John 5 - New Testament-et Akuzipigestun

Naallghutilleq Naayvaghaaghmi

¹ Taam kingunganeng Jesus, Jerusalem‑etkaq Jews‑et neqenghaghqellghitnun.

² Taawanguq Jerusalem‑emi, Sheep Gate‑em tungangani naayvaghaaq tallimaneng porch‑elek, Hebrew‑stun atillgha Bethesda.

³ Uglapiglleghhii qinuyuk ingaghmetullghii porch‑eni, ayaakat, piyugigalnguut, uniiqat. (Pagughrugughhneghsighaqegkangat meq ateghyuwhaaghnaluteng.

⁴ Ilangani aghneghem, yaqulga Atanghem ateneghmini naayvaghaaghmun pagughrugughtestaqegkanga meq. Enkaam kina ateghyuwhaalghii meghmun naallghutaqelghii sameng alngunak aqnighneghmineng.)

⁵ Taawanguq yuuk qinuyugngalghii 38 ayumiqulleghni.

⁶ Jesus‑em esghaqaa. Liisimakegkaa qavngarugllak ima qinuyukaq enkaam aaptekaa, “Naallghusugsiin?”

⁷ Qinuyulghiim kiimsiqaa, “Yuguniiq, meq pagughrugughhneghani kayutkaghqiitaqunga. Ateghnaqutkaqsaghtunga ima kitum ingyaghaghtaqaanga.”

⁸ Jesus‑em pikaa, “Nekevi, allighan tuguluku piyugi.”

⁹ Tawaninginaq yuuk naallghulluni, allighani tuguluku piyukaq. Sabbath‑ngulghii tawani aghneghmi.

¹⁰ Tamaaken apalluqluku Jews‑et igleghutistengita pikaat naallghutkaq yuuk, “Aghneghmi Sabbath‑nguuq, Liilightuusamnni allighan igleghusaghqaqenghisaghan Sabbath‑mi.”

¹¹ Pikii, “Yugem naallghutistema piinga, ‘Allighan tuguluku piyugi.’”

¹² Aaptekaat, “Kitum naallghulluten allighan tuguluku piyugesqaten?”

¹³ Iwernga yugem nallukegkaa naallghutisteni kinangutanga, qayughllak uglapiglleghii yuuk tawanlenguq, Jesus‑llu esghaghtengngunani iqitkaalghii.

¹⁴ Aghneghmi taakwani Temple‑mi, Jesus‑em nallaqaa taana yuuk naallghutkani, pikaa, “Uyuq, naallghusimaaten. Seghleghqennanii luuraq sangwaa seghleghataghalghii ikfiqutkennayukavgu seghleghqumanginaquvek.”

¹⁵ Taagken yugem ungipaasaghtuqii Jews‑et igleghutistengit Jesus‑nguniluku naallghutisteni.

¹⁶ Taagken kenlanga Jews‑et igleghutistengita seghletun piyagutkaat Jesus, Sabbath‑mi naallghutillghaneng apalluqluku.

¹⁷ Iwernga Jesus‑em pikii, “Ataka quunpeng qepghaaguq, whangallu qepghaghyaghqaagunga.”

¹⁸ Enkaam Jews‑et igleghutistengita wataqaaghaq tuqusukaat. Pikat, “Jesus‑em Sabbath‑em Liilightuusaa naafqinaghpenaan pikaaguqlu Kiyaghneq Atakniluku. Tawaten akuzilleghmikun Kiyaghneghtungwaaq ayuqniluni piiquq.”

Jesus‑em Aghtughyaghqaanghillgha

¹⁹ Iwernga Jesus‑em pikii, “Ipa piimsi, Ighneq ellnginaghmi sayaghqaanghituq, Atamineng esghapakaghhiinani piiqaa. Atami pillghatun piiquq.

²⁰ Atam piniqaa Ighneni, enkaam kelguvikaqaa sameng tamaghhaaneng salleghmineng. Iwernga taakuneng aangataghalghiineng kelguviksaghqaqaa saghiighayugesqellusi.

²¹ Atam unguvaghtesluki tuqukat unguvallelitaqii, enkaam tawateghpigaq Ighneq unguvallelitikayuguuq piyukegkaminun.

²² Ata nanqigtingigatuq kitumeng alngunak. Iwernga aghtughyaghqaanghillelitkaqaa Ighneni qamaglluku nanqigtilleq ellnganun pisqelluku.

²³ Kiyaghneghem tawaten pikaqaa Ighneni tamaghhaanun quulviisqelluku katam tawaten quulvallghistun Ata. Kitum taam quulviigalkumigu Ighneq quulviigataa Ata kayagtikaq Ighneghmeng.

