John 12 - New Testament-et Akuzipigestun

Jesus Ilakumtaaghminilnguq Bethany‑mi

¹ Aghvinlegughtaquqlu aghneq Neqenghaghqellghanun Passover‑em, Jesus Bethany‑tkaq, Lazarus‑em kiyaghfiganun. (Taana Lazarus Jesus‑em unguvaghtekaqaa tuqulleghmeng).

² Tawani Jesus yataaghqutkaat neqenghaghqunnaluku enkaam Martha‑m ketfaghtuutkii aqelqat. Lazarus‑llu tawanlenguq maligulluni Jesus‑mun.

³ Taagken Mary‑m tagitkakek akitupiglleghhiik tepengllaasik nard‑epigmeng ulimaaghek. Jesus‑em itegii kuuvikluki sangigtekii nuyamineng. Enkaam mangtegham ilunga tepengllaasighpagnighqwaakaq.

⁴ Judas Iscariot‑lu tawanlenguq, Jesus‑em maligsaaghtenga. (Taakwangingani uveghpagusaghqaqngukanga Jesus). Judas pikaq,

⁵ “Taakuk tepengllaasik 300 denarii‑em akikaak. Akiksaqlegestun, akinga taana aklumalghiinun tunqughnayaghtuq.”

⁶ Tawaten pikaalghii megnukelghiistun aklumalghiit iwernga megnukepigtekanga mani. Aflengakistengulghii maligsaaghtet manilghutiitneng enkaam tugutkayugulghii ellminun katam atughqameng teglegniightengutmineng.

⁷ Jesus‑em pikaa, “Avelghaghhu, aflengakumaak tepengllaasik aghneghmun whavek yataaghqennaluku llivelleghqaqa.

⁸ Aklumalghiit quunpeng tamaantut. Whanga quunpeng elpesininnaanghitunga.”

Jews‑et Agghitkat Lazarus Tuqunnaluku

⁹ Uglapiglleghhiit Jews‑et nagaqughluku Jesus Bethany‑menniluku esghaghyaghtuutkaat, tawaveklu Lazarus esghaghnaluku Jesus‑em unguvaghtekaa.

^10-11 Lazarus apalluqluku uglapiglleghhiit Jews‑et unilluki igleghutisteteng ugpeqegkaat Jesus. Enkaam taakut chief priest‑et agghitngwaaqat tuqunnaluku Jesus, enraghngam whaa agghitkegkaat Lazarus‑lu tuqunnaluku.

Yuget Usuqegkangat Jesus Jerusalem‑ellghii

¹² Unaamingani yulghuteghllaget Neqenghaghqellghanun Passover‑em tagilaghaatkat, nagaquqat Jesus tagiiqniluku Jerusalem‑emun.

¹³ Enkaam kepuulluteng palm‑et uqfiget avayiitneng paasqaat Jesus akilghuumaghmeng, “Usuqnaghhalek Kiyaghneq! Kiyaghneghem quyasligu Umiilga Israel‑em tagilghii Aatghakun Atanghem!”

¹⁴ Jesus‑em navghaghluku donkey‑ghaq qaayngakun aqumegkaq tawatengwaaq Akuzitet Igaqegkat pinaqnillghistun. Taakut Akuzitet whaten pikaagut,

¹⁵ “Alingegpenasi, yugani Jerusalem‑em! Esghaghteggu, umiilegsi tagiiquq aqumluni donkey‑ghaam qaayngakun.”

¹⁶ Tawani pilleghmi Jesus‑em maligsaaghtengita liigikumangilkangat taana uuknaliqelleq. Wetku kingunganeng Jesus‑em unguvalghanllu, mayullghanllu qilagmun neqaatkaat taana uuknaliqelleq, neqaatkiitlu apeghiiqiit ellnganun.

¹⁷ Yulghutet ungipaqngukangat esghapalleghteng Jesus‑em unguvaghtillgha Lazarus‑meng, aanesqellghallu lliveghmeng.

¹⁸ Enkaam uglapiglleghhiim yugem paasqaat Jesus, qayughllak nagaquqaqegkangat taana allaaghlluwhaghtilleq.

¹⁹ Taagken Pharisees‑et ilateng pikiit, “Sangwaa tamaghhaghmi anaggutnguuq whangkunnun. Esghaqaghtegguqun, iingunaghhaghmi yugem maligtengngwaa Jesus.”

Jesus‑em Akuzitkegkanga Tuqulleghqani

²⁰ Ilangillu Greek‑et Jerusalem‑etkaalghiit maniguunnaluteng Neqenghaghqellghani Passover‑em.

²¹ Aglaghluteng Philip‑mun, pikaat, “Yuguniiq, esghaghyuwaqaghput Jesus.” (Philip Bethsaida‑meng pingulghii, Galilee‑melngughmeng.)

²² Enkaam Philip‑em ungipaalluku Andrew, ungipaasaghtuqaak Jesus.

²³ Jesus‑em pikakek, “Aflu kaasimaaq Ighneghan Yugem quulvallengeghllalleghqaa.

²⁴ Ipa ungipaatamsi, wetkuqun piitun ifkaghlluni nunamun iteghluni tuqukumi piitesqughllagyaghqaaguq, aamtaam tuqunghilkumi taawa ataasighhaallequq piitun.

