Hebrews 4 - New Testament-et Akuzipigestun

Kiyaghneghem Akequsaa Meghnaalilleq

¹ Kiyaghneghem akequsaa yugnun aghuliituq iitghesqelluki meghnaalivigminun. Iwernga alingelta luuraq nalighsi nuughhunnayukan iteghpenani meghnaaliviganun.

² Pinilghii ungipaq Kiyaghneghem meghnaaliviganeng ayuqelghii nagaquqaqaghput katam tamaakustun yugestun Moses‑em maghyaghquqiistun Egypt‑meng. Iwernga pinilghiim ungipam kayusiitellghitii qayughllak ugpequmangitaat nagaquqaghteng.

³ Whangkuta ugpelghiini iteghllequkut Kiyaghneghem meghnaaliviganun. Iwernga Kiyaghneghem akuzitkegkaqii ugpeqillghilnguut whaten, “Sakritngulunga akeqikaagunga allangughsaghqaanghilngughmeng. Whaten piinga, ‘Iteghnaanghitngwaaghtut meghnaalivigkamnun.’” Tawaten akuzikaaguq qepghaqani apeghiiqaqeghngaaghmiki ima nunangllalleghmineng.

⁴ Naantuq Akuzitni Igaqegkani igaqluni maaghraghvinliitanga aghneghem whaten, “Kiyaghneq meghnaalikaaguq tamaaghhaaneng qepghaqamineng maaghraghvinliitangani aghneghem.”

⁵ Akuzitnillu Igaqegkani Kiyaghneq pikaaguq, “Iteghnaanghitngwaaghtut meghnaalivigkamnun.”

⁶ Paninang ilangi yuget iteghllequt Kiyaghneghem meghnaaliviganun. Iwernga nagaquusuwhaaqat pinilghiimeng ungipameng, itellghitut meghnaalivigmun qayughllak qaatkutellghilnguut Kiyaghneghmun.

⁷ Tamaaken apalluqluku Kiyaghneghem nekegtekaqaa ilanga aghneq, atilqelghii “Aghneghmi.” Kingurugllaganeng Moses‑em, Kiyaghneghem akuzitkegkaqaa taana aghneq David‑kun. Uteghpagtanka David‑em igaqegkii Akuzitni Igaqegkani whaten, “Aghneghmi whani nagaququfsigu Kiyaghneghem menga, pineghlliqegpenasi sivuneghpesistun.”

⁸ Joshua‑m maghyaghqullghitii yuget tawavek meghnaalivigmun. Liisimakaghput qayughllak taam kingunganeng Kiyaghneghem akuzitkegkaqaa ilanga aghnegha meghnaalillghem.

⁹ Tamaaken apalluqluku taawa Sabbath‑a aghuliituq, meghnaalivik Kiyaghneghem yugitnun.

¹⁰ Kina alngunak iitqumi Kiyaghneghem meghnaaliviganun, meghnaalillequq qepghaqamineng katam tawaten Kiyaghneghem meghnaalillghatun.

¹¹ Tamaaken apalluqluku iteghnaqeghllagelta Kiyaghneghem meghnaaliviganun. Qaatkenghitefqaan pilteggu Kiyaghneq sivunemta pillghistun.

¹² Akuzitangi Kiyaghneghem unguvaat qepghaagut. Iipgataghaghtut alngunak inglugtun ipegsaqaneng savigpagneng. Kaaputkayuguut qamaverugllak unguvasimllu taghneghamllu kaatutngallghegkenun, naflutlu paatghetlu kaatutngallghitnun. Kiyaghneghem akuzitangi nanqigtikayuguut yugem sumeghtaghallghanengllu sanaqellghanengllu.

¹³ Sangwaa qamagtengngwaaghluni Kiyaghneghem ulimaagha iighnganghituq Kiyaghneghmeng. Aliitut, whateghlluwaaghuutlu iyegkeni. Ellnganun qayvighqesaghqaqaput salleput qamaglluki.

Jesus High Priest‑eghllakaghput

¹⁴ Tamaaken apalluqluku High Priest‑elegllaguukut qilagmun mayuqameng. Jesus‑nguuq, Ighnegha Kiyaghneghem. Enkaam ugpeqilleghmetekestaalta aapqamnni yugnun.

¹⁵ High Priest‑emta liigikngwaaqaqii kayaalliqusiput, qayughllak nunamelluni nanghiiqullengegkaaguq whangkutestungwaaq. Naqamllu seghleghqumangituq.

¹⁶ Enkaam tetullngunaamta aglaalta umiilgusignun aqumutagkenun Kiyaghneghem, allgeghusaghqaaluta nangllegtallghanun. Tawani nangllekelleqiinkut, kayusighlleqiinkutlu aklukillemnni.