James 1 - New Testament-et Akuzipigestun

¹ Ukut latat James‑meng pinguut qepghaghtenganeng Kiyaghneghemllu Atanghemllu Jesus Christ‑am. Lataaqunga Jews‑et ugpeqiitnun mingitngalghiinun tamangani. Quyakamsi.

Ugpelleqlu Nuqenneghtulleqlu

² Ugpeqaalgutemni, quyaaqitek allaaghhiinaghmeng seghleliineghpesini,

³ qayughllak liisimakasi seghleliilleghpesi nanghiiqungwaat ugpeqilleghsi, nuqenneghtughsaghnalusi.

⁴ Taagken nuqenneghtulleghsi nagneghngasteggu. Enkaam tawaten pikufsi angtaniillequsi, iighwighllequsi nuughyaghqaagpenasi.

⁵ Nalighsi peghqinellengyukumi tungsighli Kiyaghneghmeng. Kiyaghneq ighlegiteghllagtuq, quyakusiqinaghluku tuunegkayuwaa qamaglluku yuuk aapleghhii. Kiyaghneghem tuunelleqiisi tungsiqufsi.

⁶ Enkaam aaptek ugpeqillelighluku malghuklillngunaan. Malghuklingalghii imaghllugestun ayuquq, anuqem tengqaataqegkanga.

^7-8 Malghuklingalghii ataasiighsigatuq salleghmikun tamaghhaan. Tawatelnguq yuuk talwa sumeghtaghaghyaghqaanghituq sameng alngunak allgeghulleqniluni Ataneghmeng.

Aklumalghiillu Aklungilnguqlu

⁹ Yeqay aklumalghii ugpeqaalgun quyali quulvaghtestengngalleghmineng.

¹⁰ Yeqay aklungilnguq ugpeqaalgun quyali qusevegtestengngalleghmineng, qayughllak aviighusaghqaaguq piitesighaghestun.

¹¹ Siqineq piinneghmini maatneghqwaaghllagaqelghii, piitesighaat palightesluki. Taagken piitesighaat ifkaquutaqut, pinighniighutaqii. Tawateghpigaq aklungilnguq yuuk sakestaghngaaghmi aviighullequq.

Nanghiiqulleq Kiyaghneghmeng Pingunghituq

¹² Quyanaghhalek yugem nanghiiqulleni nuqetutkayugi. Suflughtekumiki allgeghsaghqaqaa akileghtuusani kenlengilnguq unguvalleq, Kiyaghneghem akequsaqegkaa tuunelleqniluku piniqisteminun.

¹³ Kina alngunak nanghiiqullengegkumi whaten pifqaami, “Kiyaghneghem seghleghqesnaqutkaanga.” Kiyaghneq nanghiiqullengyaghqaghhaanghituq seghleghmeng; tamaaken apalluqluku kina alngunak seghleghqesnaqutkesaghqaqenghitaa.

¹⁴ Iwernga yuuk piyukellelugan nanghiiqullengestaqaa seghleghqelleghmun. Sivukluku piyukellelugan sayugaqaa seghleghqelleghmun, taagken seghleghqellghem naaptaqaa.

¹⁵ Piyukellelugem allgeghtestaqaa seghleghqelleq. Taagken seghleghqelleq anglineghmini tuqullghughtaquq.

¹⁶ Piniqegkamni ugpeqaalgutemni, puughtesighpenasi.

¹⁷ Qamaglluteng pinilghiitlu, sallghwaaghhiilnguutlu tunusat qilagmeng pinguut. Tamaakut Atameng pinguut ulimaghistenganeng qamaglluni nighugem; allangughsigatuqlu, mamlegtestingigatuqlu.

¹⁸ Kiyaghneghem ellngan katam piyukelqaa, tuunaluta nutaghameng unguvalleghmeng ungipaakun ipapighqellghem. Tawaten pikaaguq, whangkuta megnunalleghpigaasqelluta ulimaaghyaggaghmineng.

Nagatelleqlu Qaatkutelleqlu

¹⁹ Piniqegkamni ugpeqaalgutemni, neqamikluku una: tamaghhaghmi nagasukestaghluni piyaghqaaguq, akuziighaghtafqaamillu sakraagaghaghtafqaamillu,

²⁰ qayughllak sakraam kayusiisigatiisi pinitun kiyaghtaalleghmun Kiyaghneghem piyukegkaanun.

²¹ Tamaaken apalluqluku pegteggu qamagtengngwaaghluku allaaghhiinaq seghleq atuqaqegkesi. Qusevegngaghpesi tuguklighteki Kiyaghneghem akuzitangi, piitesighaqii ilugpesigun, qayughllak yuguliyaghqaqiisi unguvasighpesineng.

²² Nagataghesnaghpenaki Kiyaghneghem akuzitangi itupill atuqiteki. Puughtaqusi elpesineng katam nagataghesnaneghpesiki atuqegpenaki.

²³ Yuuk nagataghesnaqumi Kiyaghneghem akuzitanganeng atuqegpenaki, taghneghaghqulghiistun ayuquq

²⁴ tunuskumi tawaninginaq puygulleqaa natetuleni.

²⁵ Kiyaghneghem elqughutngalghiit Liilightuusii itemutestiiqut yugneng. Yugem liinnaqumanginaqumiki taakut Liilightuusat, puygugpenaki atuqegkumiki Kiyaghneghem quyasaghqaqaa sallghakun tamaghhaan.

Maniguutepilleq Kiyaghneghmun

²⁶ Yuuk sumeghtaghaqayuk ugpeqaghllaguniluni, naqam akuzitkesaghqaqenghilkemmineng akuzikayuk temngi puughtengnguuq ellmineng katam. Ugpellgha satngunghituq.

²⁷ Kiyaghneghem Atamta pillghani yuuk ugpellepiilgukumi, kayusighyaghqaqii yaywaalitlu ugingighatlu seghleliinghata, nuqesaghqaaguqlu seghleghaneng nunam.