni piyaghqaagusi.

⁷ Nunam yugan ugumiknaanghitiisi, whanga ugumikaatnga qayughllak aapghaqegkegka seghleq atuqaqegkangat.

⁸ Enkaam elpesi neqenghaghqelghiinun pitek; whanga pinaqenghitunga qayughllak aghneqa salin kaasigatuq.”

⁹ Jesus‑em tawaten piluki ellnga Galilee‑metkaq.

Jesus Neqenghaghqemmun Pilghii

¹⁰ Jesus‑em anglegutangi neqenghaghqemmun pikat. Taagken kingungitneng yugnun esghaghtesukaghpenani ellngallu pikaq.

¹¹ Neqenghaghqemmi Jews‑et igleghutistengita ivaqaat Jesus, pimaghmeng, “Naagu taana yuuk?”

¹² Uglapiglleghhiit yuget tawanlenguut sigutquutkegkaat Jesus. Ilangita pikaat, “Jesus piniipigtuq yuuk.” Ilangita pikaat, “Nakaa, puughtaqii yuget.”

¹³ Iwernga kitum alngunak qaayngakun akuzitkumangilkanga Jesus, alingluni Jews‑et igleghutistengitneng.

Jesus Apeghtughilghii Neqenghaghqelghiini

¹⁴ Neqenghaghqellgha santillghem qukaghitaquqlu, Jesus Temple‑mun aglaghluni apeghtughikaq.

¹⁵ Jews‑et igleghutistengita saghiighayagulluku pikat, “Naten una yuuk liiteghllagta igaghyaamangilnguq?”

¹⁶ Jesus‑em kiimsiqii, “Apeghtuusanka whangamneng pingunghitut, Kayagtistemneng pinguut.

¹⁷ Kitum alngunak Kiyaghneghem piyukellgha atuqsugukumigu liisimaksaghqaqaa, apeghtughilqa Kiyaghneghmeng pingutanga, nalighmeng whangamneng katam pingutanga.

¹⁸ Kina alngunak apeghtughilghii ellmi katam sumeghtaghalleghmineng quulvallengnaqutkengnguuq. Iwernga kina alngunak quulvallengestinaqutkelghii kayagtikamun, akuzinguuq ipapigmeng, iqlengiqigatuq.

¹⁹ Qamagllusi liisimakaghsi Moses‑em Liilightuusalitkaqiisi, iwernga nalighhiinaghpesi qaatkigatasi. Sangamangam tuqunnaqutkestengnga?”

²⁰ Yuget kiimsiqaat, “Tughneghaam iitghumaaten. Kitum tuqunnaqutkaten?”

²¹ Jesus‑em pikii, “Ataasimeng allaaghlluwhaghtiyama Sabbath‑mi qamagllusi saghiighayugtusi.

²² Moses‑em qelqaqiisi circumcise‑esqelluki ighnesi (qaywa sivunesi circumcise‑ekaaghngaata Moses‑em circumcise‑esqellghan sivungani). Naqam elpesi circumcise‑eyaghqaanghata ighnesi Sabbath‑mi piiqasi.

²³ Naafqengngunghilkufsigu Moses‑em Liilightuusaa circumcise‑eghilleghpesigun Sabbath‑mi, sangama ugumiyagutestengnga yuuk naallghutngwaallemneng Sabbath‑mi?

²⁴ Nanqigtigpenasi yuget saaqutangi liigikngwaaghpenaki, nanqigtiiqitek elqughullusi.”

Jesus, Christ‑angwaa, Kiyaghneghem Kayagtekaa?

²⁵ Taagken ilangi Jerusalem‑eghmiit pikat, “Taanata yuuk tuqusukangat.

²⁶ Naqam esgha apeghtughilghii yugnun, naqamllu igleghutistemta sanaqigataat. Qaa whaa liigikaat Christ‑angutanga, Kiyaghneghem kayagtekaa?

²⁷ Iwernga whangkuta liisimakaghput taana yuuk naken pingutanga. Christ‑apik tagikan, kitum alngunak nalluksaghqaqaa naken pingutanga.”

²⁸ Jesus paninang apeghtughinguluni Temple‑mi, iglagtuluni pikaq, “Qaywa liisimakngwaaghestegguu kinangutka, nakenllu pingutka? Whangamneng tagimangitunga. Kayagtisteka ipapiguuq, iwernga elpesi nallukaghsi.

²⁹ Whanga liisimakaqa qayughllak ellnganeng tagikaagunga, ellngan kayagtekaqaanga.”

³⁰ Jesus tawaten piyan ilangita yuget tugunaqutkegkaat. Iwernga kitum alngunak agtuqaamangilkanga qayughllak aghnegha salin kaasigalnguq.

