John 11 - New Testament-et Akuzipigestun

Tuqullgha Lazarus‑em

¹ Taawanguq yuuk, aatqelghii Lazarus‑meng qinuyukaq. Bethany‑mi kiyaghtengngulghii nayagegmini Mary‑nkugni Martha‑nkugni.

² (Taam Mary‑m taakwaningani Atanghem itegii kuuvikluki tepengllaasimeng nuyamineng sangigsaghqaqii. Mary‑m kuugqegkanga Lazarus qinuyulghii.)

³ Mary‑nkuk Martha‑nkuk ungipaasaghtiisqegkaak Jesus, “Ataneq, piniqegkan qinuyuguuq.”

⁴ Jesus ungipaasatni pikaq, “Qinuyullghan apallaa tuqullghunghituq iwernga usuqisiiluni Kiyaghneghmun pinguuq, esghiisqellukullu aghtughyaghqaanghilleghllaga Ighneghan Kiyaghneghem.”

⁵ Jesus‑em piniqegkek Martha‑nkuk anglegutkullghiik, Lazarus‑llu.

⁶ Iwernga nagaqughngaaghmigu Lazarus‑em qinuyullgha, paninang maalghuk aghneghek tamaantekaq.

⁷ Taagken Jesus‑em maligsaaghteni pikii, “Judea‑nneqigtelta.”

⁸ Maligsaaghtengita pikaat, “Apeghtughista, legan qantaghaqun Jews‑et tuqunnaqegkaqaaten milughpagaatameng. Whaa alla aglanqigsugsiin?”

⁹ Jesus‑em kiimsiqii, “Aghneghem ataasim avellgha nighuguq. Kina alngunak igleghtekumi aghneghmi naaggnaanghituq, qayughllak esghaghaqaa tumeni nunam nighugakun.

¹⁰ Iwernga kina alngunak igleghtekumi unugmi naagsaghqaaguq qayughllak nighugilnguq ilumini.”

¹¹ Jesus tawaten piluni pikiillu, “Ilakumtaaghput Lazarus qavaaguq, taghtughsaghtughnaqaqa.”

¹² Maligsaaghtengita pikaat, “Ataneq, qavaakumi piniighlleqaa.”

¹³ Jesus‑em pinguyaqangi Lazarus tuqumaniluku, iwernga maligsaaghtengita sumeghtaghaatkegkaat Lazarus qavaaniluku.

¹⁴ Enkaam Jesus‑em ungipaatngwaaqii, “Lazarus tuqumaaq.

¹⁵ Quyaanga ellnganinneghitkaalghiinga tuqaaqngan. Apalluqaqa elpesinun ugpeqataghhiisqellunga. Tagitek, takulteggu.”

¹⁶ Taagken Thomas‑em (Malghimengllu aatqelghiim) pikii maligsaaghtelgutni, “Whangkutallu tuqulgusighyaghtuulteggu.”

Jesus Tuqulleghmeng Unguvaghtellghuuqlu Unguvallghuuqlu

¹⁷ Jesus‑em kaalluni Bethany‑mun nagaquqaa Lazarus tuqumaniluku, enmis estamagughtaqeftii aghneghet llivelleghmineng.

¹⁸ Bethany qantaghanlenguq Jerusalem‑emeng,

¹⁹ enkaam uglapiglleghhiit Jews‑et tagilaghaatkat ilutughsaghnalukek Martha‑nkuk Mary‑nkuk, kuugꞌghegkenka tuqullghaneng.

²⁰ Martha‑m nagaqughyamigu Jesus taginiluku paasqaa, Mary nemetkaq.

²¹ Martha‑m pikaa Jesus, “Ataneq, maantekaayaquvek kuugqa tuqunayanghituq.

²² Iwernga liisimakaqa, talwa maaten Kiyaghneghem tuunyaghqaqaaten sameng alngunak aaptekuvek.”

²³ Jesus‑em pikaa, “Kuugꞌghen unguvaghllequq unguvalleghmun.”

²⁴ Martha‑m pikaa, “Liisimakaqa unguvaghllequq tuqukat unguvaghtuuskata kingulighmi aghneghmi.”

²⁵ Jesus‑em pikaa, “Whanga tuqulleghmeng unguvaghtellghuungallu unguvallghuungallu. Kitum alngunak ugpeqegkuminga tuquyaghngaaghmi, unguvallelguyaghqaaguq.

²⁶ Enkaam kina alngunak kiyaghtekumi whangamni, ugpeqegkumingallu, tuqunaanghitngwaaghtuq. Martha, ugpeqsiguu taana?”

²⁷ Martha‑m kiimsiqaa, “Aa‑a Ataneq, ugpeqamken Christ‑anguuten, Ighnegha Kiyaghneghem. Elpenguuq tagiyaghqaanikaat nunamun.”

Jesus Qiyakaq

²⁸ Martha‑m tawaten piluku aglaqaq. Tuqlughluku anglegutni Mary, ellnginaaghulluku pikaa, “Apeghtughista kaasimaaq, aaptaqaaten.”

²⁹ Ungipaasatni, Mary nekefqaghtekaq Jesus‑mun pinaluni.

³⁰ (Jesus paninang neghpigaghmun agliigalnguq, salin Martha‑m nallaghviganilnguq.)

³¹ Jews‑et Mary‑nkunilnguut ilutughsaghilghiit Mary‑meng esghapagluku nekefqaghlluni aanyan maligtekaat. Sumeghmeggni lliveghmun qiyayaghtughnaqniluku pikaat.

