John 20 - New Testament-et Akuzipigestun

Imiilnguq Lliveq

¹ Sivulighmi aghneghani santillghem, Mary Magdala‑ghmii lliveghtekaq salin mamlegluku. Esghaqaa uyghagrugllak iqilluni lliivghem paaynganeng.

² Enkaam ketanqusnaq aglaqaq Simon Peter‑munllu ilanganunllu maligsaaghtemun, Jesus‑em piniqegkaanun. Mary‑m pikakek, “Nuugsimaat Ataneq lliivghaneng. Nallukaghput navek llimatanga.”

³ Enkaam Peter‑enkuk aallghallu maligsaaghta lliveghtekak

⁴ ketanqusnaq. Aallgha Peter‑meng sukalnguq, enkaam sivukluni kaatkaq.

⁵ Guughlluni qineghsalghiimi esghaqii qiipaghaat, iwernga iitghumangilnguq.

⁶ Kingungiighhaaneng Simon Peter kaalluni iitqaq lliveghmun, esghaqii qiipaghaat tawani.

⁷ Esghaqaallu allakaghmi qiipaghaq Jesus‑em naasqwakun iimgutngayalghii.

⁸ Taagken aallgha maligsaaghta kaasuwhaaqaq lliveghmun iitqaq. Esghaghyamigu ugpeqegkaa Jesus.

⁹ Salin esghallghilluki liigikumangitkangak Akuzitnilnguq Igaqegkaq unguvapestaaghyaghqaaniluku tuqulleghmeng.

¹⁰ Taagken maligsaaghtek aglaqak nemegnun.

Jesus‑em Aliighvikegkanga Mary Magdala‑ghmii

¹¹ Iwernga lliveghmi Mary qiyiqegkaq. Qiyanqusiin guughlluni ilutmun qineghsalghiimi,

¹² esghaqakek maalghuk yaqulgek atkuyaalgek qatelghiimeng. Aqumgaftuk Jesus‑em yugusiin lliviksaqangakun, aallgha naasqwan nengakun, ilanga itegaan nengakun.

¹³ Aaptekaak, “Aghnaq, sangavek qiyaaqsin?” Kiimsiqakek, “Nuugsimaat Atanqa. Nallukaqa navek llimatangat.”

¹⁴ Mary tawaten piluni qiivutkelluku esghaqaa Jesus nekevghalghii, iwernga nallukegkaa Jesus‑ngutanga.

¹⁵ Jesus‑em aaptekaa, “Aghnaq, sangavek qiyaaqsin? Kina ivaghaqsigu?” Mary‑m piitesighaghtenguniluku pikaqsaqanga, enkaam pikaa, “Yuguniiq, nusugumakuvgu ungipaatinga navek llimaten, enkaam aqfalleqaqa.”

¹⁶ Jesus‑em pikaa, “Mary”. Mary‑m qiivluku pikaa Hebrew‑stun, “Rabboni”. (Whaten pisiq, “Apeghtughista”.)

¹⁷ Jesus‑em pikaa, “Saaftegpenanga, salin mayiigatunga Atamun. Iwernga aglaghluten anglegutemnun ungipaannaketen, ‘Mayughnaqunga Atamnun, elpesillu Atagpesinun, Kiyaghnemnun, elpesillu Kiyaghneghpesinun.’”

¹⁸ Mary Magdala‑ghmii aglaghluni maligsaaghtenun pikii, “Esghaamaaqa Ataneq.” Enkaam ungipaatkiillu Jesus‑em ungipaatesqellghaneng.

Jesus Aliilghii Maligsaaghteminun

¹⁹ Sivuliilghii aghnegha santillghem. Ighivgaani tawani maligsaaghtet qerngughutkat. Alingluteng Jews‑et igleghutistengitneng, amiget maghqatngastekiit. Jesus tagiluni akulangitgun nekevluni pikii, “Nekeggmelleq elpesinilli.”

²⁰ Tawaten piluni, kelgutkii iiggenillu saninillu, enkaam maligsaaghtet quyaghllakat esghaghluku Ataneq.

²¹ Taagken Jesus‑em pilaataqii, “Nekeggmelleq elpesinilli. Katam tawaten Atam kayagtellghatun whanga, tawateghpigaq kayagtamsi.”

²² Tawaten piluni, aneghziigluki pikii, “Tuguklightekek Agleghnalghiik Taghneghak.

²³ Seghevuskufsiki kinkut alngunak seghleghqellghitneng, Kiyaghneghem seghevulleqii. Seghevunneghilkufsiki, Kiyaghneghem seghevunnaanghitii.”

Jesus‑em Aliighvikegkanga Thomas

²⁴ Thomas, (aatghan aallgha Malghi) maligsaaghtenisimangilnguq Jesus‑em takwaaqngaki. Thomas qula maalghuk siipneqegkangat maligsaaghtet.

²⁵ Ilangita maligsaaghtet ungipaatkaat Thomas, “Esghaamaaghput Ataneq!” Iwernga Thomas‑em pikii, “Ugpeqnaanghitaqa wetkuqun esghaqumki tuquuqallghi iigganilnguut. Ugpeqnaanghitaqallu wetkuqun saaftekumki tuquuqallghetlu, saninganilnguqlu panalleq.”

²⁶ Santilleq ataasiq atughluku maligsaaghtet tawanllaataqat mangteghami, Thomas‑llu tawanlenguq. Amiget maghqatngaghngaata Jesus‑em iteghvikluki nekevegkaq akulangitgun. Pikii, “Nekeggmelleq elpesinilli.”

²⁷ Taagken Thomas pikaa, “Esghaghluki iiggenka saaftiki, saaftigullu sanika. Aygughitiqefqaavegngam, ugpeghi.”

²⁸ Thomas‑em pikaa, “Atanemni, Kiyaghnemni!”

²⁹ Taagken Jesus‑em pikaa, “Ugpeqiiten qayughllak esghaqevnga. Quyanaghhalek tamaakut ugpelghiit esghaghpenanga.”

John‑em Igangllallghan Apallaa

³⁰ Jesus uglaghngaan allaaghlluwhaghtiighaataqaaguq esghaamanghitni maligsaaghtemi, igaqumangilnguugut ukuni igani.

³¹ Iwernga ukut igaqngalghiit igaqegkaagut elpesinun ugpeqesqelluku Jesus, Christ‑angutanga, Ighnegha Kiyaghneghem. Ugpeqelleghpesigun unguvallengellequsi Aatghakun.