John 2 - New Testament-et Akuzipigestun

Nengughutelleq Cana‑mi

¹ Pingayiitangani aghneghet taawanguq nengughhnaqelghiik Cana‑mi, Galilee‑melngughmi. Jesus‑em naanga tawanlenguq,

² Jesus‑enkutlu maligsaaghtekullghiit tagsiqliqaalghiit nengughhnaqelghiignun.

³ Wine‑a qamagsatgu, naangan Jesus pikaa, “Wine‑ngiitut.”

⁴ Jesus‑em pikaa, “Aghnami whani, sasqegpenanga, salin pilleghqaqa kaasigatuq.”

⁵ Taagken Jesus‑em naangan pikii qepghaghtet, “Sasqegkangisi legan pilghaasi.”

⁶ Taawanguq aghvinleguftut uyghagmeng ulimaaghet melghutat. Ilangi 20 gallons‑ngulghiit, ilangi 30 gallons‑ngulghiit. (Jews‑et atuqaqegkangit ukmangighsamun Moses‑em Liilightuusaan pisqellghatun.)

⁷ Jesus‑em pikii qepghaghtet, “Imighteki taakut melghutat meghmeng.” Imiqiit eslemkaghaghtaghluki.

⁸ Taagken pikii, “Meghmeng imiillusi aglaateggu neqenghaghqem umiilga.” Enkaam imiilluteng aglaatkaat.

⁹ Umiilgem naasiiqaa meq wine‑ngughtekaq. Nallukegkanga naken taana wine‑a pingutanga. (Taakut qepghaghtet liisimakegkangat qayughllak imiilluteng meghmeng pikaalghiit.) Enkaam umiilgem tuqlughluku nulightughnaqelghii

¹⁰ pikaa, “Tamaghhaghmi kiyang pinilghiimeng wine‑meng atuqaquq sivukluni enkaam aqelqat kepsuunneghata tamaana aghsaan ayuqelghii wine‑a kinguliiluku atughaqaat. Iwernga pinillgha wine‑em atuqumangisimazigu sivukluku.”

¹¹ Cana‑mi, Galilee‑melngughmi Jesus‑em apeghiiqaa allaaghlluwhaghtilleqsuwhaani. Taaggun allaaghlluwhaghtilleghmikun yugnun esghaghtestekaa aangelleghllani. Enkaam maligsaaghtengita ugpeqegkaat ipa Messiah‑nguniluku.

¹² Taam kingunganeng Jesus, naanga, anglegutangi, maligsaaghtengillu aglaqat Capernaum‑emun, tamaantekat qafsinat aghneghet.

Jesus Temple‑mun Pilghii

¹³ Jews‑et neqenghaghqesaghtungestalghiit Passover‑mun enkaam Jesus aglaqaq Jerusalem‑emun.

¹⁴ Temple‑mi esghaqii yuget akikulghiit ox‑eneng, penniighneng, dove‑eneng. Esghaqiillu manimeng naveghqughtet aqumluteng tipelemeggni.

¹⁵ Jesus‑em kagsagutangllaghluni tapghaghmeng, Temple‑meng aanesquqii maligulluki penniighnunllu ox‑enunllu. Manilghutiit kataguutaqluki mingilatkii, ulleghquqiillu tipelngit.

¹⁶ Taagken yuget akilpegalghiit dove‑eneng qelqii whaten, “Aanuteki whaken! Atama Mangteghaa akilpegaghvigughtegpenaan.”

¹⁷ Maligsaaghtengita neqaatkaat Akuzitet Igaqegkat pillghat, “Megnukingalqa Mangteghaghpenun naafqutkennaqngwaaqa.”

¹⁸ Taagken Jews‑et igleghutestengita aaptekaat Jesus, “Kitum qeleghtaten tawaten pisqelluten? Kiyaghneghem pisqumakangaten, allaaghlluwhaghti ipapighqusighqameng.”

¹⁹ Jesus‑em kiimsiqii, “Naafqiteggu una temple‑a, pingayuni aghneghni nekefleqaqa.”

²⁰ Aaptekaat, “Elpaak nekefleqsiguu pingayuni aghneghni? 46‑nguut ayumiqullghet nekeftusiqegkaat uumun Temple‑mun.”

²¹ Iwernga Jesus‑em akuzitkengngukanga ellmi yugusini temple‑nguluku.

²² Unguvaghtaqngan tuqulleghmeng maligsaaghtengita neqaatkaat whaten pillgha, “Una temple‑a, pingayuni aghneghni nekefleqaqa.” Enkaam ugpeqegkiit Akuzitet Igaqegkat, Jesus‑emllu akuzillghi.

Jesus‑em Liisimakegkangi Qamaglluki Yuget Natetulangi

²³ Jesus Jerusalem‑emelluku Passover‑em neqenghaghqellghani, uglapiglleghhiit esghapagluki allaaghlluwhaghtillghi ugpeqegkaqegkangat,

²⁴ iwernga Jesus‑em ugpequmangilkangi.

²⁵ Kinkunun alngunak ungipaanneghisaghngaatni ayuqelghii yugneng qayughllak liisimakegkangi natetulangi.