John 14 - New Testament-et Akuzipigestun

Jesus Tuumnguuq Atamun

¹ Jesus pilaataqaq, “Qaamnasi seghleliightestegpenaki, sighimakiteggu Kiyaghneq, sighimakitengnga whangallu.

² Uglaapigtuq nekaghqaq Atama mangteghaani enkaam yataaghqusaghtughnaqamsi nekaghqameng. Tawatenneghisaqan ungipaannayanghitamsi.

³ Yataaghqunneghmeng apeghiiqumsi taginqigllunga tuguklighlleqamsi, whangamnitesqellusi kiyaghfimni.

⁴ Liisimakaghsi tuma takunaqegkegka.”

⁵ Thomas‑em pikaa Jesus, “Ataneq, nallukaghput navek pinaquten enkaam natenꞌngam liisimakelleqesteggu tuma?”

⁶ Jesus‑em kiimsiqaa, “Whanga tuumnguunga, ipapillghuunga, unguvallghuunga. Kina alngunak Atamun aglaghnaanghituq wetqukun whangamkun.

⁷ Liisimakngwaaghyaqufsinga, liisimaknayaghaghsi Atakallu. Iwernga whaken kenlanga liitaghsillu esghaghaghsillu.”

⁸ Philip‑em pikaa, “Ataneq, kelgutigu Ata whangkunnun enkaam itagnaghilta.”

⁹ Jesus‑em pikaa, “Philip, elpesinitunga qavngarugllaggaaneng, taawaa nallukaqsingaa? Kitum esghaamakuminga, esghaqaqaallu Ata. Enkaam sangavek pizin, ‘Kelgutigu Ata whangkunnun’?

¹⁰ Ugpeqenghistengngaa Atam ilunganilnguunga, Ata whanga ilumni? Akuzitenka whanga katam akuzitkenghitanka. Ata ilumnilnguq qepghaghaquq whangamkun.

¹¹ Ugpeqitengnga Atam ilunganinnilunga pilghiinga, Atallu ilumninnikegka. Nalighmeng ugpeqitengnga allaaghlluwhaghtillghenka apalluqluki.

¹² Ipa ungipaatamsi, kitum ugpeqegkuminga, taakut ataasit qepghaqanka pilleqii. Talwa aangataghalghiit tamaakuneng pilleqii qayughllak aglaghnaqunga Atamun.

¹³ Aaptekufsi sameng alngunak Atemkun legan pilleqaqa, Atam aangelleghllaga kelgutesqelluku Ighneghqun.

¹⁴ Sameng alngunak aaptekufsinga Atemkun pilleqaqa.

Akequsaqegkak Agleghnalghiik Taghneghak

¹⁵ “Piniqegkufsinga qaatkelleqasi qelghusanka.

¹⁶ Aapleqaqa Ata tuunesqellusi allaneng Kayutkaghqameng, enkaam tuunelleqiisi Kayutkaghqameng elpesinisaghqameng quunperugllak.

¹⁷ Taakuk Kayutek Taghneghaaguk apeghtughlleqiisi Kiyaghneghem ipapillghaneng. Nunam yugan tuguklighnaanghitaa qayughllak esghiigalkanga talwa nallukegkanga. Iwernga elpesi liisimakaghsi qayughllak elpesinituq, ilugpesinisaghqaaguqlu.

¹⁸ “Uninnaanghitamsi ellnginaghhaghpesi yaywaalistun. Taginqigllequnga elpesinun.

¹⁹ Maateqwaaqun nunam yugan esghaghnanighnaqaatnga, iwernga elpesi esghaghlleqaghpesinga, qayughllak unguvalghiinga, elpesillu unguvallequsi.

²⁰ Enkaam tawani aghneghmi unguvaghtellemni liilleqaghsi Atama ilunganitulka, elpesillu ilumnitelleghsi, whangallu ilugpesinitulka.

²¹ “Kitum tugukliqumiki qelghusanka, qaatkegkumikillu, piniqistekaqa, Atamallu piniqelleqaa. Whangallu piniqelleqaqa, liiteslequngallu ellnganun.”

²² Taagken Judas‑em pikaa, (Judas Iscariot‑ngunghilnguum) “Ataneq, sangavek liitesnaqsin whangkunnun, naqam nunam yuganun liitestegpenang?”

²³ Jesus‑em kiimsiqaa, “Kitum piniqegkuminga qaatkelleqii apeghtuusanka. Atama piniqelleqaa enkaam Atakullghiigni takuluku kiyaghfikelleqaghpung.

²⁴ Kitum piniqenghilkuminga qaatkennaanghitii apeghtuusanka. Apeghtuusat nagatkesi whangamneng pingunghitut, Atameng pinguut Kayagtistemneng.

²⁵ “Ungipaatamsi tamaaken elpesinillunga.

²⁶ Kayutem apeghtughlleqiisi sameng tamaghhaaneng. Neqaghtesleqii qamaglluki tamaakut aapqanka elpesinun. Taakuk Kayutek Agleghnalghiinguuk Taghneghak, Atam kayagsaghqakek Atemkun.

²⁷ “Univikamsi nekeggmelleghmeng. Nekeggmelqa tuunaqa elpesinun. Nunam tuunellghatun tuuneghitamsi. Enkaam ilusi seghleliightestegpenaki talwa alingegpenasi.

²⁸ Nagatkaqaghpesinga whaten pilghiinga, ‘Aghulaqnaqunga iwernga taginqigllequnga elpesinun.’ Piniqegkaqsaqufsinga quyanayaghtusi ungipaataqngamsi Atamun aglaghnaqnilunga, qayughllak aangeghllagtuq whangamneng.

²⁹ Whaa ungipaatamsi taagken sivutghulluku pilleghqaa enkaam apeghiiqan ugpeghllequsi.

³⁰ Aleghqughnanighyaghtungestaghamsi, qayughllak igleghutistenga nunam uum taginguuq. Aghtughyaghqaanghillghituq whangamnun,

³¹ iwernga Atam qelghutkii pisqellghwaaghatun atuqaqanka nunam yuganun liitesqelluku piniqilqa Atamun. Nekevitek, aghulaqelta.”