³¹ Iwernga uglapiglleghhiit yuget ugpeqegkangat Jesus. Enkaam pikat, “Liisimakaghput una yuuk Christ‑anguuq, qayughllak uglaapiglluku allaaghlluwhaghtiiq Christ‑am piyaghqaaneng.”

Jews‑et Liigikenghilkangit Jesus‑em Akuzitangi

³² Ilangita Pharisees‑et nagaquqiit yuget tawaten akuzimleghaallghiit Jesus‑meng, enkaam ellngitallu, chief priest‑etlu kayagtekiit kelengakistet tugusqelluku.

³³ Taagken Jesus pikaq, “Natengiighhaq elpesinillunga aglaghllequnga Kayagtistemnun.

³⁴ Ivaghlleqaghpesinga iwernga naalkennaanghitaghpesinga. Takukamnun aglaghpagningitusi.”

³⁵ Jews‑et igleghutistengita ilateng pikiit, “Navek una yuuk pinaqa naalkesaghqaafqaami? Greek‑et akulangitnilnguut yuput takulaghnaqakii? Qaa apeghtughillequq Greek‑enun?

³⁶ Samengtuq Jesus pii whaten piiqngami, ‘Ivaghlleqaghpesinga iwernga naalkennaanghitaghpesinga; takukamnun aglaghnaanghitusi’?”

Jesus‑em Akuzitkegkek Agleghnalghiik Taghneghak

³⁷ Kinguliq aghnegha neqenghaghqellghem megnunalleghpigaalghii. Tawani aghneghmi, Jesus nekevluni iglagtuluni pikii, “Kina alngunak meqsukumi tagiluni whangamnun meghli.

³⁸ Kitum alngunak ugpeqegkuminga, ilunganeng qamaken kiiwet maaqsaghqaagut unguvallengestikayuget meghet.” Akuzitet Igaqegkat tawaten pikaagut.

³⁹ Jesus‑em akuzitkengngukek Agleghnalghiik Taghneghak. Kiyaghneghem Taghneghagni salin tuunigataak qayughllak salin kevgigalkanga Jesus quulvalleliteghllagnaluku. Iwernga taakwaningani tamaakut ugpeqilghiit Jesus‑meng, allgeghusaghqaagut Taghneghagneng.

Aaghtiiraaghutkegkangat Jesus

⁴⁰ Nagasamegteggu Jesus tawaten akuzilghii ilangi yuget pikat, “Una yuuk ipapestaaq uuknaliqistenguuq neghyukegkaghput.”

⁴¹ Ilangita pikaat, “Christ‑anguuq.” Iwernga ilangita pikaat, “Christ‑a tagiyaghqaawaa Galilee‑meng?

⁴² Akuzitet Igaqegkat pikaagut Christ‑a tagilleqniluku David‑em nengllugutanganeng, allgeghlleqnilukullu Bethlehem‑emi, David‑em kiyaghfiganeng.”

⁴³ Ilangita yuget ipapighqutkumangilkangat Jesus,

⁴⁴ enkaam tuguyukaat iwernga kitum alngunak agtuqaamangilkanga.

Jews‑et Igleghutistengit Ugpeqinghilnguut

⁴⁵ Kelengakistet kayagtekaayalghiit tugusqelluku Jesus, kaasata chief priest‑etlu, Pharisees‑etlu aaptekiit, “Sangan taginnanighesteggu Jesus?”

⁴⁶ Kiimsiqiit, “Kina alngunak taatun yugtun akuzingigatuq.”

⁴⁷ Pharisees‑et aaptekiit, “Elpesillu Jesus‑em puughtisii?

⁴⁸ Whangkuta igleghutistenillu, Pharisees‑enillu liisimakaput Moses‑em Liilightuusii. Nalimtaa‑a ugpeqatgu Jesus? Nakaa!

⁴⁹ Tamaakut yulghutet nallukiit Moses‑em Liilightuusii, enkaam Kiyaghneghem naafqelleqii.”

⁵⁰ (Ataasiq Jews‑et igleghutistengat Nicodemus‑nguftuq, sivunghani Jesus‑mun pikaq.) Nicodemus‑em pikii,

⁵¹ “Liilightuusamnni nanqigsaghqaqenghitaghput yuuk, wetqukun nagalluku liigikegkumteggu samatanga.”

⁵² Pikaat, “Elpeklu Galilee‑meng pinguzin? Liinnaqiki Akuzitet Igaqegkat. Liilleqan uuknaliqistengituq tagikameng Galilee‑meng.”

⁵³ Qamaglluni tamaana aghulaquutkaq, nemeggnun aglaghtuutkaq.