Hebrews 3 - New Testament-et Akuzipigestun

Jesus Aangataghaghtuq Moses‑meng

¹ Enkaangam ugpeqaalgutemni, Kiyaghneghem aaftekaqiisi ellminun yugulusi, tuqluqaqiisillu ellminitesqellusi qilagmi. Sumeghmikluku Jesus. Kiyaghneghem kayagtekaa Apostle‑ngulukullu High Priest‑ngulukullu aapghaqegkefut ugpeqniluku.

² Jesus ataasighmetkaaguq Kiyaghneghmun nakmikisteminun, katam Moses ataasighmetkaq Kiyaghneghmun qepghaataqngamigu Kiyaghneq mangteghaani.

^3-4 Tamaghhaghmi mangteghaq kitumeng ulimaghistelgulghii, iwernga Kiyaghneghem Jesus‑kun sangwaa tamaghhaan ulimaaqaa. Yuget usuqataghaghyaghqaqaat Jesus pakiggulluku Moses‑meng, qayughllak yuget usuqelleqaat mangteghangllaghta pakiggulluku mangteghameng.

⁵ Moses ataasiighmetkaaguq qepghaghta Kiyaghneghem mangteghaani, ungipaatkaqiillu yuget Kiyaghneq sameng apeghyaghqalguniluku taaganiqaaghaq.

⁶ Iwernga Christ‑a ighneghuluni ataasiighmetkaaguq igleghutista Kiyaghneghem mangteghaani. Whangkuta mangteghaqiinkut Kiyaghneghem, ilutumanginaqumta, ipapighqutkumanginaqumteggullu sighimakegkaghput.

Qaatkunneghitellghat Israel‑eghmiit

⁷ Enkaangam katam tawaten Agleghnalghiik Taghneghak piik, “Aghneghmi whani nagaququfsigu Kiyaghneghem menga,

⁸ pineghlliqegpenasi sivuneghpesistun. Tamaani aghneghni kilgaanilluteng qaatkesugumangitaat Kiyaghneq, nanghiighsaghaqaqaatlu nuqenneghtullgha.”

⁹ Kiyaghneq piiq, “Tamaani 40 ayumiqulleghni sivuneghpesi esghaqaqeghngaaghmegteki apeghiiqanka, paninang nanghiighsaghaqaqaatnga.

¹⁰ Tamaaken apalluqluku tamaakut yuget sakritestekaqaatnga. Enkaam pikaagunga, ‘Iiwleng ataasiighmesigatut whangamnun, liigikigatutlu natelluku kiyaghtesqesullemneng.

¹¹ Sakritngulunga akeqikaagunga allangughsaghqaanghilngughmeng.’ Whaten piinga, ‘Iteghnaanghitngwaaghaat meghnaalivigkaq yataaghqegkaqa ellngitnun.’”

¹² Ugpeqaalgutemni kelengalusi, seghleghmeng sumeghtaghalleghnengllu ugpenghitelleghnengllu, iqitutestegpenasi unguvalghiimeng Kiyaghneghmeng.

¹³ Iwernga aghhutanga tamaghhaan kayemutaqitek pilleghqalgumaluku atilqelghiimeng “Aghneghmi.” Tawaten pinghilkufsi taawa seghleghqellghem puughllusi pineghllungllaghlleqiisi.

¹⁴ Iwernga ataasiighmelkumta unguvallemta kenlenganun, neghyukluku Kiyaghneq ugpeghyuwhaallemtestun, taawa Christ‑am pilgutkelleqiinkut ellmi pimineng.

¹⁵ Akuzitni Igaqegkani igaqngaaq, “Aghneghmi nagaququfsigu Kiyaghneghem menga, pineghllugugpenasi sivuneghpesistun qaatkusimangilnguut Kiyaghneghmun.”

¹⁶ Kinkungaawat nagaquutkat Kiyaghneghem menganeng naqam qaatkutegpenateng? Tamaakunguut yuget Moses‑em maghyaghquqii Egypt‑meng.

¹⁷ 40 ayumiqulleghni kinkut Kiyaghneq sakritestatgu? Tamaakunguut seghleghqelluteng tuqulaghaatkat kilgaani.

¹⁸ Kinkunun Kiyaghneq akeqikaawa iteghnaanghitngwaaghniluki meghnaalivigkamun yataaghqegkaminun? Akeqegkaqii qaatkusimangilnguut ellminun.

¹⁹ Taawa liigikaghput iteghpagningitkaagut tawavek meghnaalivigmun qayughllak ugpeqenghilkangat.