John 6 - New Testament-et Akuzipigestun

Jesus‑em Neghestillgha 5,000‑neng Siipngalghiineng Yugneng

¹ Kingunganeng taam, Jesus‑em aghviqaa Naayvaq Galilee, aatqelghiillu Tiberias‑meng.

² Uglapiglleghhiim maliglleghaatkaat qayughllak naallghuquulghii qinuyugneng allaaghlluwhaghtilleghqun.

³ Kaalluteng Jesus‑enkut maligsaaghtekullghiit mayughluteng naayghamun aqumuutkat.

⁴ Jews‑et Passover‑mun Neqenghaghqellghat kaasaghtulghii.

⁵ Jesus‑em sivuglluni esghaqii yulghuteghllaget tagilaghaallghiit ellminun. Aaptekaa Philip, “Naken tukfighinayaghesta neqmeng yulghuteghllagnun neghyaghqameng?”

⁶ Tawaten aaptekaa Philip naten pilleghqaa esghaghnaluku, liisimakeghngaaghmigu ellmi salleghqani.

⁷ Philip‑em kiimsiqaa, “200 denarius‑elgughngaamta naamayaghqameng neqengnaanghitukut, talwa sasqughhaghmeng tunqughngaamteki.”

⁸ Ilangallu maligsaaghta tawanlenguq, Simon Peter‑em anglegutanga Andrew. Andrew‑m pikaa Jesus,

⁹ “Esgha una mekelghiighhaq tallimaneng neqekrangllallgaq, maalghuklu iqallugek, iwernga naamanaanghitut.”

¹⁰ Jesus‑em maligsaaghteni pikii, “Yuget aqumuutesqiteki.” (Tamaana vegaaghllagulghii.) Enkaam entaqun 5,000‑nguut yuget aqumuutkat, kesutkegpenaki aghnatlu, taghnughhaatlu.

¹¹ Taagken Jesus‑em tuguluki neqekrangllat, iqamsiqayugluni Kiyaghneghmun, tunqughtestekii aqumuutkaghllagnun tamaavek. Tawateghpigaq iqallugek pikakek, qamaglluteng neghuutkat kepsulleghmeggnun.

¹² Qamaglluteng kepsuusata Jesus‑em maligsaaghteni pikii, “Qerngughteggu tamaana neghumangilkangat, sakusiiqegpenaki.”

¹³ Enkaam qerngughlluki imiqiit qula maalghuk siipneqluku pasketet siipneghitneng tallimat neqekrangllat.

¹⁴ Taana allaaghlluwhaghtilleq yuget esghapagluku pikat, “Ipapestaaq una uuknaliqistenguuq tagiyaghqaanikaat nunamun.”

¹⁵ Jesus‑em liisimakegkanga yuget aqfaluku umiilengllaghnaqutkennaqngukangat, enkaam naayghamun aglaqaq ellnginaghhaanaluni.

Jesus Piyulghii Meghqun

¹⁶ Tawani ighivgaghmi, Jesus‑em maligsaaghtengi ukikat Naayvamun Galilee‑mun.

¹⁷ Mamlegtekanga, Jesus‑llu paninang aviilnguq, enkaam maligsaaghtengi angyamun uughquulluteng aglaqat Capernaum‑emun inglunganilngughmun naayvam.

¹⁸ Taagken naayvaq imaghllugughtekaq qayughllak anuqlighllakanga.

¹⁹ Iiwenllu angwaaghmeng naayvam qukaanun lliighaqut, esghaqaat Jesus meghqun piyugmeng tagilghii angyamun enkaam alingruughutkat.

²⁰ Iwernga Jesus‑em pikii, “Alingegpenasi, Whanganguunga.”

²¹ Enkaam uugtesukaat angyamun. Taagken tawaninginaq quutmun kaatkat takukameggnun.

Yuget Ivaqangat Jesus

²² Yulghuteghllaget unegtekat inglungani naayvam, unaamingani piyalghiimeng Jesus aviituq. Liisimakegkangat ataasiinaalghii angyaq esnami. Jesus maligusimangilnguq maligsaaghteminun angyakun, ellnginaghmeng pikaalghiit unilluku.

²³ Taagken ilangi angyat kaatquutkat Tiberias‑meng. Tamlakat tungangakun yulghuteghllaget neghuutfigitgun ighivgaq. Neghegkaalghiit neqekrangllameng, kingunganeng Jesus‑em iqamsiqayullghan.

²⁴ Yulghuteghllaget piyalghiimeng Jesus‑enkut maligsaaghtekullghiit aviitut, enkaam angyanun uuglleghaalluteng Capernaum‑emun ivaghyaghtuqaat Jesus.

Jesus Neqekrangllaaguq Unguvallelitikayuk

²⁵ Naalkesamegteggu Jesus aaptekaat, “Apeghtughista, qavngaq maavek kaasin?”

