John 10 - New Testament-et Akuzipigestun

Penniighniightallu Penniighillu

¹ Jesus‑em pikii, “Ipa ungipaatamsi, yuuk nagun alngunak mayughluni penniilghutamun iitqumi amigunghilngughqun, teglegniightenguuqlu, wayaghtenguuqlu.

² Yuuk itelghii amigkun penniighniightenguuq, enkaam

³ kelengakistem amigmelnguum qelpeghutaqaa. Penniighet nagaquneghmegteggu menga takwaaqaat. Taam pennighniightem ellmi katam penniini aatghitgun tuqlughteghluki aanutaqii.

⁴ Ellngan katam penniighi qamaglluteng aanleghaanneghata, penniighniighta sivungitni igleghtaquq enkaam pennighet maliglleghaataqaat, qayughllak menga liisimakegkangat.

⁵ Maliggnaanghitaat kina nallukegkaghteng yeghlegi qimaguusaghqaagut, qayughllak nallukegkangat menga.”

⁶ Taaggun ungipaghaatkun Jesus‑em ungipaatkii taakut Pharisees‑et, iwernga liigikumangilkangat sameng pisiitanga.

Pinilghii Penniighniighta

⁷ Enkaam Jesus‑em pilaataqii, “Ipa ungipaatamsi, whanga amiguunga penniighnun.

⁸ Qamaglluteng yuget sivumni tagikat teglegniightenguutlu wayaghtenguutlu enkaam penniighet nagasimangitiit taakut.

⁹ Whanga amiguunga, kina alngunak iitqumi whangamkun yugulillengyaghqaaguq. Enkaam iitghaqluni, aanaqluni, naalkutaqlunillu neghyaghqameng pillequq.

¹⁰ Teglegniighta taawanginaq teglegyaqayuguuq, yugtaghyaqayuguuq, naafqiiyaqayuguuq, iwernga whanga tagikaagunga yuget unguvallengesqelluki unguvallepigmeng.

¹¹ “Whanga pinilghiinguunga penniighniighta. Pinilghiim penniighniightem tuqumatkesaghqaqii penniini.

¹² Akileghtuqayuk penniighniightengunghituq enkaam penniighet ellngan pikengitii. Taam qepghaghtem esghaqumigu amaa tagilghii, qimagyaghqaaguq penniighet unilluki. Taana amaa penniightekan qamaglluteng penniighet mingillequt.

¹³ Yuuk akileghtuqayuk qimagyaghqaaguq, qayughllak temngi qepghaghtengulghii enkaam legan waaknaanghitii penniighet.

^14-15 Whanga pinilghiinguunga penniighniighta. Atam liisimakellghatun whanga, whangallu liisimakellemtun Ata, tawateghpigaq liisimakanka penniighenka, penniighma liisimakaatnga. Tuqumatkelleqanka penniighenka.

¹⁶ Penniightuunga penniilghutamenneghilngughmeng. Ellngitlu tagisaghqapestaaqanka, nagalleqaat meka enkaam penniighenka ataasistun lliighllequt, ataasiq penniighniightekluku.

¹⁷ “Atam piniqaanga qayughllak unguvalqa tuunyukestaghluku ayuqaqa veghhneqiggnaluku.

¹⁸ Kitum alngunak iqinnaanghitaa unguvalqa, qayughllak whangamneng katam tuunyugluku ayuqaqa. Tuunilleghqalguunga unguvallemneng, veghtilleghqalguunga unguvallemneng. Tawaten Atama qelqaqaanga.”

¹⁹ Allameng Jews‑et aaghtiiraaghutkat, Jesus‑em akuzitangi apalluqluki.

²⁰ Uglapiglleghhiit pikat, “Taana yuuk tughneghaam iteghluku nallungughtestekaqaa, sanganꞌngam nagataqesteggu?”

