James 3 - New Testament-et Akuzipigestun

Ulu

¹ Ugpeqaalgutemni, allullusi apeghtughistengughtefqaafsi Kiyaghneghem Akuzitanganeng, qayughllak liisimakaghsi whangkuta apeghtughisteni nanqigtengngwaaghataghaghyaghqaagukut.

² Qamaglluta anaggutaghaneghtughllagtukut. Kina alngunak yuuk akuzilleghmikun anaggusigalnguq elqughutngapestaaghuuq. Yugem elqughutngalghiim talwa yugusinillu agghitkelluku ayuqsaghqaqa.

³ Savikenghaaghhaat sanitmun ayuqluki kuunit qaanghitnun kanaghtaqaput qaatkesqelluta enkaam whangkuta igleghutaqaput.

⁴ Sumeghtaghaatkaghtekiqunllu angyaghpagllaget; aquutasquvegaghhaam qiiftaqii angyalgem piyukellghanun talwa anuqateghllagyaghngaan.

⁵ Ulullu mekestaaghhaaguq iwernga aangaayugneghllaguuq. Kenghhaam uqfilghuteghllaget kumaghsaghqaqii!

⁶ Ulullu kenghestun ayuquq. Esleqngaaq seghleghqelleghmeng enkaam seghleghqumallgha mingitkayuguuq yugusimun. Enkaam naafqiikayuguuq kiyaghtaallemnneng qayughllak hell‑em kenghan kumaghtaqaa.

⁷ Allaaghhiinaat teghikusat, qawaaget, nemeghyat, meghem teghikusii qimugtekayuguut, aaqun yugem qimugtaqii

⁸ iwernga kitum alngunak qimuggnaanghitaa ulu. Neklegigalnguuguq, seghleghuuq, esleqngaaq tuqunalghiimeng poison‑meng.

⁹ Ulu usuqusiqaqaghput Atanemnnun Atamun. Naqam seghleghmeng neghyugtaghaasiqaqaghput yulgutemnnun, Kiyaghneghem ulimaaghitnun ellmisugnilluki.

¹⁰ Usuqilleqlu, seghleghmengllu neghyugtaghalleq aanegkayuguuk ataasimeng qaneghmeng. Ugpeqaalgutemni, tawatesaghqaanghisaghtuq.

¹¹ Pinilghiillu seghleqlu meq maaqegkayuwaak ataasimeng sengngumeng?

¹² Ugpeqaalgutemni, figs‑em uqfiga piitestinaanghituq olives‑meng. Tawateghpigaq grapes‑em vine‑nga piitestinaanghituq figs‑meng. Talwa meghtaghvik taghyughnilngughmeng meqelghii pinilghiimeng meghituq.

Peghqinelleq

¹³ Kina akulegpesinita peghqinelghii, liigikimalghiillu? Tawatetelleni kelgulligu pinitun kiyaghtaalleghmikun, aneghneghqilleghmikunllu qusevegngaghmi.

¹⁴ Iwernga ilugpesigun aqinangakufsillu, ellngiinaayugneghukufsillu iqlengiqutkegpenaan ipapighqelleq, qaghyalleghpesigun liisimanilusi.

¹⁵ Tawatelnguq peghqinelleq qilagtaanghituq, nunameng pinguuq. Kiyaghneghem Taghneghagkeneng pingunghituq, tughneghaghmeng pinguuq.

¹⁶ Nani alngunak aqinallelgunghanillu, ellnginaayugllelgunghanillu taawa kipullginaallelwaaquq, sangwaatlu allaaghhiinaat seghleghet tawantaqut.

¹⁷ Iwernga peghqinelleq qilagtaq kiyang pelungituq. Amalleqa nekeggmetuq, kavyugituq, malighqutaqingaaq, nangllegtaghtuq, pinistaghhiinatun pikayuguuq, taniillghituq, yupiinghuuq.

¹⁸ Nekeggmelleq piitutestun ayuquq. Tamaakut nekeggmelleghmun qepghaqayuget piitesighaghaqiit, enkaam saghnaaqut elqughngalghiimengllu pinilghiimengllu kiyaghtaalleghmeggni.