John 17 - New Testament-et Akuzipigestun

Jesus‑em Yughaatkegkangi Maligsaaghteni

¹ Jesus taaqsami akuzineghmeng sivuglluni qilagmun yughaqaq, “Ataay, aghneq kaatuq. Quulvaghhu Ighneghen, quulviisqelluten Ighneghpenun.

² Ighneq Atanengllaqaqan tamaghhaanun yugnun. Enkaam kenlengilnguq unguvalleq tuunꞌngwaa tamaghhiitnun tuunegkaghpenun ellnganun.

³ Yuget kenlengilngughmeng unguvallengaqut liitelleghmegteggun elpek, taananginaghhaq Kiyaghneghpigaq, liitelleghmegteggunllu Jesus Christ‑a elpek kayagtekan.

⁴ Quulvaamaamken nunami whani apeghiillemkun qepghaqaq qelghutkan whangamnun pisqelluku.

⁵ Enkaangam Ataay, manugpenisimalunga quulvaghnga quulvalleghmeng whanga piksaqemneng elpenillunga, sivungani nunam ulimallghan.

⁶ “Liitestekaqaqa natetulen yugnun tagivaqaghpenun nunameng whaken. Elpek piksaqeten tagivaqaghten whangamnun. Qaatkegkaqiit akuziteten.

⁷ Qenwatlu liitiit sangwaat qamaglluki tagivaqaghten elpeneng pingutangi,

⁸ qayughllak apeghtuusaqegkaghten whangamnun apeghtuusaqegkaqanka ellngitnun. Tugukliimiit enkaam liitaat ipapestaaq tagikaatka elpeneng. Ugpeqaatlu elpenun kayagtekaatka.

⁹ “Yughaatkengngwaanka ellngit. Yughaatkengngunghitanka yuget nunam pingi. Yughaatkengngwaanka tamaakut tagivaqaghten qayughllak elpek pikegketen.

¹⁰ Qamaglluki whanga pinka elpek pikaten; qamaglluki elpek piten whanga pikanka. Ellngitgun aangelleghllaka kelgulluni ayuquq.

¹¹ Aglaghyaghtungestaghtunga elpenun, nunamennanighyaghtungestaghtunga, iwernga ellngit nunamellequt. Agleghnalghii Ata, aflengakiki aghtughyaghqaanghillghakun ateghpek, tagivaqaghten whangamnun, ataasiisqelluki ataasiillemtegetun.

¹² Ellngitnillunga aflengakegkaqanka aghtughyaghqaanghillghakun ateghpek, tagivaqaghten whangamnun. Kelengakegkaqanka, enkaam talwa ataasiq iflallghituq, iwerngaqun ataasiq yuuk iflayaghqaq, Akuzitet Igaqegkat apeghiighesqelluki.

¹³ Whaa maaten elpenun aglaghnaqunga. Iwernga tawaten yughaghtunga paninang nunamellunga, quyalqa ilungitnitesqelluku whanga pima.

¹⁴ Aapqaqanka Akuziteten ellngitnun, enkaam nunam yugan ugumikii qayughllak nunam pikenghilkangi whangamtun.

¹⁵ Yughaatkengngunghitanka elpenun iqitesqelluki nunameng. Iwernga yughaatkengngwaanka elpenun aflengakaghtesqelluki Tughneghaghmeng.

¹⁶ Nunam pikenghitii katam whanga pikenghitellghatun.

¹⁷ Aaftiki elpenun ipapilleghqun; akuziten ipapillghuuq.

¹⁸ Kayagtekaqanka nunamun, kayagtelleghpetun whanga.

¹⁹ Ellngit apalluqluki whangamneng aaftekaagunga elpenun, ellngitlu aaftesqelluki akuzitegpegun ipapilleghqun.

²⁰ “Yughaatkengngwaanka taakut yuget, yughaatkengngwaanka tamaakutlu yuget ugpeqiyaghqat whangamneng ungipaqillghitgun maligsaaghtema.

²¹ Yughaghtunga qamaglluki ataasiisqelluki. Ataay, yeqay ilumtegnitestiki katam tawaten elpek ilumnitelleghpetun, whanga elpek ilugpenitellemtun. Ilumtegnitestiki nunam yuganun ugpeqesqelluku elpenun kayagsimatka.

²² Quulvaqaqanka katam tawaten quulvalleghpetun whanga, ellngit ataasiisqelluki katam tawaten whangkutung ataasiillemtegetun.

²³ Whanga ilungitnitunga, elpek ilumnituten ellngit ataasiightengngwaaghesqelluki. Enkaam nunam yugan liilleqaat elpenun kayagsimatka. Liilleqaatlu piniqellghen tamaakunun ugpeqilghiinun whangamneng, whangamnun piniqelleghpetun ayuqelghii.

²⁴ “Ataay, ukut yuget tagivaqaghten whangamnitesuwaqanka, ellngitnun esghiisqelluku nighughqelqa. Piniqutegpeneng taana nighughqelleq tagivaqaqan sivungani nunangllallghem.

²⁵ Kaay elqughutngalghii Ata, nunam yugan nallukaaten; whanga liisimakamken. Taakutlu tagivaqaghpek liisimakaat elpenun kayagsimatka.

²⁶ Liitestekaqanka natetulegpeneng. Liitesimanginaghnaqamken piniqellghen whangamnun ilungitnitesqelluku, whangallu ilungitninnalunga.”