Hebrews 6 - New Testament-et Akuzipigestun

¹ Enkaam liitelteki apeghtuusat angtaniitkanun ugpeqanun ayuqelghiit. Liitngwaaqaqasi apeghtuusuwhaaqat Christ‑ameng ayuqelghiit enkaangam liinneqigsaghqaqenghitasi. Liitngwaaghumaasi atuqsaghqaafqiita pinaluki tamaakut tuqumun ayuqelghiit. Liinneqigsaghqaqenghitaghsillu ugpeqilleghmeng ayuqelghii Kiyaghneghqun,

² paaptaayelleghneng, iigtilleghneng, unguvaghtilleghneng tuqukaneng, Kiyaghneghemllu nanqigtilleghqaaneng yugneng aghyuughyaghqaaluki kenlengunaan.

³ Kiyaghneghem pistekanginkut, apeghtughlleqamsi angtaniitesqellusi ugpeqat.

^4-6 Tamaa ilanganeng yulguuq allgeghutkaayalghiineng Kiyaghneghem nighuganeng, naasiiqaqaatlu qilagem tunusaa. Allgeghutkaagutlu Agleghnalghiigneng Taghneghagneng. Nanghiiqaqiit pinightulangi Kiyaghneghem akuzitangi, nanghiiqaqaatlu Kiyaghneghem aghtughyaghqaanghillgha nunakaghqamelnguq. Taagken ugpeqnaniqumegteggu Christ‑a, avuteghqenqigtepagningiillequt qayughllak qaquuranqigtekangat Kiyaghneghem Ighnegha, kayngusaakegkangatlu yugtuqami.

⁷ Nuna meghaquq eslallugughnneghani, piitestiiquqlu nunivagseghameng atughqameng tamaakunun peksighqikanun nunameng. Enkaam Kiyaghneghem pinighqestaqaa nuna.

⁸ Iwernga nuna piitestimakumi sikughllugnengllu weeds‑nengllu satngunghituq. Yakughnaanituq Kiyaghneghem seghleghunilleghqaaneng, enkaam paneghsaghqaaguq.

⁹ Piniqegkamnni, qaywa elpesinun latatkeghngaamteki tamaakut, sumeghtaghaatkigatamsi tawatellusi. Liisimakaghput pinighataghalghiimeng quyastellelguusi yugulilleghpesigun.

¹⁰ Kiyaghneq elqughutngaan nanqigtiiquq, enkaam puygunaanghitaa qepghalleghsillu, piniqilleghsillu ellminun kayusiitelleghpesigun yugi. Neqamikelleqaallu paninang kayusiitngukesi.

¹¹ Nagneghtesugamsi sagiqlusi qepghaatesqelluku Kiyaghneq unguvalleghpesi tagtalngatun. Enkaam allgeghtepestaaghlleqaghsi sighimakegkaghsi.

¹² Ighsanitalghiingughtesunghitamsi. Yeghlegi tamaakustun ayuqestesugamsi ugpeqilleghmegteggun, nuqetutilleghmegteggunllu allgeghusaghqat Kiyaghneghem akequsaqegkaaneng.

Kiyaghneghem Akequsaa Ayepsugituq

¹³ Kiyaghneghem akeqaqngamigu Abraham, akeqegkaqaa piyaghqapestaaghuniluku. Avangitutanganeng aangataghalghiimeng ellmineng, atuqluku ellmi katam ateni akeqikaaguq.

¹⁴ Abraham pikaqaa, “Quyastepestaaghluten, uglaapiglluku kingunelilleqamken.”

¹⁵ Abraham qelaneghpenani utaqiikaaguq, enkaam allgeghtekaqaa Kiyaghneghem akequsaa.

¹⁶ Kitum neklegsuneghminigu aaghtiiraaghutelleq, akeqiiquq sameng pilleni ipanguniluku atuqluku kitum aatgha ellmineng aangataghalghiim.

¹⁷ Allgeghusaghqat akequsamineng, Kiyaghneghem liigikestesugwii allaangughsaghqaqenghitngwaaghniluki agghilleni. Enkaam akeqikaaguq atuqluku ateni.

¹⁸ Kiyaghneghem tawaten kayemiinkut. Kiyaghneq iqlengiqigatuq akeqineghmini, iqlengiqnaanghituqlu akeqikumi atuqluku ateni ipapighqennaluku piyaghqaqutni. Taakuk allangughteqaghhnaanghituk. Whangkuta anagniiqani Kiyaghneghmun paqniinnaluta, kayemellengeghllagtukut sighimaknaluku Kiyaghneghem akequsaa.

¹⁹ Taana sighimalleq uyghiitnguuq unguvasimnnun, paqnaniighutestiinkutlu ayepsugitestiinkutlu. Taana sighimalleq iteghtuq agleghnalleghpigaghmun nemun safkaaghutem awatanganilngughmun.

²⁰ Tawavek Jesus iitqaaguq sivumnni whangkuta apalluqluta. High Priest‑ngughtekaaguq quunperugllagmun, Melchizedek‑em priest‑ngumallghatun.