Hebrews 12 - New Testament-et Akuzipigestun

Kiyaghneq Whangkuta Atavut

¹ Qamaglluteng tamaakut yuget liigikestiinkut ugpeqilleghmeggneng naten kiyaghtelleghmegteggun. Maaten uvitangighluta esghapagaqiinkut. Enkaam kilgaaqustestun iqitelteki qamaglluki uqigkutat, seghleghqellghetlu iglagullghiit whangkunnun. Sagiqlutangam kilgaaqulta sivumnnilngughmun,

² esghaamakluku Jesus, piinlighistengallu apeghiighistengallu ugpeqillemta. Kayngunaghtuq tuqulleghqaq qaquurakun, iwernga Jesus‑em pitkumangitaa kayngusaghaatelleq. Yeghlegi nakmiiqaaguq ikfiqnaluni qaquurakun apalluqluku quyalleq allgeghsaghqani. