John 4 - New Testament-et Akuzipigestun

Jesus‑llu Aghnaqlu Samaria‑ghmii

¹ Pharisees‑et nagaquumakangat palaghhaaghhniluki yuget tagilaghaallghiit John‑mun, naqam nulaniluki tagilaghaallghiit Jesus‑mun maligsaaghtengunalutengllu, paaptaayesqellutengllu.

² (Iwernga Jesus‑em ellngan katam paaptaayelanghilkangi, malighsaaghtengita paaptaayelaqangit.)

³ Atanghem liigiksamiki Pharisees‑enun taana nagaquumaniluku, aghulaqluni Judea‑meng Galilee‑nneqigtekaq.

⁴ Tuumkaghqaanilnguq Samaria.

⁵ Kaatkaq Sychar‑mun, Samaria‑melngughmun uyavantepagllagunghilnguq piitesiighaghvigmeng Jacob‑em tuunegkaaneng ighneghminun Joseph‑mun.

⁶ Jacob‑emllu meghtaghviga tawanlenguq. Jesus igleghteghllagem meghnulghii enkaam aqumegkaq saaghwakun meghtaghvigem, aghneghem qukaani.

^7-8 Maligsaaghtengi Sychar‑mun neqengyaghtuqaalghiit. Taagken Samaria‑ghmii aghnaq, Sychar‑meng meghtaqaq. Jesus‑em pikaa, “Meghsiightinga.”

⁹ Aghnam pikaa, “Jew‑nguuten, whanga Samaria‑ghmiinguunga, sangavek whangamnun meghsisqesin?” (Tawaten pikaqegkanga qayughllak Jews‑et talwa aleghqughyaghqaqenghilkangit Samaria‑ghmiit.)

¹⁰ Jesus‑em kiimsiqaa, “Huuk, liisimaksaquvgu Kiyaghneghem tuunyaghqaa, liisimaksaquvgullu kinangutanga meghsingllalghii elpenun, meghsingllaghviknayaghan unguvallengestikayugmeng meghmeng.”

¹¹ Aghnam pikaa, “Yuguniiq, meghtaghvik uusqapigtuq, talwa qaltiituten. Nakenꞌngam unguvallengestikayugmeng mengelleqsin?

¹² Sivunemta Jacob‑em tuunegkaqaa una meghtaghvik whangkunnun. Ellngallu, ighneghillu, teghikusiillu qamaglluteng meghegkaagut taagken. Aangwaaghuniluten Jacob‑meng pinguziin?”

¹³ Jesus‑em kiimsiqaa, “Kina alngunak meghelghii whaken meghmeng alla meqsugyaghqaaguq.

¹⁴ Meq whanga tuunyaghqaqa kitum alngunak meghegkumigu allamengllu meqsugnaanghituq. Meq tuunyaghqaqa ellnganun tawaten lliighyaghqaaguq sengngulghiistun, tevughalghii ellngan ilunganeng. Taana meq kenlengilngughmeng unguvallengusighqaqaa.”

¹⁵ Aghnam pikaa, “Yuguniiq, taagken meghmeng meghsinga enkaam alla meqsunghillanga, talwa whavek meghtaghnanighlanga.”

¹⁶ Jesus‑em pikaa, “Ugin aqfagu enkaam tagilghaaten.”

¹⁷ Aghnam pikaa, “Ugingitunga.” Jesus‑em pikaa, “Ipa uginginniiten.

¹⁸ Ugikegkaqaten tallimat yuget. Maaten taana yuuk kiyaghfigen ugikenghitan. Ungipaataghpenga ipapigmeng.”

¹⁹ Aghnam pikaa, “Yuguniiq, taawa liigikamken uuknaliqistenguftuten.

²⁰ Sivuneghma maniguqaqaat Kiyaghneq whani naayghami, iwernga elpesi Jews‑eni Jerusalem‑nguniiqaghsi maniiguutfigkaq Kiyaghneghmun.”

²¹ Jesus‑em pikaa, “Aghnami whani, ugpeqinga, taakwaningani yuget manigughnanighlleqaat Ata whani naayghami talwa Jerusalem‑emi.

²² Elpesi Samaria‑ghmiini talwa nallukaghsi kinangutanga maniguqaghsi. Whangkuta Jews‑eni liisimakaghput kinangutanga maniguqaghput, qayughllak Jews‑etgun Kiyaghneghem akequsaqegkaqaa yugulilleq.

²³ Iwernga pilleghqaq uka taginguuq, aaqun kaalluni ayuquq maniguutepikayuget manigughlleqaat Ata Taghneghagnekunllu ipalleghqunllu. Tawatelnguut maniguutkayuget Atam maniguutesugaqii ellminun.

²⁴ Kiyaghneq Taghneghaaguq, tamaakut maniguullghiit ellnganun manigughyaghqaqaat Taghneghagnekunllu ipalleghqunllu.”

²⁵ Aghnam pikaa, “Liisimakaqa Messiah tagillequq, atilqelghii Christ‑ameng. Tagikumi ungipaalleqiinkut sameng tamaghhaaneng.”

²⁶ Jesus‑em pikaa, “Whanga taananguunga aleghquqen.”

²⁷ Whaallu Jesus‑em maligsaaghtengi uteghniqat. Esghaghlukek Jesus‑enkuk aghnaankuk aleghquullghiik elngaatall saghiighayagutkagket. Iwernga nalighhiiniita pimangilkangat aghnaq, “Sameng pizin?” Nalighmeng Jesus aapsimangilkangat, “Sangan aghnaq aleghqughsigu?”