³² Iwernga Mary aglaqaq Jesus‑mun. Esghaghyamigu sikmuulluni manungakun pikaa, “Ataneq, maantekaayaquvek kuugqa tuqunayanghituq.”

³³ Jesus‑em esghaghluku Mary qiyalghii, tamaakutlu Jews‑et maligutkat qiyaaghuullghiit elngaatall seghleliighllakaq.

³⁴ Aaptekii, “Nagun lliivghumasteggu?” Pikaat, “Ataneq, tagi, esghaghyaghtughhu.”

³⁵ Jesus qiyakaq.

³⁶ Enkaam Jews‑et pikat, “Esghaghhu tawateghllak piniqumaagu Lazarus.”

³⁷ Iwernga ilangi pikat, “Jesus‑em naallghusimakumigu ayaakaq, sangan Lazarus tuqunghitesnanightagu?”

Jesus‑em Unguvaghtekanga Lazarus

³⁸ Jesus lliveghmun aglaatkelluku alla seghleliinqigteghllakaq. Lazarus‑em lliivgha sufluulghii, uyghagrugllagmeng paaynga saapluni.

³⁹ Jesus pikaq, “Iqiteggu uyghak.” Martha‑m pikaa, “Ataneq, estamagughtii aghneghet tuqutmineng enkaam tepengeghllagtuq.” (Martha nayakegkanga tuqukam yugem.)

⁴⁰ Jesus‑em pikaa, “Ungipaatkaqamken ugpeghyaquvek esghaghlleqan Kiyaghneghem aghtughyaghqaanghillgha.”

⁴¹ Taagken iqitkaat uyghak paaynganeng lliivghem. Jesus quulmun esghaghluni pikaq, “Ataay, iqamsiqayugvikamken nagataqegkevnga.

⁴² Liisimakaqa quunpeng nagaqughaqaghpenga. Iwernga tawaten piinga yuget uvitemnilnguut apalluqluki, ugpeqesqelluku elpenun kayagtekaatka.”

⁴³ Jesus tawaten piluni, iglagtupiglluni pikaq, “Lazarus, aani.”

⁴⁴ Yuuk tuqukaayalghii aanegkaq. Iiggillu itegiillu iimguvikngalghiit qiipaghaghmeng, gginaallu qantaghluni allaneng qiipaghaghmeng. Jesus‑em pikii, “Qiipaghaat iikiteki enkaam igleghlli.”

Igleghutistet Agghitkat Tuqunnaluku Jesus

⁴⁵ Taakut Jews‑et maligutkat Mary‑mun esghapakaat Jesus unguvaghtilghii, enkaam uglapiglleghhiim ugpeqegkaat Jesus.

⁴⁶ Iwernga ilangi Jews‑et Pharisees‑enun pikat, ungipaatkiit Jesus‑em unguvaghtillghaneng.

⁴⁷ Taagken chief priest‑etlu, Pharisees‑etlu qerngughlluki agghistet aaptekiit, “Sanaqestangam? Taana yuuk allaaghlluwhaghtighllaguuq.

⁴⁸ Nagneghtestekumteggu tawaten, tamaghhaghmi ugpeqelleqaat. Enkaam Rome‑eghmiit tagiluteng naafqelleqaat Temple‑allu yuputlu.”

⁴⁹ Caiaphas‑llu tawanlenguq, high priest‑ngulghii tawani ayumiqulleghmi. Caiaphas‑em pikii, “Elpesi nallukngwaaghtusi!

⁵⁰ Itagnaghataghaghnayaghtuq ataasim yugem tuqumatkesaqumiki yuget, qamaglluteng yumta naafqelleghqiitneng. Iwernga elpesi liigikigataghsi taana.”

⁵¹ Caiaphas ellmineng tawaten akuzimangilnguq, Kiyaghneghem akuzistekaqaa qayughllak high priest‑ngulghii tawani ayumiqulleghmi. Tawaten pilleghmikun uuknaliqutkegkaa Jesus‑mun tuqutkelleqniluki Jews‑et.

⁵² Jews‑nginaat tuqutkegpenaki iwernga qamaglluki Kiyaghneghem avaqutii mingitngalghiit tamangani tuqutkesaghqaqii ataasiightesqelluki nengllugutkullghiit.

⁵³ Taagken aghneghmeng kenlanga Jews‑et igleghutistengita agghitkegkaat naten tuqutelleghqameng Jesus.

⁵⁴ Enkaam Jesus aliilluni alngunak igleghhnaniqaq Jews‑et akulngitni. Iwernga tamaaken aghulaqegkaq kilgaan tunganganun, nemun atilqelghii Ephraim. Maligsaaghtekullghiit tamaantekat.

⁵⁵ Jews‑et Neqenghaghqellghat Passover‑mun kaasaghtulghii, enkaam naken alngunak uglapiglleghhii yuuk aglaghtuutkaq Jerusalem‑emun. Tawani yataaghqegkat neqenghaghqelleghmun ukmangighsalleghmegteggun Liilightuusat pisqellghistun.

⁵⁶ Yuget ivaqaat Jesus enkaam qerngughusameng Temple‑mi aaptekiit ilateng, “Jesus‑llu taginaqaqaa Neqenghaghqemmun? Sumeghpesini sanaqa?”

⁵⁷ Chief priest‑etlu Pharisees‑etlu tugunaluku Jesus liilightuutkaqegkangat yugnun, “Nalighpesi liisimakegkumigu Jesus‑em naantulanga wataghllak ungipaannakefsikut.”