²¹ Iwernga ilangi pikat, “Yuuk tughneghaam nallungughtestekaa tawaten akuzinaanghituq. Tughneghaam esghaghtesagulleqaguu ayaakaq?”

Jews‑et Ighsakegkangat Jesus

²² Uksuulghii, Jerusalem‑emi Jews‑et neqenghaghqelghiit neqamiknaluku Dedicate‑ellgha Temple‑em.

²³ Jesus igleghtengngulghii Solomonꞌs Porch‑mi, tungangani Temple‑em.

²⁴ Jews‑et uvitangighluku pikaat, “Naten tagkaan kukriqutkesnaqsin whangkunnun? Christ‑angukuvek ungipaatngwaaghqut.”

²⁵ Jesus‑em kiimsiqii, “Ungipaatngwaaqaqamsi iwernga ugpeqigataghpesinga. Allaaghlluwhaghtiiqunga Atama Aatghakun liigikesqellunga kinangutka.

²⁶ Iwernga elpesi ugpeghigatusi qayughllak penniiqenghilkemsi.

²⁷ Liisimakanka penniighenka, nagalluku meka maligtaqaatnga.

²⁸ Tuunanka kenlengilngughmeng unguvalleghmeng, enkaam tuqunaanghitngwaaghtut. Kitum alngunak akuqaghnaanghitii iiggemneng.

²⁹ Atama tagivaqaqii penniighenka. Aangeghllagtuq kitumeng alngunak, enkaam kitum alngunak akuqaghnaanghitii Atama iigganeng.

³⁰ Atakullghiigni ataasistun ayuqukung.”

³¹ Taagken Jews‑et tugulaallaataqat uyghagmeng tuqunnaluku Jesus.

³² Iwernga Jesus‑em pikii, “Esghapagaghpesinga uglapiglleghhii aneghneghqilleq apeghiighaqa Atama aghtughyaghqaanghillghakun. Naliitnun taakut aneghneghqilleghma milughpagaataghyugestengnga?”

³³ Jews‑et kiimsiqaat, “Tuqunnaqenghitamken aneghneghqillghen apalluqluku, taawanginaq akuzillghen apalluqaghput. Temngi yuguuten. Kiyaghneghmun seghleghqeghllakaaguten Kiyaghneghtun ayuqniluten piiqngavek!”

³⁴ Jesus‑em pikii, “Liilightuusaghpesini igaqngaaq Kiyaghneghem pillgha whaten, ‘Elpesi kiyaghneghuusi.’

³⁵ Liisimakaput Akuzitet Igaqegkat allangughsaghqaanghitut. Akuzitni Igaqegkani Kiyaghneghem kiyaghneghunimakaki

³⁶ sangamangam seghleghqeghllagumanistengnga Kiyaghneghmun? Apalluqestegguu Kiyaghneghmun Ighneqnilqa? Atam nakmikegkaqaanga, kayagtekaqaanga nunamun.

³⁷ Atuqenghilkumkun Atama piiqegkanga, elngaatall ugpeqenghinnakefsinga,

³⁸ iwernga atuqaqaqa Atama piiqegkanga. Ugpeqenghiteghngaaghpesinga whanga, ugpeqiteki qepghaqanka enkaam liilleqaghsi, liigikelleqaghsi Ata whangamnitutanga, whanga ellngani.”

³⁹ Taagken Jews‑et tugunaqlaataghyaghaat, iwernga Jesus anakaq ellngitneng.

⁴⁰ Taagken Jesus‑em aghvighlukek Kiiwek Jordan‑meng aatqelghiik aglanqigtekaq John‑em paaptaayeviksuwhaallghanun, enkaam tamaantekaq.

⁴¹ Uglapiglleghhii yuuk tagilaghaatkaq ellnganun, pikat, “John allaaghlluwhaghtimangituq, iwernga John‑em apellgha uumeng yugmeng qamaglluni ipanguuq.”

⁴² Tawani uglapiglleghhiim ugpeqegkaa Jesus.