James 5 - New Testament-et Akuzipigestun

Kelengasaalleq Aklungilngughnun

¹ Nagatek aklungilngughni! Qiyakestaghtek, iilqekestaghtek qayughllak seghleliighnaqnguusi.

² Aklungisi aghumaat, aatkasi moth‑em neghumii.

³ Gold‑esillu silver‑esillu anaghtaamaat. Anaghtaallghita ipapighqennaqngwaa ellnginaayugneghulleghsillu, pakigneghulleghsillu nanqigtellengegkufsi. Taagken anaghtaallghem yugusisi naafqelleqii katam kenghestun. Qaywa kingulighnun aghneghnun lliighngaaghpesi, qerngughtimanginaagusi wata aklungighinalusi.

⁴ Talwa akileghtullghitasi qepghaghtesi unataqat piitesighaghvigpesini. Nagateki akuzilgallghit. Atanghem aghtughyaghqaanghiteghllagem nagaquumii akilghuullghit.

⁵ Kiyaghtaalleghpesini whani nunami, aklungitutegpesineng sangwaa alngunak piyukegkaghsi allgeghtaqaghsi efqughhnalusi elpesineng katam. Tawaten pilleghpesigun penniighestun ayuqusi. Penniighet qugilisighat nallukaat qantaghaqun tuqutelleghqaghteng. Nallukestegguu qantaghaqun Atanghem nanqigtilleghqaa?

⁶ Elpesinguut nanqigtistikatlu tuqutistikatlu anaggusimangilngughneng yugneng, ellngita ayakliimangitiisi.

Qelaneneghlluklu Yughalleqlu

⁷ Ugpeqaalgutemni, qelaneghpenasi kenlanga Atanghem taginqigtelleghqaanun. Piitesighaghta usputaqiteggu. Nunami piitesighaghluni qelaneghyukaghpenani utaqiigaquq uksaaghemllu upenghaamllu eslalluwaneng nagustikayugmeng piisaghqaneng.

⁸ Elpesillu qelaneneghllugutek neghyumanginaghlusi qayughllak Ataneq tagiyaghtughtuq.

⁹ Ugpeqaalgutemni, seghlequughpenaki ilasi enkaam Atanghem nanqiggneghillisi. Ellnganguuq Nanqigtista kaasaghtungestalghii.

¹⁰ Ugpeqaalgutemni, neqamikluki uuknaliqistet akuzikat aatghakun Atanghem. Usputaqiteki qelaneghpenateng nuqenneghtuluteng ikfiqelleghmi pikat.

¹¹ Quyanganiiqaput uuknaliqistet qayughllak ikfiqngughngaaghmeng paninang neghyukumanginaqaqaat Ataneq. Nagaquqaqaghsi Job‑em nuqenneghtullgha, quyastellghallu Ataneghmeng ikfiqellgha alpagyan. Enkaam Job‑kun Atanghem liitestiisi nafughtalleghminengllu nangllegtalleghminengllu.

¹² Ugpeqaalgutemni, apeghnaqegkegka una megnunapigtuq. Akeqineghpesini, akeqigpenasi qilagkun, nalighmeng nunakun, nalighmeng sakun alngunak. Piyaghqaakufsi legan aangꞌghhaasi, piyaghqaanghilkufsi legan nakaaghhaasi. Enkaam atuqaqiteki akequsasi, tawaten pikufsi Atanghem nanqiggnaanghitiisi aghyuughyaghqaalusi.

¹³ Kina akulegpesini ikfiqngwaa? Yughaghli. Kina quyangaa? Ilagaghli usuqilleghmeng.

¹⁴ Kina qinuyuwaa? Tuqlughliki Elder‑et enkaam yughaatkellitgu mesiighqelluku Aatghakun Atanghem.

¹⁵ Yughallghem ugpeqilleghqun naallghusaghqaqaa qinuyulghii yuuk. Enkaam Atanghem yugunqwuughtesneqiglleqaa, seghleghqellghillu seghevulleqii.

¹⁶ Tamaaken apalluqluku aapghaqluki seghleghqellesi ilagpesinun, yughaatkututaqlusi naallghutellengesqellusi. Elqughutngalghiim yugem yughallghi iknaqeghllagtut, allgeghutkayuguut.

¹⁷ Elijah yuguuq whangkutestun ayuqelgii. Taakunginaghhaagneng yughaqaq eslallugughtefqaan pisqelluku. Enkaam eslallugughsimangilnguq pingayut ayumiqullghet alla aghvinlek tanqiq ilalluku.

¹⁸ Taagken alla yughaqaq eslallugughtesqelluku. Enkaam eslallugughsalghiimi nuna piitestikaq neghyaghqameng.

^19-20 Ugpeqaalgutemni, una kinguliiguq apeghyukegka elpesinun. Nalighsi ugpeqinaniqan apeghtuusapigneng, kitum kayusighligu ugpeqinqigtelleghmun. Tawaten pikumigu yugulisleqaak seghleghqestem unguvasikek tuqulleghmeng. Kiyaghneghemllu seghuvulleqii taam seghleghqestem seghleghqellelghuteghllagi.