John 15 - New Testament-et Akuzipigestun

Jesus Vine‑epik

¹ “Whanga vine‑epiguunga, Ataka piitesighaghtenguuq.

² Qamaglluki avayanka piitestingigalnguut ikughaqii. Qamaglluki avayat piitestikayuget kepughvikaqii piitestighataghiisqelluki.

³ Elpesi ukmangighwaaghlusi ayuqusi akuzitetgun akuzitkegkamkun elpesinun.

⁴ Whangamnitekestaghtek whanga elpesinitellemtun. Avayaraaghinaq piitestinaanghituq wetkuqun vine‑meskumi. Tawatetusi ellnginaghpesi piitestinaanghitusi wetkuqun whangamnitekestaqufsi.

⁵ “Whanga vine‑nguunga, elpesi avayaagusi. Kina alngunak piitesqughllagyaghqaaguq whangamnitekestaqumi, whanga ellngani. Iwernga whangangunasi sanaanghitusi.

⁶ Kina alngunak whangamninneghilkumi avayastun ayuquq eglluni paliqaq. Tawatelnguut avayat qerngughlluki paneghtaqiit.

⁷ Whangamnitekestaqufsi, akuzitenka elpesinitestekufsiki aapleghhaasi sameng alngunak piyukegkaghpesineng enkaam allgeghullequsi.

⁸ Ataka usuqellengellequq piitesqughllakufsi, liigikeslequsillu whangamnun maligsaaghtekutsi.

⁹ Piniqamsi katam Atam piniqellghatun whanga. Piniqellemnitekestaghtek.

¹⁰ Qaatkegkufsiki qelghusanka piniqellemnitekestaghllequsi tawateghpigaq Atama piniqellghanitellemtun qaatkutellemkun qelghusaanun.

¹¹ “Ungipaatamsi tamaaken quyamalqa elpesinitesqelluku, quyamalleghsi iighwiisqelluku.

¹² Unanguuq qelghusaqa elpesinun: piniqutullusi whanga piniqellemtun elpesi.

¹³ Yugem tuqumatkegkumiki ilakumtaani piniqellgha aangepigtuq. Kina alla piniqellghituq taameng aangataghalghiimeng.

¹⁴ Ilakumtaaqaghpesinga, qelghutkanka qaatkegkufsiki.

¹⁵ Whaken kenlekluku qepghaghtengulusi atighnaanghitamsi, qayughllak qepghaghtem nallukaa umiileni saaqutanga. Iwernga maaten atighamsi ilakumtaaghmeng, qayughllak liitestekegka elpesinun qamaglluku nagatkaqa Atamneng.

¹⁶ Elpesi nakmikumangitaghpesinga, whanga nakmikegkaqamsi, qepghaqalitamsillu. Enkaam aghulaqlusi piitesqughtek, piitesqulleghsi nagneghasqesuwaqa. Tawaten pikufsi Atam tuunelleqiisi sameng alngunak aaptekufsi Atemkun.

¹⁷ Una qelghusaqaqa, piniqutullusi.”

Jesus‑em Kelengasaaqangi Maligsaaghteni

¹⁸ “Nunam yugan ugumikegkangisi, neqamikluku whanga sivuklunga ugumikegkaqaatnga.

¹⁹ Nunam piksaqumisi, yugan piniqnayaghiisi piniqututelleghmegestun. Iwernga whanga nakmikegkaqamsi whaken nunameng enkaam nunam pikenghitiisi. Tamaaken apalluqluku nunam yugan ugumikiisi.

²⁰ Neqamikluku aapqaqa elpesinun: Qepghaghta aangataghanghituq umiilegmineng. Amyuutkumakumegtengnga elpesillu amyuutkelleqiisi. Qaatkumakumegteki apeghtuusanka, elpesillu apeghtuusasi qaatkelleqiit.

²¹ Tawaten pilleqiisi whanga apalluqlunga qayughllak nallukaat Kayagtisteka.

²² Tagilunga aleghquumangisaqumki liinnayanghitut seghleghqestengutseng. Iwernga whaa anagniilqavigiitii seghleghqelleghmeggneng.

²³ Kitum ugumikegkuminga, ugumikaallu Ataka.

²⁴ Akulngitni allaaghlluwhaghtiighaataqaagunga kitum alngunak pingigalkanganeng. Esghapakaqeghngaaghmegteki allaaghlluwhaghtillghenka paninang ugpeqellghitaatnga, ugumikiinkung Atakullghiigni enkaam seghleghqestenguut nanqigtellengyaghqat.

²⁵ Tawaten pilleghmegteggun apeghiiqaqaat Akuzitet Igaqegkat whaten pillghat, ‘Ugumikaatnga apallungunaan.’

²⁶ “Kayutek kayaglleqagka elpesinun, Atameng pinguuk. Taghneghaaguk apeghtughiyaghqak Kiyaghneghem ipapillghaneng. Tagikumi ungipaqelleqaanga.

²⁷ Elpesillu ungipaqelleqaghpesinga yugnun, qayughllak whangamnitkaalghiisi qepghaghyuwhaallghaneng ima.