James 4 - New Testament-et Akuzipigestun

Tuunitek Elpesineng Katam Kiyaghneghmun

¹ Saam aaghtiiraaghutestaqisillu, pillugutestaqiisillu? Apalluqaqaghsi, seghleghem piyukelleghpesi pilluwaghaqii pinilghiit piyukellesi.

² Qiliighaqusi avanginneghpesini enkaam yugtaghyaghqaghtaqusi allgeghhnaluki qiliiqegkasi. Qiliighllagaqusi taawanginaq allgeghtepagningitaqasi enkaam aaghtiiraaghutaqusi, pilluwutaqusi. Allgeghusigatusi Kiyaghneq aapsigatutegpesineng.

³ Talwa aapteghngaaghpesigu Kiyaghneq allgeghsigatasi qayughllak seghleghmun atughqaaluki aaptaqelghiisi. Piyukegkaghsi elpesi katam piyukegkaghhiinaghpesinun ayuqaqelghii.

⁴ Ukughsi ataasiighneghilngughni! Liisimakenghistegguu piniqegkufsigu nunam seghlegha, ugumikaghsi Kiyaghneq? Kitum alngunak piniqegkumigu nunam seghlegha anguyaguuq Kiyaghneghmun.

⁵ Sumeghtaghaghpenasi Akuzitet Igaqegkat temnginguniluku whaten pillghat, taghneghak kiyaghlleghhiik ilumnni aqinanaqneghtuuk.

⁶ Tamaaken apalluqluku Kiyaghneghem kayusiitaghaghaqiinkut nuqetutesqelluki piyukelleluput. Iwernga Akuzitet Igaqegkat piit, “Kiyaghneghem kayusighaqii qusevegngalghiit puuru kipullegmun piiqii qukaayugneghet.”

⁷ Tuunlusi elpesineng katam Kiyaghneghmun. Ayaklighteggu tughneghaq, anagniighllequq elpesineng.

⁸ Qantaghalliighaghtek Kiyaghneghmun, Kiyaghneq qantaghalliighaghllequq elpesinun. Seghleghqesteni, uughtughtek! Elpesi ataasiightellghilngughni, ukmangighteki ilusi qaamkut.

⁹ Quyanghitek, asemeghqitek, qiyatek! Nenglaghqiqellesi qiyallghughteki, quyallesi quyanghilnguughtesteki.

¹⁰ Qusevegtek Ataneghmun, quulvaghlleqiisi.

Nanqigtutegpenasi

¹¹ Ugpeqaalgutemni, seghlequughutegpenasi. Kitum alngunak seghlequuqumigu ugpeqaalguteni, seghlequughlleqii Liilightuusat. Nanqigtekumigullu ugpeqaalguteni nanqigtengngwii Liilightuusat. Nanqigtekufki Liilightuusat qaatkengngunghitaten. Yeghlegi Liilightuusat nanqigtistekaaten.

¹² Kiyaghneghhiinaaguq Liilightuusangllaghta, nanqigtisiiluki atuqaqii, enkaam sanganꞌngam nanqigsigu yulguten? Kiyaghneghhiinaaguq yugulighiyaghqaq, naafqiyaghqaq.

Nallukaghput Unaami Salleghqaghput

¹³ Ilasi whaten piiqut, “Aghneghmi nalighmeng unaami tawavek nunamun aghulaqellequnga. Tamaanllequnga ataasiq ayumiqulleq, maningllaghllequnga.”

¹⁴ Iwernga nallukaghsi unaami salleghqaghsi! Talwa nallukaghsi unguvalleghpesi tagtalkaghqaa. Unguvalleghsi takesqughhaaguq, agepsughruggaghestun ayuquq, mulugpenani aviighutkayuk.

¹⁵ Itupill whaten piiqitek, “Atanghem piyukelqegkagu unguvakestaghllequkut enkaam apeghiighutaqellequkut sameng alngunak.”

¹⁶ Tawaten pinghilkufsi aangaayugllequsillu qanangullequsillu. Tamaakut aangaayugtellghet seghleghuut.

¹⁷ Enkaam kitum alngunak liisimakeghngaaghmigu pinitun pilleq atuqenghilkumigu, seghleghqengnguuq.