Hebrews 8 - New Testament-et Akuzipigestun

Jesus, High Priest‑evut

¹ Aapqaghput elpesinun, whaten pisiiguq: tawatelngughmeng high priest‑elguukut aqumgalghii aghenqigneghani saaghwakun Aghtughyaghqaanghitelleghpigaam qilagmi.

² Qepghaatinguuq high priest‑nguluni sanctuary‑mi. Taana tabernacle‑epiguuq Atanghem nekeftekaqaa, yugem nekeftekaqenghitaa.

³ Tamaghhaghmi high priest‑a nakmikegkaaguq tuunisqelluku tunusaneng, teghikusanengllu aghqerraaghesqelluku Kiyaghneghmun. Enkaam High priest‑evutlu sameng tuunyaghqalguyaghqaaguq Kiyaghneghmun.

⁴ Jesus nunamesaqumi priest‑ngunayanghituq, qayughllak priest‑elguuq nunami tuunikayugneng tunusaneng Kiyaghneghmun Liilightuusat pisqellghistun.

⁵ Priest‑et qepghaqaagut sanctuary‑mi, qilagmelngughtun ayuqesugnilngughmi. Salin Moses‑em tabernacle‑a nekeftellghilluku, Kiyaghneghem apaqutkaqaa, “Wataghllak sangwaa qamaglluku ulimanaken tawatengwaaq uspeqellemtun kelgutkamtun elpenun naayghami.”

⁶ Kiyaghneghem Jesus qepghaqalitkaqaa priest‑nguluku. Qepghaqaa megnunaghataghaghtuq Levite‑et priest‑et qepghallghitneng. Tawateghpigaq akequsaghraghaq pinighataghalghiinguuq akequsalugmeng qayughllak taaggun Jesus‑em ilaliighutestekaqii Kiyaghneqlu yugetlu. Pinighataghaghtuq qayughllak tunemiitngaaq akequsatgun pinighataghalghiitgun.

⁷ Sivuliq akequsaq afkuyiisaqan, taawa tuungliinnayaghtuq.

⁸ Iwernga Kiyaghneghem afkuyalgunikaqii yuni whaten piiqngami, “Aghneghet kaallequt, piiq Ataneq, akequsaghraghaq pilleqaqa Israel‑eghmiinunllu Judah‑ghmiinunllu.

⁹ Akequsaghraghaqa tawatennaanghituq akequsaqegkamtun sivunghitnun tasluqluki aghulaqutaqngamki Egypt‑meng. Qaatkusimangitut akequsama pisqellghatun. Enkaam avelghaqiinaqaqanka, piiq Ataneq.

¹⁰ Aghneghet taakut kingungitneng una akequsaghraghaq pilleqaqa Israel‑eghmiinun, piiq Ataneq: Liilightuusanka umyugiitnun kanaghlleqanka, igaqelleqankallu qamagun ilungitgun. Kiyaghneqelleqaatnga, ellngit yukelleqanka.

¹¹ Nalighhiiniita apeghtughyaghqaqenghitaa nunalgutni, nalighmeng nengllugutni liitesqelluku Ataneq, qayughllak qamaglluteng liisimakelleqaatnga, ukalighpigaghhaghneng pingwaaghllagnun.

¹² Seghevulleqanka anaggutellghit, allamengllu neqamiknaanghitanka seghleghqellghit.”

¹³ Kiyaghneghem akuzitkaqngamigu akequsaghraghaq, sivuliq akequsaq atuunanightestekaqaa. Enkaam sangwaa alngunak atuunanighluni aghyughluni mulugpenani aviighullequq.