²⁶ Jesus‑em kiimsiqii, “Ipa ungipaatamsi, ivaghaghpesinga qayughllak neghelghiisi neqekrangllameng kepsughaaghlusi. Ivanghitaghpesinga allaaghlluwhaghtillghenka apalluqluki.

²⁷ Qepghaategpenaan neqa mulungigalnguq. Yeghlegi qepghaataqiteggu neqa naavyaghqaanghilnguq, kenlengunaan unguvallengestikayuk. Tawatelnguq neqa Ighneghan Yugem tuunyaghqaqa elpesinun, qayughllak Kiyaghneghem Atam itagnaqegkaqaa ellnga.”

²⁸ Yuget aaptekaat Jesus, “Sangaawat qepghaqat Kiyaghneghem pisqesukii whangkunnun?”

²⁹ Jesus‑em kiimsiqii, “Elpesinun qepghaqaq Kiyaghneghem pisqesukaa esgha una: ugpeqesqelluku taana ataasiq Kiyaghneghem kayagtekaa.”

³⁰ Enkaam yuget aaptekaat, “Sangwaa allaaghlluwhaghtilleq pinayaghsigu? Esghapagyaqumteggu elngaatall ugpeqnayaghamken. Sanayaghsin?

³¹ Sivuneput neghegkaagut manna‑meng kilgaani. Akuzitni Igaqegkani igaqegkaaguq whaten, ‘Qilagmeng pamaken tuunegkaqii neqekrangllameng neghesqelluki.’”

³² Jesus‑em pikii, “Ipa ungipaatamsi, qilagmeng pamaken Moses‑ngunghituq tuunikaq neqekrangllameng. Qilagmeng pamaken Atakaqa tuunikayuk neqekrangllapigmeng elpesinun.

³³ Kiyaghneghem neqekrangllaa esgha taana ataasiq ukikaq qilagmeng, tuunilghii unguvalleghmeng nunam yuganun.”

³⁴ Yuget pikaat, “Yuguniiq, iiwleng tuunikut tawatelngughmeng neqekrangllameng.”

³⁵ Jesus‑em pikii, “Whanganguuq neqekrangllaq unguvallelitikayuk. Kina taana tagilghii whangamnun allamengllu iyataghnaanghituq. Kitum taam ugpeqegkuminga allamengllu meqsugnaanghituq.

³⁶ Iwernga sivunghani ungipaatellemtun piimsi, esghaqaqaghpesinga iwernga salin ugpeqigataghpesinga.

³⁷ Kina alngunak Atam tagivaqaa tagiyaghqaaguq whangamnun. Ighsaksaghqaqenghitaqa kina alngunak tagilghii whangamnun,

³⁸ qayughllak ukikaagunga qilagmeng atuqnaluku piyukellgha Kayagtistema. Whanga piyukelqa piyaghtuunghitaqa.

³⁹ Kayagtistema ifliisunghitaanga taakuneng tagivaqamineng, talwa ataasighhaq. Itupill whangamnun unguvaghtesqesuwii kingulighmi aghneghmi.

⁴⁰ Una Atama piyukelqaa: kitum alngunak esghaghluku Ighneq ugpeqegkumigu kenlengilngughmeng unguvallengellequq. Enkaam unguvaghlleqaqa kingulighmi aghneghmi.”

⁴¹ Jews‑et ungyupghutkaat Jesus‑em whaten pillgha, “Whanga neqekrangllaguunga ukikaq qilagmeng.”

⁴² Pikat, “Jesus‑nguuq, Joseph‑em ighneqaa, liisimakagput atangallu naangallu. Sangami whaten pii, ‘Ukikaagunga qilagmeng?’”

⁴³ Iwernga Jesus‑em pikii, “Ungyupeghtegpenasi.

⁴⁴ Atanguuq kayagtikaq whangamneng. Kina alngunak taginaanghituq whangamnun wetkuqun Atam tagistekumigu whangamnun. Enkaam unguvaghlleqaqa kingulighmi aghneghmi.

⁴⁵ Uuknaliqistet igaqegkaqaat una, ‘Kiyaghneghem apeghtughyaghqaqii qamaglluki yuget.’ Tamaghhaghmi nagallghii, liillghii Atameng tagikayuguuq whangamnun.

⁴⁶ Sumeghtaghaghpenasi kitumun alngunak esghaamaniluku Ata. Kiyaghneghmeng tagikam ellnginaghhaghmi esghaqaqaa Ata.

⁴⁷ “Ipa ungipaatamsi, ellnga taana ugpeqilghii kenlengilngughmeng unguvallelguuq.

⁴⁸ Whanga neqekrangllaagunga tuunikayuk kenlengilngughmeng unguvalleghmeng.

⁴⁹ Sivunesi neghegkaagut manna‑meng kilgaani, iwernga paninang tuqulaghaatkaagut.

