John 3 - New Testament-et Akuzipigestun

Jesus‑enkuk Nicodemus‑enkuk

¹ Taawanguq yuuk aatghha Nicodemus, Pharisee Jews‑et igleghutistengat.

² Unugyagu Jesus‑mun aglaghluni pikaa, “Rabbi, whangkuta liisimakamken apeghtughistenguuten kayagtekaa Kiyaghneghem. Kina alngunak allaaghlluwhaghtinaanghituq elpetun tawaten wetkuqun Kiyaghneq ellnganiskan.”

³ Jesus‑em pikaa, “Ipa ungipaatamken, kitum alngunak esghaghnaanghitaa Ataneghpagullgha Kiyaghneghem wetkuqun allgenqigtekumi.”

⁴ Nicodemus‑em aaptekaa, “Natenꞌngam anglikaq yuuk allgenqiglleqa? Ipapestaaq iteghnaanghituq naami qantagkenun allgenqiggnaluni.”

⁵ Jesus‑em kiimsiqaa, “Ipa piimken, kina alngunak iteghnaanghituq Ataneghpagullghanun Kiyaghneghem wetkuqun allgenqigtekumi meghqunllu, Taghneghagnekunllu.

⁶ Tamaana kemegkun allgeqaq kemguuq, iwernga tamaana taghneghagnekun allgeqaq taghneghaaquq.

⁷ Saghiighayugpenang qayughllak ungipaaskemken, ‘Elpesi allgenqigsaghqapestaaghuusi.’

⁸ Anuqa naken alngunak piiquq, nagataqan sulugtallgha, iwernga nallukngwaaghan naken piiqutangallu naveklu piiqutanga. Tawateghpigaq ayuquq tamaghhaghmi allgelghii Taghneghagnekun.”

⁹ Nicodemus‑em aaptekaa, “Natenꞌngam taana piyaghqaawa?”

¹⁰ Jesus‑em kiimsiqaa, “Elpek apeghtughistelgaghlluten Israel‑eghmiinun, paninang nalluksiguu taana?

¹¹ Ipa piimken, akuzitkaqaghput liisimakegkaghput, aapghaqaghput esghaqaghput, paninang nalighhiinaghpesi ugpeqigataa ungipaghput.

¹² Aapghaqanka elpesinun nunam pingi iwernga ugpeqigataghpesinga, natenꞌngam ugpeqelleqesteki aapqumki qilagem pingi?

¹³ Kina alngunak mayiigatuq qilagmun iwerngaqun Ighnegha Yugem ukikaq qilagmeng.”

¹⁴ Kilgaani katam Moses‑em napaghtellghatun napaqakun bronze‑a nemeghyaq, tawateghpigaq Ighnegha Yugem napaghsaghqaalghii.

¹⁵ Enkaam kina alngunak ugpeqilghii ellnganeng kenlengilngughmeng unguvallelgullequq.

¹⁶ Kiyaghneghem piniqepigtutmineng nunam yuga tuunegkaa kezemaghhaq Ighneni. Ighnegha kitum alngunak ugpeqegkumigu tuqunaanghituq, iwernga allgeghlleqaa kenlengilnguq unguvalleq.

¹⁷ Kiyaghneghem kayagsimangitaa Ighneni nunamun aghyuughisqelluku nunam yuganeng, kayagtekaqaa yugulighistenguluku yugnun.

¹⁸ Kina alngunak ugpeqilghii Ighneghmeng aghyuullengnaanghituq. Kina alngunak ugpeqinghilnguq nanqigtengngwaaqaaguq aghyuughyaghqaaluni, qayughllak ugpeqenghilkanga kezemaghhaq Ighnegha Kiyaghneghem.

¹⁹ Esgha una apallaa Kiyaghneghem aghyuughisighqaa yugnun: nighuk tagikaayaghngaan nunamun, yuget piniqataghaqaat mamlek nighugmeng qayughllak seghletun piiqelghiit.

²⁰ Kitum alngunak seghletun pikayugem ugumikaa nighuk, enkaam taginaanghituq nighugmun seghletun pilleni esghaghnayukatki.

²¹ Iwernga kina alngunak ipapighqelluni pikayuk tagiyaghqaaguq nighugmun, esghiisqelluku qepghaqani Kiyaghneghem piyukellghakun ayuqelghii.

Jesus‑enkuk Paaptaayestallu John

²² Kingunganeng taam Jesus‑enkut maligsaaghtekullghiit aglaqat Judea‑mun. Maligsaaghteminun maligulluni tamaantutkelluku paaptaayekii yuget.

²³ John‑llu paaptaayeghingulghii Aenon‑mi, Salim‑emeng qantaghanlengughmi, qayughllak meghllagulghii tamaana. Yuget tagilaghaatngulghiit ellnganun paaptaayesqelluteng.

²⁴ (John salin anusimingllaghvigmun kanaghtellghilnguq.)

²⁵ Ilangita John‑em maligsaaghtengita aaghtiiraaqaat ataasiq Jew ukmangighsalleghmeng Moses‑em Liilightuusaanilngughmeng.

²⁶ Enkaam aglaghluteng John‑mun ungipaatkaat, “Apeghtughista, neqamikenghisiguu yuuk elpenitkaq inglungani Jordan‑em, akuzitkegkan? Whaa maaten paaptaayeghiiquq, enkaam qamaglluteng yuget aglaghtuutnguut ellnganun.”

²⁷ John‑em kiimsiqii, “Kina alngunak allgeghunnaanghituq sameng wetkuqun Kiyaghneghem tuunegkumigu.

²⁸ Elpesi liisimakistekamsi whaten piiqngama, ‘Whanga Christ‑angunghitunga iwernga kayagtekaagunga sivungani.’

²⁹ Ugiighnaqelghii ugikaghqaan ellngan pikaa. Nulightughnaqelghiim ilakumtaagha, kayutanga utaqiigaquq nagasugnimaghmi menganeng. Ilakumtaaghan nagaquneghminigu menga quyaghllagaquq. Tawateghpigaq whangallu quyalqa iighwightuq.

³⁰ Ellnga megnunaghataghaghnaqnguuq, whanga ukavaghnaqnguunga.”

Ukikaq Qilagmeng

³¹ Ellnga taana pamakaghtaq aangeghllagtuq tamaghhaghllaganeng. Ellnga taana nunameng pi, nunam pikaa enkaam akuzikayuguuq nunam pinganeng. Ellnga taana qilagmeng pi, quliiguq tamaghaghllaganeng.

³² Aapghaqaa esghaqanillu nagaquqanillu iwernga kitum alngunak ugpeqigatii akuzitangi.

³³ Kitum alngunak ugpeqegkumiki akuzitangi, tawaten pilleghmikun ipapighqaqaa Kiyaghneq ipangutanga.

³⁴ Taam Kiyaghneghem kayagtekaan atuqaqii Kiyaghneghem akuzitangi, qayughllak Kiyaghneghem Taghneghagni tuunꞌngukek ellnganun iingunalkighllukek.

³⁵ Atam piniqepigtaa Ighneq, enkaam aghtughyaghqaanghillelitkaqaa samun tamaghhaanun.

³⁶ Kina alngunak ugpelghii Ighneghqun, kenlengilngughmeng unguvallelguuq. Kitum alngunak qaatkenghilkumigu Ighneq unguvallengeqeghhnaanghituq, taawanginaq Kiyaghneghem aghyuullghanisaghqaaguq quunpeng.