John 16 - New Testament-et Akuzipigestun

¹ “Ungipaatamsi tamaaken iilqayufqaafsi pisqellusi amyuutkegkangisi.

² Yuget iqitesleqiisi synagogue‑meggneng. Aa‑a, pilleghqaq taginguuq, kitum alngunak tuquskumisi sumeghtaghaghyaghqaaguq qepghaatnguniluku Kiyaghneq.

³ Tawaten piyaghqaqiisi qayughllak liisimangilkanginkung Atakullghiigni.

⁴ Ungipaatamsi tamaaken maaten pilleghqaq kaaskan neqamikesqelluki aapqanka. Ungipaasimangitamsi tamaaken piinlighyuwhaalleghmi maligsaaghtengughtaqngafsi qayughllak elpesinilnguunga.

Qepghallgha Agleghnalghiim Taghnegham

⁵ “Maaten uteghnighnaqnguunga Kayagtistemnun; iwernga nalighpesi aapneghitaghpesinga whaten, ‘Navek pinaqsin?’

⁶ Qivghughllaguusi qayughllak ungipaaskemsi tamaaken.

⁷ Iwernga ungipaannaqamsi ipapigmeng: pinighataghaghyaghqaagusi aghulaqegkuma, qayughllak kayagfikelleqamsi Kayutkaghqagneng. Aghulaqenghilkuma Kayutkaghqak taginaanghituk elpesinun.

⁸ Kayutek tagikumek liigilliighqelleqii nunam yugi seghleghqelleghmeng, elqughutngalleghmeng, nanqigtilleghmeng.

⁹ Liigikesleqii seghleghqestengutangi, qayughllak whanga ugpeqigalkangatnga.

¹⁰ Liigikesleqaa elqughutngalleq, qayughllak aglaghnaqelghiinga Atamun enkaam esghaghnanighlleqaghpesinga.

¹¹ Liigikesleqaa nanqigtelleq, qayughllak igleghutistenga nunam uum nanqigtellengwaaghluni ayuquq aghyuughyaghqaaluni.

¹² “Paninang apeghyaghqaghllaguunga elpesinun iwernga salin liigikepagningitasi.

¹³ Iwernga Taghneghak apeghtughilghiik Kiyaghneghem ipapillghaneng, tagikumi maghyaghqughlleqiisi ipapilleperegwaaghmun. Akuzitkennaanghitii ellmi katam akuzitni, iwernga akuzillequq nagaquqaghhiinaghmineng. Enkaam ungipaalleqiisi sangwaa sayaghqaatanga taakwaningani.

¹⁴ Quulvaghlleqaanga qayughllak tuguklighluki whanga akuzitenka apeghlleqii elpesinun.

¹⁵ Qamagtengngwaaghluku Atam pinga whanga pikaqa. Tamaaken apalluqluku piinga, Taghnegham tuguklighluki tuunegkanka apeghlleqii elpesinun.

Qivghulleq Quyallghughsaghqaq

¹⁶ “Qantaghaqun esghaghnanighlleqaghpesinga iwernga mulugpenasi esghanqiglleqaghpesinga.”

¹⁷ Ilangita maligsaaghtet ilateng aaptekiit, “Sameng piinkut Jesus‑em whaten pilleghmikun, ‘Qantaghaqun esghaghnanighlleqaghpesinga iwernga mulugpenasi esghanqiglleqaghpesinga’? Taanallu sangaawa whaten pillgha, ‘Qayughllak aglaghnaqunga Atamun’?”

¹⁸ Pikat, “Sameng pii tawaten pilleghmikun, ‘Qantaghaqun’? Nallukaghput sameng pisiitanga.”

¹⁹ Jesus‑em liisimakegkangi aapsukangat enkaam pikii, “Elpesineng aapqughwaaghusiqestegguu sameng pitka whaten pillemkun, ‘Qantaghaqun esghaghnanighlleqaghpesinga iwernga mulugpenasi esghanqiglleqaghpesinga?’

²⁰ Ipa ungipaatamsi, qiyayaghqaagusillu qivghuyaghqaagusillu iwernga nunam yugi quyayaghqaagut. Elpesi qivghuyaghqaagusi iwernga qivghullesi quyallghughsaghqaagut.

²¹ Aghnaq ighniyuneghmini ikfiqaquq, qayughllak ighnilleghqaa kaallghii. Iwernga ighniyami puygaa ikfiqelleni, qayughllak quyakegkanga taghnughhaq allgelghii nunamun.

²² Qivghunguusi maaten iwernga esghaghlleqamsi allameng enkaam quyallequsi. Kitum alngunak iqinnaanghitaa quyalleghsi.

²³ “Tawani aghneghmi aapnaanghitaghpesinga sameng alngunak. Ipa ungipaatamsi, Atama tuunelleqiisi sameng alngunak aaptekufsi Atemkun.

²⁴ Whavemun kenlanga aapsigatusi sameng alngunak Atemkun. Aaptek allgeghullequsi enkaam quyalleghsi iighwighllequq.

Kayaalqiilleq

²⁵ “Ungipaatkaqamsi tamaakuneng ungipaghaatetgun. Iwernga ungipaghaatneng atuqnanilleghqaqa kaallequq enkaam whateghlluwaaq apeghyagulleqaqa Ata elpesinun.

²⁶ Taana pilleghqaq kaaskan elpesineng katam aapleghhaasi Atemkun. Enkaam ungipaatamsi whanga aaptunnanighlleqamsi Atamun,

²⁷ qayughllak Atam ellmineng katam piniqiisi. Piniqiisi qayughllak piniqegkefsinga, ugpeqegkesillu Atameng tagikaatka.

²⁸ Atameng tagikaagunga nunamun. Maaten unilluku nuna aglaghnaqunga Atamun.”

²⁹ Maligsaaghtengita pikaat Jesus, “Taawa aleghqughaghpekut whateghlluwaaq atuqegpenaki ungipaghaatet!

³⁰ Whaa liitamken sangwaa tamaghhaan liisimakeftan. Liisimakaqaten yugem aapsaghqii talwa aaptestegpenaki enkaangam kitum alngunak aapneghiteghngaaghmiten sameng alngunak ayuquten. Tamaaken apalluqluku ugpeqamken Kiyaghneghmeng tagikaaten.”

³¹ Jesus‑em pikii, “Qenwatlu ugpeghetsii?

³² Mingitelleghqaghsi kaasaghtughtuq, talwa whaa kaalluni ayuquq. Qamagllusi negpesinun aglaghtuullequsi, unilleqaghpesinga ellnginaghhaghma. Iwernga paninang ellnginaghhaanaanghitunga qayughllak Ata whangamnilnguq.

³³ Ungipaatamsi tamaaken nekeggmellelgusqellusi whangamkun. Nunami whani seghleliighllequsi iwernga ilutulusi qayughllak kayaallqegkaqaqa nuna.”