²⁸ Taagken aghnam melghutagni unillukek, Sychar‑mun aglaghluni yuget pikii,

²⁹ “Esghaghyaghtuqaghtegguqun meghtaghvigmelnguq yuuk. Sallemneng tamaghhaaneng ungipaataanga. Qaa Christ‑anguuq?”

³⁰ Enkaam yuget taagken nemeng esghaghyaghtuutkaat Jesus.

³¹ Salin kaatellghilluki maligsaaghtengita Jesus piighaataqaat, “Apeghtughista, sangiighhaghmeng neqaa.”

³² Iwernga pikii, “Whanga neqelguunga neghyaghqameng elpesi nallukngwaaqaghpesineng.”

³³ Maligsaaghtet ellmeggneng aapqughaaghutkat, “Qaa kitum neqmeng tagisimaa?”

³⁴ Jesus‑em pikii, “Neqeka qaatkutellghuuq kayagtikameng whangamneng, apeghiighesqellukullu qepghaqaq tagivaqani whangamnun.

³⁵ Nagataqasi yuget pilghiit, ‘Taagken piitesighalleghmeng estamat tanqit atughluki, unatalleghqaq kaataquq.’ Ungipaataghllamsi, yuvghiighwaaqaghtekiqun piitesiighaghviget, tamaakut piitkat unataghyaghqaaghtut.

³⁶ Yuuk unatalghii wheat‑meng akileghtuusangyaghqaaguq qepghaqaminun, enkaam quyayaghqaaguq maligulluni piitesiighaqamun. Tawateghpigaq yugem ungipalleghmikun kenlengilngughmeng unguvallengestekumiki akileghtuusangyaghqaaguq. Taanallu quyayaghqaaguq maligulluni ungipaqiyuwhaaqanun whangamneng.

³⁷ Taana akuzilleq ipanguuq, ‘Ataasiq yuuk piitesiighaghaquq, ilanga yuuk unataghaquq.’

³⁸ Kayagtekaqamsi unatiisqellusi piitesighaghvigmi piitesighaamangilkegpesineng. Ilangit piitesiighaqaagut, iwernga elpesi unataqayuguusi piitestekiitneng, enkaam elpesillu akileghtuusangellequsi qepghaqiitneng.”

³⁹ Sychar‑mi, Samaria‑ghmiilghutet ugpeqegkaat Jesus qayughllak aghnam ungipaatkaqegkangi, “Taam yugem ungipaataanga sallemneng tamaghhaaneng.”

⁴⁰ Samaria‑ghmiit kaalluku Jesus ellmeggnitesqegkaat. Jesus tamaantekaq maalghuk aghneghek,

⁴¹ enkaam wata ugpeghtuutkat akuzitangi nagalluki.

⁴² Taana aghnaq pikaat, “Nagasuwhaaghaqngamken ugpeqegkaqaput akuziteten. Iwernga maaten whangkunneng katam nagalluku liitaghput taana yuuk ipa yugulighistekeftaa nunam yugan.”

Jesus‑em Naallghuskanga Umiilwaaghem Ighnegha

⁴³ Maalghuk aghneghek atughlukek, Jesus Sychar‑meng aghulaqegkaq Galilee‑mun.

⁴⁴ (Jesus ellmineng katam pikaalghii, “Uuknaliqista nunalgutangan tugukliigataat uuknaliqistenguluku.”)

⁴⁵ Kaasan Galilee‑mun, yuget tugukliqaat qayughllak esghapakaqegkangat sallgha qamaglluku Jerusalem‑emi, Passover‑mun neqenghaghqengnguluteng.

⁴⁶ Enkaam Jesus aglanqigtekaq Cana‑mun, Galilee‑melngughmun, meq wine‑ngughtestefigminun. Taawanguq kavemem umiilwaagha, Capernaum‑emi ighnegha qinuyugllak.

⁴⁷ Nagaqughyamigu Jesus tagimaniluku Judea‑meng, Galilee‑mun takuluku maniiguutkaq naallghusaghtuqiisqelluku ighneni tuquyaghtungestalghii.

⁴⁸ Jesus‑em pikaa, “Ugpeqinaanghitusi wetkuqun esghapakufsiki aangelghiit allaaghlluwhaghtillghet.”

⁴⁹ Umiilwaaghem pikaa, “Yuguniiq, maligtinga taghnughhaqa tuquvagilgan.”

⁵⁰ Jesus‑em pikaa, “Aglaa, ighneghen unguvallequq.” Yugem ugpeqegkii Jesus‑em akuzitangi enkaam aglaqaq.

⁵¹ Tumangani taakwani qepghaghtengita nallaghluku ungipaatkaat, “Ighneghen piniighsimaaq.”

⁵² Aaptekii naniklaagmi piniighsimatanga. Pikaat, “Ighivgaq one‑eklaagmi puqleghangiitkaaguq.”

⁵³ Atangan liisimakegkanga tawani aflumi Jesus‑em pikaqegkanga, “Ighneghen unguvallequq.” Enkaangam nengllugutkullghiit ugpeghtuutkat.

⁵⁴ Taana tuungliqegkanga Jesus‑em allaaghlluwhaghtillghan tagiluni Judea‑meng Galilee‑mun.