⁵⁰ Iwernga una neqekrangllaq ukikaq qilagmeng, kitum alngunak neghegkumigu tuqunaanghitngwaaghtuq.

⁵¹ Whanga unguvallelitikayuguunga, neqekrangllaq ukikaq qilagmeng. Kitum alngunak neghegkumigu taana neqekrangllaq, kiyaghsaghqaaguq quunperugllak. Taana neqekrangllaq kemekrakaqa, tuunaqegkegka nunam yugi unguvallengesqelluki.”

⁵² Taagken Jews‑et aaghtiiraaghusagutkat ellmeggneng. Pikat, “Naten uum yugem kemekrani tuunaqagu neghesqelluku?”

⁵³ Jesus‑em pikii, “Ipa ungipaatamsi, Ighneghan Yugem kemekraga neghyaghqaqaghsi, aawallu meghyaghqaqaghsi. Tawaten pinghilkufsi, unguvallepigitusi ilugpesini.

⁵⁴ Kitum alngunak neghegkumigu kemekraka, meghegkumigu aakwa, kenlengilngughmeng unguvallelguuq, unguvaghlleqaqallu kingulighmi aghneghmi.

⁵⁵ Kemekraka neqeghpigaaguq, aakwallu meghyaghqapiiguuq.

⁵⁶ Kitum alngunak neghegkumigu kemekraka, meghegkumigu aakwa, kiyaghtengnguuq whangamni, whanga kiyaghtengnguunga ellngan ilungani.

⁵⁷ Atam unguvastikayugem kayagtekaqaanga, whangallu unguvastaqaanga. Enkaam kitum alngunak neghegkuminga unguvallequq whanga apalluqlunga.

⁵⁸ Sivunemta neghegkiistun neqekrangllastun ayuqenghitunga. Neghegkaagut neqekrangllameng iwernga paninang tuqulaghaatkaagut. Neqekrangllaagunga ukikaq qilagmeng. Kina alngunak neghegkumi taagken neqekrangllameng kiyaghsaghqaaguq quunperugllak.”

⁵⁹ Jesus‑em tamaana qamaglluku aapqaa apeghtughinguluni synagogue‑ngani Capernaum‑em.

Apeghtuusaa Kenlengilnguum Unguvallghem

⁶⁰ Jesus‑em maligsaaghtengita nagalluku allulluteng pikat, “Una apeghtuusaq piyaqnapigtuq, kitumngam tuguklighlleqagu?”

⁶¹ Ungipaatestengngunani Jesus‑em liisimakegkangi maligsaaghteni ungyupghullghiit tawaten, enkaam pikii, “Taam apeghtullghem iilqayugtestisii?

⁶² Samengꞌngam pinayaghetsi esghaghyaqufsigu Ighnegha Yugem mayulghii neksaqeminun sivunghani?

⁶³ Taghneghak unguvallelitikayuguuk, iwernga yuuk unguvallelitinaanghituq. Akuzitenka elpesinun taghneghaagutlu unguvallghuutlu.

⁶⁴ Iwernga ilagpesi ugpeqigatiit akuzitenka.” (Jesus‑em liisimakegkangi kinkut ugpeqinghilnguut. Liisimakegkangi ima piinlighyuwhaalleghmeng. Talwa liisimakegkanga kinangutanga uveghpagutiyaghqaq ellmineng.)

⁶⁵ Jesus‑em pikii, “Ilagpesi ugpeqinghitellgha apalluqluku whaten pikaagunga, ‘Atam tagisneghilkumigu yuuk whangamnun, taginaanghitngwaaghtuq.’”

⁶⁶ Kingunganeng Jesus‑em tawaten pillghan uglapiglleghhiim maligsaaghtengan unitkaa maligsaaghnaniqaat.

⁶⁷ Jesus‑em aaptekii qula maalghuk siipneqluku maligsaaghtet, “Elpesillu aghulaqsugetsii?”

⁶⁸ Simon Peter‑em kiimsiqaa, “Ataneq, kitumunꞌngam pilleqesta? Elpek akuzitegpek aapghaqaa naten allgeghutelleghqaq kenlengilngughmeng unguvalleghmeng.

⁶⁹ Whangkuta ugpeqamken, liitkaqamken elpek Agleghnalghiikaaten Kiyaghneghem.”

⁷⁰ Taagken Jesus‑em pikii, “Nakmikegkaqaqa qula maalghuk siipneqluku maligsaaghtekaghqaq, elpesinguut. Iwernga nalighsi ataasiq tughneghaaguq.”

⁷¹ Jesus‑em akuzitkengngukanga Judas, ighnegha Simon Iscariot‑em qayughllak taakwaningani uveghpagusaghqaqegkanga. Judas ilakegkangat taakut qula maalghuk siipngalghiit maligsaaghtet.