²⁴ “Ipa piimsi, kitum nagaskumiki akuzitenka, ugpeqegkumigullu kayagtisteka, kenlengilngughmeng unguvallelguuq. Nanqigtellengnaanghituq aghyuughyaghqaaluni qayughllak tuqumeng unguvalleghmun lliiqaaguq.

²⁵ Ipa piimsi, pilleghqaq uka taginguuq, whaa kaasimaaq, tuqukat nagaqughlleqaat menga Ighneghan Kiyaghneghem. Tamaakut nagaquullghiit unguvallequt,

²⁶ qayughllak Ata unguvallghuuq, enkaam unguvalleq ellnganeng pinguuq. Tawateghpigaq Ighnegha unguvallghuuq, qayughllak Atam tawatetestekanga.

²⁷ Aghtughyaghqaanghillelitkaqaallu Ighneni nanqigtilleghmun qayughllak Ighneqegkanga Yugem.

²⁸ “Saghiighayagutegpenaan una: pilleghqaq taginguuq qamaglluteng tuqukat lliveghmelnguut nagaqughluku menga,

²⁹ aanleghaasaghqaagut lliveghmeggneng. Tamaakut pinitun pikat unguvaghtesaghqaagut unguvalleghmun. Iwernga tamaakut seghletun pikat unguvaghtesaghqaagut nanqigtelleghmun aghyuughyaghqaaluteng.

Aapghistengi Jesus‑em

³⁰ “Nanqigsigataqa kina alngunak sivukluku aaptellngunaan Ata. Enkaam nanqigtiiqunga ellngan pisqellghinaghhaatun. Nanqigtilqa elqughutngaaq, qayughllak nanqigtiiqunga Atam kayagtikam whangamneng piyukellghatun. Whanga piyukellemtun pingigatunga.

³¹ “Aapquma whangamneng, yuget ugpeqnaanghitiit akuzitenka, wetkuqun kitum alla aapqanganga.

³² Iwernga kitum aapghaqaanga tawaten, liisimakanka aapqii ipanguut qayughllak aapghisteka Atakaqa.

³³ Elpesi yuget kayagtekaqasi John‑mun, apellghi whangamneng ipanguut.

³⁴ Yuget apenghisaghngaaghmegtengnga, iwernga tawaten piinga elpesi yugulillengesqellusi.

³⁵ John kenelghutastun kumangayaghtuqlu kuukgutngayaghtuqlu. Akuzitangi nighugestun ayuqsaghtut enkaam elpesi natengiighhaq akuzitangakun quyastesukaagusi.

³⁶ John‑em akuzitangan liitestekaqaanga yugnun. Iwernga wataqaaghaq John‑em akuzitanganeng qepghalleghma liitestaghaghaanga yugnun. Qepghaghanka Atama pisqegkii enkaam qepghalleghma liitestaa yugnun Atamnun kayagtekaqnilunga.

³⁷ Kayagtikam whangamneng, Atam ellmineng katam aapghwaa ipapighqelleq whangamneng ayuqelghii. Nagaqiigatngwaaghaghsi menga, esghiigatngwaaghaghsi natetulanga,

³⁸ tugukliigatasillu akuzitangi, qayughllak ugpeqigataghsi Atam kayagtekaa.

³⁹ Ivaghivikaqasi Akuzitet Igaqegkat, qayughllak sumeghpesini kenlengilngughmeng unguvallengviknaluki piiqasi. Taakusta ataasit Akuzitet Igaqegkat aapghilghiit whangamneng.

⁴⁰ Naqam whangamnun tagiyugigatusi unguvallelitesqellusi.

⁴¹ “Yugnun usuqesunghitunga.

⁴² Liisimakamsi elpesi, piniqellghitusi ilugpesini Kiyaghneghmun.

⁴³ Atama kayagtekaqaanga akuzistengulunga ellminun, iwernga elpesi tugukliigataghpesinga. Naqam kina tagiluni ellminun katam akuzilghii tuguklighaqluku.

⁴⁴ Natenꞌngam ugpeqelleqesteggu tagikaatka Kiyaghneghmeng usuqesugukufsi ilagpesinun, naqam taananginaghhaam Kiyaghneghem usuqelleghqaa avelghaghluku?

⁴⁵ Sumeghtaghaghpenasi apeghlleqniluku anaggutelleghsi Atamun. Moses‑nguuq aapghiyaghqaq anaggutelleghpesineng qaywa sighimaksaghngaaghpesigu yugulisqellusi.

⁴⁶ Moses ipa ugpequmakufsigu ugpeqnayaghaghpesinga qayughllak igaqegkaqaanga igatgun.

⁴⁷ Enkaam Moses‑em igaqegkii ugpeqigalkufsiki, natenꞌngam ugpeqelleqesteki akuzitenka?”