²⁵ Kitum alngunak piniqegkumigu unguvalleni iflayaghqaqaa. Iwernga kitum alngunak ugumikegkumigu unguvalleni whani nunami kenlengilngughmeng unguvallengyaghqaaguq.

²⁶ Kitum alngunak qepghaasukuminga maligsaghqaqaanga. Enkaam qepghaghteka whangamnisaghqaaguq naansaghngaaghma. Atama quulvaghyaghqaqaa kina alngunak qepghaatilghii whangamneng.”

²⁷ “Maaten unguvasigka seghleliighuuk. Sameng pilanga? Whaten pilangaa, ‘Ataay, yugulinga ikfiqelleghqamneng’? Nakaa, tawaten pinaanghitunga qayughllak tagikaagunga ikfiqnalunga.

²⁸ Ataay, aangelleghllaga ateghpek aliightigu.” Taagken ma qilagmeng pikaq, “Aangelleghllaga ateghma aliighsimaaqa, alla aliighlleqaqa.”

²⁹ Yulghutem nekevghallghiim tawani nagalluku taana ma pikat, “Kallugughtaa.” Iwernga ilangi pikat, “Yaqulgem aleghqughwaa Jesus.”

³⁰ Jesus‑em pikii, “Ma taana elpesinun ayuquq, whangamnun pingunghituq.

³¹ Whaa maaten Kiyaghneghem nanqiggnaqaa nunam yuga, whaa maaten Kiyaghneghem eggnaqngwaa igleghutistenga uum nunam.

³² Whanga kevellengegkuma nunameng, taaggun tagilaghaatesleqaqa qamaglluku yuuk whangamnun.”

³³ Jesus tawaten pikaq apeghnaluku naten tuqulleghqani.

³⁴ Yulghuteghllaget pikaat, “Nagaquqaqaghput Liilightuusaaneng Moses‑em, Christ‑anguq kiyaghsaghqaaguq quunperugllak. Enkaam sangavek pizin, ‘Ighnegha Yugem kevellengyaghqaaguq’? Kinangaawa taana, ‘Ighnegha Yugem’?”

³⁵ Taagken Jesus‑em pikii, “Nighuk elpesininnaqnguuq natengiighhaq. Enkaam igleghtek nighugaghluku, mamlegfagilgan. Kina alngunak igleghlleghhii mamlegmi nallukuq natmun piiqutni.

³⁶ Enkaam nighuk paninang elpesinilluku ugpeqiteggu, avaqutaliitesqellusi nighugmun.” Jesus tawaten piluni kagtaghtekaq ellngitneng.

Jews‑et Ugpeqenghilkangat Jesus

³⁷ Yuget esghapagyaghngaaghmegteggu Jesus uglapiglluku allaaghlluwhaghtilghii paninang ugpequmangilkangat.

³⁸ Ugpequmangitellghita apeghiightestekaa Isaiah‑m uuknaliqistem whaten pillgha: “Ataneq, kitum ugpeqaki sangwaat aapqaput? Atanghem aghtughyaghqaanghilleni kitumun esghaghtestagu?”

³⁹ Tamaaken apalluqluku ugpeghpagningitkaagut. Isaiah whatenllu uuknaliqegkaaguq,

⁴⁰ Kiyaghneq pikaaguq, “Iiyngit ayaastekaqanka esghaannayukata. Umyugiitlu liigiksaghqaananighqegkaqanka luuraq qiivnayukata whangamnun naallghutesqelluteng.”

⁴¹ Isaiah tawaten pikaaguq esghaqaqutmineng Jesus‑em nighughqelleghqaa enkaam akuzitkegkaqegkanga.

⁴² Qaywa uglapiglleghiit Jews‑et ugpeqenghisaghngaatgu Jesus, naqamenraq uglapighlleghhiit igleghutistengita ugpeqegkaat Jesus, Christ‑angutanga. Iwernga aapghumangilkangat alingluteng Pharisees‑et aanesnayukangisteng synagogue‑meng,

⁴³ qayughllak taakut igleghutistet usuqellengyugaqut yugneng pakiggulluku Kiyaghneghem usuqelleghqaaneng.

⁴⁴ Jesus akilghuukaq, “Kitum alngunak ugpeqegkuminga, whanganginaghma ugpeqegpenanga, ugpeqngwaa Kayagtisteka.

⁴⁵ Kitum alngunak esghaquminga, esghaangwaa Kayagtisteka.

⁴⁶ Tagikaagunga nunamun nighugulunga, kitum alngunak ugpeqegkanganga mamlegmennanighllequq.

⁴⁷ Kitum alngunak nagalluki akuzitenka qaatkenghilkaki, nanqiggnaanghitaqa aghyughyaghqaaniluku, qayughllak nanqigsaghtuunghitanka nunam yugi, yeghlegi yuguliyaghtuuwanka.

⁴⁸ Kitum alngunak ighsakegkangangallu tuguklinghilkakillu akuzitenka nanqigtistekaghqalguuq. Akuzitet akuzitkegkanka nanqiglleqaat kingulighmi aghneghmi,

⁴⁹ qayughllak akuzitenka whanga pikenghitanka. Atam Kayagtistema qelghutkaaneng akuziiqunga.

⁵⁰ Liisimakanka qelghusii kenlengilngughmeng unguvallengestikayuguut. Enkaam akuzitkaqegkenka Atam qelghusaqii whangamnun akuzitkesqelluki.”