John 21 - New Testament-et Akuzipigestun

Jesus Esghaghteslaataqaq Ilangitnun Maligsaaghteminun

¹ Taakwaningani Jesus esghaghteslaataqaq maligsaaghteminun Naayvami Tiberias‑mi. Whaten esghaghtestekaaguq.

² Ilanginguq maligsaaghtem qerngaghmetkat naayvami. Simon Peter‑enkunguftut, Thomas‑enkut (aatghan aallgha Malghi), Nathanael‑enkut, Cana‑meng pi Galilee‑melngughmeng, Zebedee‑mllu ighneghqek, alla maalghuk maligsaaghtek.

³ Simon Peter‑em pikii, “Iqalliniighyaghnaqunga.” Pikaat, “Maliggnaqamken”. Enkaam angyakun kelluteng unulqusiq iqalluggnaqutkegkaayalghiit, iwernga pikengumangitkat.

⁴ Aghtaghaghaqaallu maligsaaghtet esghaqaat Jesus nekevghalghii esnemi, iwernga kinangutanga nallukegkangat.

⁵ Jesus‑em pikii, “Ilakumtaamni, iqalluggneghitsii?” Kiimsiqaat, “Nakaa”.

⁶ Pikii, “Ateghteggu negaghpagsi angyaghpesi aghenqigneghakun, enkaam pikengellequsi.” Pisqellghatun pikat. Naapqaghighllakat repall negaghpak qaakneghmeng aghtuqaat angyamun.

⁷ Maligsaaghtem Jesus‑em piniqegkaan pikaa Peter, “Atanghuuq!” Simon Peter‑em nagaqughyamigu pilugugluni qetgeqaq meghmun. (Peter amsikaghtekaayalghii qepghaghnaluni.)

⁸ Maligsaaghtet angyamelnguut esnamun qamuqaat naapqaghiighngalghii negaghpak. Awavantepanghilnguut quutmeng, entaqun 100 yards uyatutkalghiit.

⁹ Maligsaaghtet uuglleghaasalghiimeng quutmun esghaqagket aniighwtekak kenghek, iqallugmeng ugkelgek. Taawallu neqekrangllalguftuq.

¹⁰ Jesus‑em pikii, “Tagitek iqallugtaghpesineng.”

¹¹ Enkaam Simon Peter angyamun uuglluni sayukaa negaghpak quutmun. Taawanguq 153‑nguftut iqallugpaghqughllaget naaptekat, naqamllu negaghpak piigumangilnguq.

¹² Jesus‑em pikii, “Neghyaghtughtek.” Nalighhiiniita maligsaaghtet aapneghmeng tetukaat kinangutanga, liisimakluku Atanghutanga.

¹³ Jesus‑em tuguluku neqekrangllaq tunquqaa ellngitnun, iqallugetlu tawaten pikii.

¹⁴ Taana pingayiitkegkanga Jesus‑em esghaghtestellgha maligsaaghteminun, unguvaghtestelleghmi kingunganeng.

Jesus Peter‑mun Apeghtuutkesqelghii Ugpeqanun

¹⁵ Taaqsameng neneghmeng Jesus‑em aaptekaa Simon Peter, “Simon, ighnegha John‑em, piniqataghaghsingaa ukuneng?” Kiimsiqaa, “Aa‑a Ataneq, liisimakaghpenga piniqegkemken.” Jesus‑em pikaa, “Neghqiki penniighaghaanka.”

¹⁶ Alla Jesus‑em aaptekaa, “Simon, ighnegha John‑em, piniqsingaa?” Kiimsiqaa, “Aa‑a Ataneq, liisimakaghpenga piniqegkemken.” Jesus‑em pikaa, “Aflengakiki penniighenka.”

¹⁷ Pingayiitkun aaptekaa, “Simon, ighnegha John‑em, piniqsingaa?” Peter seghleghyukaq, qayughllak Jesus‑em pingayuneng aaptekanga, “Piniqsingaa?” Peter‑em kiimsiqaa, “Ataneq, liisimakan sangwaa qamaglluku. Liisimakaghpenga piniqegkemken.” Jesus‑em pikaa, “Neghqiki penniighenka.

¹⁸ Ipa ungipaatamken, nukalpigaaluten elpeneng tafsiluten navek piyukelleghpenun piiquten. Iwernga nanevgaquvek, iiggeten kevegluki, kitum tafsiluten aglaalleqaaten takuyukegkaqenghilkegpenun.”

¹⁹ Tawaten pilleghmikun Jesus‑em ungipaatnguftaa Peter naten tuquyaghqaatanga, enkaam tuqulleghmikun quulvaghyaghqaa Kiyaghneq. Taagken Jesus‑em pikaa Peter, “Maligtinga.”

Jesus‑llu Ilangallu Maligsaaghta

²⁰ Peter‑em qiivluni esghaqaa maligsaaghta Jesus‑em piniqegkaa maligullghii. (Taananguuq maligsaaghta ayaqightekaq Jesus‑kun neghuutnguluteng aaptikaq, “Ataneq, kitum uveghpagunnaqaten?”)

²¹ Peter‑em esghaghluku taana maligsaaghta, aaptekaa Jesus, “Ataneq, ellngangam salleqa?”

²² Jesus‑em kiimsiqaa, “Kiyaghtesukumkun kenlanga tagillemnun, agghitkesaghqaqenghitan elpek. Maligtengnginaghnga.”

²³ Enkaam ugpeqani ungipaq mingitkaq, taana maligsaaghta tuqunaanghinniluku. Iwernga Jesus‑em pimangitaa tuqunaanghinniluku. Whaten pikaaguq, “Kiyaghtesukumkun kenlanga tagillemnun, agghitkesaghqaqenghitan elpek.”

²⁴ Ellnganguuq maligsaaghta aapghiiqelghii tamaaken pilleghneng, igaquqaqiillu tamaakut. Liisimakaput aapqii ipanguut.

²⁵ Uglaapigtut igaqullghilnguut Jesus‑em pikii. Igaquqaayaqumeng qamaglluteng sumemni entaqun iingunaghmi nuna llivigiinnayaghaa igalghuteghllagnun.