James 2 - New Testament-et Akuzipigestun

Piniqluki Yulgutesi

¹ Ugpeqaalgutemni, ugpeqingutegpesineng Atanemnneng Jesus Christ‑ameng, Atanghaneng nighughqellghem sumeghtaghaatkegpenaki ilangi yugem megnunaghataghaghniluki ilameggneng.

² Maalghuk yugek iteghyaqayek qerngughutfigpesinun, aallgha aarraghluni, gold‑meng alangqughiitightughluni, aallgha aatkalukaghlluni,

³ taana aarraghngalghii yuuk pikufsigu, “Whagun aqumi pinillghakun aqumutam,” naqam aklumalghii yuuk pikufsigu, “Tawani nekevgha,” nalighmeng, “Aqumi itegama saaghwakun,”

⁴ tawaten pikufsi pakiggulleqasi ilangi yuget enkaam seghleghqellequsi sumeghtaghalleghpesigun.

⁵ Piniqegkamni ugpeqaalgutemni, nagataghtekqun. Kiyaghneghem nakmikegkaqii aklumaalghiit nunami whani ugpeqilleghtusqelluki. Nakmikegkaqii tuguklightenguluki Ataneghpagulleghmineng, akequsaqegkamineng yugminun, piniqingalghiinun ellmineng.

⁶ Iwernga elpesi aklumaalghiit yuget ukaliistaqasi. Liisimakasi aklungilnguut piyaqliighqaqiisi, aglaataqlusi nanqigtivigmun.

⁷ Ellnginguut seghletun akuzitkilghiit quulvaghngalghiimeng aatghaneng Jesus‑em, ateq tuunegkaq elpesinun qayughllak ellngan pikegkangisi.

⁸ Kiyaghneghem Ataneghpagullghan Liilightusaa unaanguq: “Piniqluku yulguten piniqelleghpetun elpeneng katam.” Qaatqegkufsigu taana Liilightuusaq, taawa pinitun piisi.

⁹ Iwernga pakigguskufsiki ilangi yuget seghleghqellequsi, qaatkennaanghitaghsillu taana Liilightuusaq.

¹⁰ Kitum qaatkesaghngaaghmiki qamaglluki Kiyaghneghem Liilightuusii, ataasiq qaatkenghilkumigu, qamaglluki qaatkengngunghitii.

¹¹ Kiyaghneq pikaaguq, “Gelgaghniighpenang.” Whatenllu pikaaguq, “Yugtaghpenang.” Gelgaghniinghisaghngaaghpek yugtaquvek taawa qaatkengngunghitaten Kiyaghneghem Liilightuusii.

¹² Akuzilleghpesigun, salleghpesigun piraamsilusi qayughllak elpesinguusi nanqigsaghqat megnunalleghpigaghqun Liilightuusakun. Taam Liilightuusam itemutkaqiisi atuqesqelluku Kiyaghneghem piyukellgha elpesinun.

¹³ Kiyaghneghem nanqigtekumisi nangllegyagunnaanghitiisi, nangllegyagunneghilkufsiki yulgutesi. Iwernga nangllekegkufsiki yulgutesi Kiyaghneghem nangllegyagulleqiisi.

Ugpeqillghenkuk Aneghneghqillghenkuk

¹⁴ Ugpeqaalgutemni, kina whaten pighngaaghmi, “Ugpeqillelguunga,” iwernga taam ugpeqillghan yugulinaanghitaa atuqenghilkumigu ugpeqilleni aneghneghqilleghmikun. Sasiilleqangam ugpeqillgha aneghneghqillngunani?

¹⁵ Sanayaghetsi ugpeqaalgutsi aatkiisagyaqanllu, neqangisagyaqanllu?

¹⁶ Tuunegpenaan aklukegkaaneng temngi whaten pikufsigu, “Kiyaghneghem quyasnaaghaaten; sunanguq neghyaghqangillu aatkangillu maqalghiimeng,” sasiilleqanꞌngam akuzitesi aneghneghqillngunateng?

¹⁷ Ugpeqilleqlu tawatetuq, aneghneghqilleghqun atuqenghilkumi sasiinghituq.

¹⁸ Kina pillequq, “Elpek ugpeqillelguuten, whanga aneghneghqellelguunga.” Kelguvikinga ugpeqilleghpeneng aneghneghqillghilngughmeng, kelguvikelleqamken ugpeqillemneng aneghneghqillemkun.

¹⁹ Ugpeqan ataasighhaatanga Kiyaghneq. Taana pinightuq! Tughneghaatlu ugpeqaqaat taana enkaangam alingruughaqut, ungelegtaqut qayughllak liisimakegkangat Kiyaghneghem nanqigsaghqaqegkangi.

²⁰ Uyuq nalluuqaq yuuk, paninang liigikigasiguu ugpeqilleq aneghneghqillngunani sasiinghitulanga?

²¹ Sangan Kiyaghneghem tugukliqaqagu sivuneghput Abraham seghleghqumangilngughestun? Tugukliqaqaa Abraham qayughllak ugpeqilleni atuqegkaqaa aneghneghqelleghmikun aghqutkaqngamigu ighneni Isaac aghqefigegnekun.

²² Liigiksiguu? Ugpeqilleqlu aneghneghqilleqlu qerngaagmek qepghaqayuguuk. Tamaaken apalluqluku Abraham‑em ugpeqillgha iighwightekaqaa aneghneghqelleghqun.

²³ Enkaam Akuzitet Igaqegkat whaten pillghit Abraham‑emeng apeghiiqaagut, “Abraham‑em ugpeqegkaqegkanga Kiyaghneq. Tamaaken apalluqluku Kiyaghneghem tugukliqaqegkanga Abraham seghleghqumangilngughestun.” Enkaam Kiyaghneghem Abraham ilakumtaaqniluku pikaqaa.

²⁴ Kiyaghneghem tuguklighaqaa yuuk aneghneghqillghakunllu ugpeqillghakunllu; tugukliigataa ugpeqilleraaghinaakun.

²⁵ Rahab‑llu usputaaguq. Akikikayuguyalghii yugusimineng. Iwernga Kiyaghneghem tugukliqaqegkanga seghleghqumangilngughestun apalluqluku kayusighillgha. Joshua‑m kayagtekaqegkek maalghuk yugek aksaqluku nunangat yuvghiighesqelluku. Yuget ivaghyatkek, Rahab‑em allakun tuumkun anagtestekakek.

²⁶ Enkaangam yugusiq taghneghangunani tuqungaaq, ugpeqilleqlu aneghneghqillngunani tuqungaaq.