Hebrews 2 - New Testament-et Akuzipigestun

Kiyaghneghem Yugulighilleghllaga

¹ Tamaaken apalluqluku sumeghtaghaatkengngwaaghelteki ipapillghet nagaquqaput luuraq waaknaniqestaghnayukamteki.

² Kiyaghneghem apeghtuusii ipanguut; aapqaqii yugnun yaqulegteggun. Kina alngunak qaatkunneghilnguq apeghtuusanun, Kiyaghneghem aghyuughlleqaa aghyuulleghqaghtutalangatun.

³ Enkaam ighsakumakumteggu Kiyaghneghem yugulighilleghllaga anagpagningitaghput aghyuughilleghqaa. Atanghem apeghyuggaaqaqaa taana yugulilleq. Taagken tamaakut nagaquutkat ellnganeng, ipapighqaat whangkunnun.

⁴ Kiyaghneghemllu ipapighqegkaqaa whangkunnun. Tawaten pikaaguq atuqelleghmikun allaaghhiinaat allaaghlluwhaghtillghet, uyegtelleghmikunllu tunusii Agleghnalghiim Taghnegham piyukelleghmitun.

Jesus, Yugulillengestikaq Whangkunneng

⁵ Kiyaghneghem nakmikellghitii yaqulget igleghutisqelluki sivumelngughmun nunakaghqamun. (Taananguuq nuna akuzitkegkefut.)

⁶ Nalighneghitni Akuzitni Igaqegkani whaten igaqngaaq, “Kiyaghneq, sangaawa yuuk umyugaghmikaqegken, nalighmeng ighnegha yugem aflengakegkan?

⁷ Ulimaaqan ukavaqaanlluku yaqulegneng, qaghpaliqaqan nighughqelleghmengllu quulvalleghmengllu,

⁸ igleghutistengllaqaqanllu samun tamaghhaanun.” Tawanillu Akuzitni Igaqegkani igaqngaaq, Kiyaghneghem ulimaaqaa yuuk “igleghutistenguluku samun tamaghhaanun.” Taana whaten pisiiguq sangwaa qamaglluni ilatngaaq igleghutillghanun. Naqamllu salin esghiigataghput yuuk igleghutilghii samun tamaghhaanun.

⁹ Iwernga esghaghaghput Jesus! Kiyaghneghem natengiighhaq ukavaghtestekaqsaghaa yaqulegneng. Maaten esghaghaghput qaghpaluni nighughqelleghmengllu quulvalleghmengllu qayughllak ikfiqluni tuqukaaguq. Kiyaghneghem piniqellgha apalluqluku, Jesus tuqukaaguq tamaghhaanun.

¹⁰ Kiyaghneghuuq ulimaghikaq sameng tamaghhaaneng ellminun, nagneghastengngwiillu tawatelluki. Itagnapigtekaaguq Kiyaghneghem pinighsaghwaaqaqaa Jesus ikfiqelleghqun piinlightenguluku yugulillghitnun. Enkaam Jesus‑em tagisaghqaaghtekaqii yulghutet nighughqelleghmun.

¹¹ Jesus‑em pelungighsaqaqii yuget seghleghqellghitneng. Enkaam ellngallu tamaakutlu pelungighsaqii, qamaglluteng Atakaat Kiyaghneq. Tamaaken apalluqluku Jesus‑em kayngukigatii atighyaghqaaluki anglegutnguluki.

¹² Jesus‑em pikaqaa Kiyaghneq, “Apeghlleqaqa aatghen anglegutemnun; usuqelleqamken qerngughutkata.”

¹³ Whatenllu pikaaguq, “Neghyukelleqaqa Kiyaghneq.” Pikaaguqlu, “Whaantunga, taghnughhaatlu Kiyaghneghem tagivaqii whangamnun.”

¹⁴ Taakut taghnughhaat yuguut kemekralgetlu aalguutlu, enkaam Jesus ellngistun lliiqaaguq. Tawaten pikaaguq tuqunaluni naafqennaluku Tughneghaq, aghtughyaghqaanghillelek tuqumun.

¹⁵ Enkaam tawaten pilleghmikun itemutkaqii tamaakut qepghaghtelaaghestun ayuqelghiit unguvalleteng qamaglluki qayughllak alikngukangat tuqulleq.

¹⁶ Whateghllugaaghuuq yaqulgunghitut Jesus‑em kayusiqii, iwernga Abraham‑em kingunghi kayusighaqii.

¹⁷ Tamaaken apalluqluku Kiyaghneghem Jesus lliightestengngwaaghyaghqaqaa whangkutestun. Tawaten qepghaasaqlegwaa Kiyaghneq High Priest‑nguluni, nangllegtaghlunillu ataasiighmellunillu. Enkaam tuuniyaqlegughtekaaguq aghqutmeng Kiyaghneghmun seghevutesqelluki yuget seghleghqellghit.

¹⁸ Jesus ikfiqegkaatminengllu nanghiiqullengegkaatminengllu, kayusighyaqlegwii tamaakut nanghiiqullengelghiit.