Hebrews 13 - New Testament-et Akuzipigestun

Ugpeqat Kiyaghtaalleghqaat

¹ Piniqekestaghteki ugpeqaalgutesi.

² Upughamanginaghtek aqiiyagnun qayughllak ilangita upughataqiit nallukluki yaqulgutangi.

³ Neqamikluki anusimingllaghvigmelnguut, nikimqun elpesillu anusimingllaghvigmetellghistun. Neqamikluki ikfiqngalghiit, nikimqun elpesillu ikfiqelghiistun.

⁴ Tamaghhaghpesi siivakiteggu nengughutelleq enkaam ugitlu nulighhetlu ataasiighmetullit. Kiyaghneghem nanqigsaghqaqii gelgaghniilghiit, tamaakutlu ilanganeng sex‑kun seghleghqelghiit.

⁵ Kiyaghtek pakigneghugpenasi manimun, itagnaghaqiteklu satutalegpesistun. Kiyaghneq pikaaguq, “Uninnaanghitngwaaghamsi; peggnaanghitngwaaghamsi.”

⁶ Enkaam tetullngunaamta whaten pilta, “Ataneq kayutkaqa! Alingnaanghitunga yuget salleghqiitneng.”

⁷ Neqamikluki igleghutistesi ungipaqikat elpesinun Kiyaghneghem akuzitanganeng. Neqamikluki naten kiyaghtekaatangi enkaam ugpellelgunaqitek ellngistun.

⁸ Jesus Christ‑a almesiqaqaa ighivgaq, aghneghmi, quunperugllaklu.

⁹ Iqitutestegpenasi ipapilleghmeng allaaghhiinaghnunllu allakaayagnunllu apeghtuusanun. Nangllegtallghakun Kiyaghneghem ayepsugighsaghteki ilusi, nakaan qaatkelluki Liilightuusat neqneng ayuqelghiit. Taakut neqet Liilightuusiit qaatkegkufsiki ayepsugighsaghnaanghitiit ilusi.

¹⁰ Priest‑et qepghalghiit tabernacle‑mi ineghtekaagut neghelleghqiitneng aghqutkegkameng aghqefimteggun.

¹¹ High Priest‑em tagitaqii aawit teghikusat Agleghnalleghpigaghmun aghqutkennaluki seghleghqelleghnun. Iwernga kemegkwaaghit teghikusat neghllagmeng iqitulluki paneghtaqiit.

¹² Tamaaken apalluqluku Jesus‑llu iqitutkaaguq neghllagmeng. Tawani tuqukaaguq, pelungighsaghnaluki yuget seghleghqellghitneng ellmi katam aawmineng.

¹³ Enkaangam neghllagmeng whangkutallu aglaalta Jesus‑mun, seghletun akuzitkesqelluta katam ellnga seghletun akuzitkellghistun.

¹⁴ Nunami whani quunpekaghqameng neghllagitukut, iwernga utaqangwaaghput neghllak tagiyaghqaq.

¹⁵ Jesus‑kun iiwleng aghqutkilta Kiyaghneghmun. Aghquteput usuqilqaput apenemteggu Jesus Atanghuniluku.

¹⁶ Puygugpenaan pinitun pilleq, tuunutaqiteklu qayughllak tamaakut aghqutnguut efqughnalghiit Kiyaghneghmun.

¹⁷ Qaatkiteki igleghutistesi atuqluki qelghusiit. Kelengakinguut unguvasighpesineng liisimakluku Kiyaghneghmun nanqigsaghqaatseng. Quyanghitestegpenaki igleghutistesi, itupill qaatkelleghpesigun qepghaqateng pilleqiit quyakusiqluki. Qaatkenghilkufsiki kayusiitepagningitiisi.

¹⁸ Yughaatkitekut. Liisimakukut umyugamta anaggutellghinniinkut, qayughllak iiwleng piyukelqaghput elqughutngalghii piyaghqaaluku.

¹⁹ Taakunginaghhaagneng kayagtamsi yughaatkesqellunga qantaghaqun elpesinun uteghnighnalunga.

Taaqniita Yughaq

²⁰ Kiyaghneghem nekeggmellelitistem Ataneghput Jesus unguvaghtestekaqaa tuqulleghmeng. Enkaam aawmikun Penniighniighteghllagughtekaaguq penniighnun. Aawan atuuyaghqaaghtestekaqaa Kiyaghneghem quunpekaghqaq akequsaa.

²¹ Yughaghtunga Kiyaghneghmun tuunesqellusi sameng tamaghhaaneng pinilghiimeng elpesinun piyukellgha pisqelluku. Jesus Christ‑akunllu ilugpesinun Kiyaghneghem piligu efqughnalghii ellminun. Christ‑a usuqellengli quunperugllak kenlengunaan. Amen.

Naangniitet

²² Ugpeqaalgutemni, nagatngwaaqaghteki latanka qayughllak kayemyugaqamsi. Tamaaken apalluqluku takestaaghhaaluku lataamsi.

²³ Liisimakesugamsi ugpeqaalgutemnneng, Timothy‑meng, aanesimaaq anusimingllaghvigmeng. Kaatelghaghtughyaqan qerngaamtung esghaghyaghtughlleqamsi.

²⁴ Quyakaghhnakesi qamaglluki igleghutistesi, qamagllukillu Kiyaghneghem yugi. Ugpeqaalgutetlu Italy‑meng pit quyakaghhnakiisinguq.

²⁵ Kiyaghneghem piniqingalghii kayusillgha tamaghhaghpesinilli! Amen.