Hebrews 7 - New Testament-et Akuzipigestun

Priest‑a Melchizedek

¹ Taana Melchizedek umiilkesaghaa Salem‑em, priest‑ekaallu Qulighpigaam Kiyaghneghem. Abraham uteghniimaluku pilluwameng kayaalqughluki umiilget, Melchizedek‑em nallaghluku quyastekaqaa.

² Taagken Abraham‑em tuunegkaa qulaghqellghaneng sameng tamaghhaaneng tugukamineng pilluwami. Melchizedek‑em aatgha maalghugegneng sameng pisilguuq, sivuliq whaten pisiiguq, “Umiilga Elqughutngallghem.” Umiilkegkaatanganeng Salem‑em, aatghan aallgha whaten pisiiguq, “Umiilga Nekeggmellghem.”

³ Igiituq igaqfikegkameng Melchizedek‑em atanganengllu naanganengllu nalighmeng sivunghaneng, talwa allgellghanengllu tuqullghanengllu. Kiyaghneghem Ighneghatun aghuliituq priest‑nguluni quunperugllak.

⁴ Taawa liigikaghsi Melchizedek‑em aangumalleghllaga. Talwa sivuneqsuwhaamta Abraham‑em tuunegkaa Melchizedek qulaghqellghaneng tugulaqamineng pilluwami.

⁵ Priest‑et kingunqii Levi‑em. Liilightuusani, Kiyaghneghem qelqaqii priest‑et qerngughtisqelluki yulgutangitneng qulaghqelleghmeng allgeghtekiitneng. Priest‑et tawaten piiqut, priest‑etlu yugetlu Abraham‑em kingunqeghngiisteng.

⁶ Melchizedek kingunqenghitaa Levi‑em, iwernga tugukliqaqaa qulaghqelleq Abraham‑em tuunyagu. Quyastekaqaallu Abraham, allgeghutkaalghii Kiyaghneghem akequsaaneng.

⁷ Nalluneqniituq taana quyastilghii aangataghaghtuq taagken quyastekameng.

⁸ Priest‑et yuguut tuqukayuget naqamllu allgeghutkaagut qulaghqelleghmeng. Melchizedek‑llu allgeghutkaaguq qulaghqelleghmeng, iwernga kiyaghtengnguuq, Akuzitet Igaqegkat apellghistun.

⁹ Levi allgeghutkaaguq yugneng qulaghqelleghmeng. Pinayalghiikut talwa ellngallu llivikikaaguq qulaghqelleghmeng Melchizedek‑mun Abraham‑kun.

¹⁰ Qaywa Levi allgellghiteghngaaghmi, sivuneghmi Abraham‑em yugusiinitkaaguq Melchizedek‑em nallaghaqngagu Abraham.

Jesus Melchizedek‑etun Ayuquq

¹¹ Liilightuusani igaqngaaq priest‑et kingunqesaghqaqii Levi‑em. Ellngita Liilightuusat apeghtuutkaqiit yugnun, iwernga qepghaqaat Kiyaghneghmun nuughhutkaaguq. Tamaaken apalluqluku yuget aklukaagut priest‑meng Melchizedek‑etun ayuqelghiimeng, Aaron‑etun ayuqenghilnguq.

¹² Levite priest‑et simineghmegteki allaneng priest‑eneng, taawa Liilightuusatlu allangughsaghqaagut.

¹³ Priest‑et quunpeng Levi‑em ramkenganeng pinguut, iwernga Ataneghput ramkenganeng pingunghituq. Kina alngunak Atanemta ramkenganeng pi qepghiigatngwaaghtuq priest‑nguluni aghqefigegni.

¹⁴ Tamaghhaghmi liisimakaat Ataneghput allgeqaaguq ramkenganun Judah‑m. Moses‑em pimangitii kingunghi Judah‑m priest‑nguyaghqaaniluki.

¹⁵ Enkaam tamaakut liigikataghaghaput whateglluwaaq qayughllak ilanga priest‑em Melchizedek‑etun ayuqelghii tagimaaq.

¹⁶ Liilightuusat qelghutkaqaat priest‑a kingunqesaghqaqniluku Levi‑mun. Ataneghput priest‑ngughtekaanghituq Liilightuusat pisqellghitgun, iwernga priest‑ngughtekaaguq aghtughyaghqaanghilngughqun unguvalleghmikun kenletghuusaghqaanghilngughqun.

¹⁷ Akuzitet Igaqegkat pikaalghiit, “Priest‑nguuten quunperugllak, Melchizedek‑em priest‑ngullghatun.”

¹⁸ Tamaaken apalluqluku Kiyaghneghem simiqaqaa Liilightuusaq priest‑eneng ayuqelghii qayughllak kayaalnguqlu atuunghilnguqlu.

¹⁹ Liilightuusat kina alngunak pistesimangitaa Kiyaghneghem piyukellghatun. Enkaam Kiyaghneghem tuunumiinkut pinighataghalghiimeng sighimalleghmeng. Taaggun sighimalleghqun aglaghyaghqaaghtukut Kiyaghneghmun.

²⁰ Taam sighimallghem saaghwakun Kiyaghneq allangughhnaanghilngughmeng akeqimaaq.

²¹ Iwernga tawatelngughmeng akeqillghituq Levi‑em kingunghi priest‑ngughtaqngata. Jesus‑nginaghmun whaten pikaaguq, “Ataneq akeqimaaq, allangughhnaanghitaaklu umyugagni; ‘Elpek priest‑nguuten quunperugllak.’”

²² Tamaaken apalluqluku Jesus‑nguuq ipapighqelleq Kiyaghneghem akequsani pipestaaghlleqaa. Taana akequsaq pinighataghaghtuq akequsaqegkamineng Moses‑kun.

²³ Sivunghani priest‑etuyaghtuq. Tuqunghata ilangita priest‑et nagneghutaqaat qepghaqaat.

²⁴ Iwernga Jesus priest‑nguuq quunperugllak qayughllak unguvallequq quunpeng.

²⁵ Tamaaken apalluqluku Jesus‑em iiwleng yuguliyaqlegwii Kiyaghneghmun aglalghiit ellmikun, qayughllak quunpeng unguvanguuq maniguutunnaluki tamaakut Kiyaghneghmun.

²⁶ Jesus High Priest‑nguuq tuunikayuk sameng aklukegkamnneng. Agleghnaghtuq, avutngituq, pelungituq, aaftengngaaq seghleghqesteneng, Kiyaghneghem quulvaqaqaa qulighpigaghmun qilagmun.

²⁷ Jesus ilangistun high priest‑estun ayuqenghituq. Aghhutanga tamaghhaan high priest‑a aghqerraaghyaghqaaguq, sivukluni ellmi seghleghqelleghminun, taagken yuget seghleghqellghitnun. Jesus tuunaqngami ellmineng katam, aghqutkegkaaguq seghleghqellghitnun yuget, ataasighhaghmeng.

²⁸ Liilightuusani igaqngaaq yuget nakmiighyaghqaaniluki high priest‑ekaghqameng seghleghqegkayugughngaan alngunak yugestun. Kingunganeng Kiyaghneghem apellghan Liilightuusat Moses‑mun, tagtalmi taakwani allangughsaghqaanghilngughmeng akeqikaaguq. Taaggun akeqilleghqun Kiyaghneghem Ighneni High Priest‑ngughtestekaqaa, afkuyangunaan, quunperugllak.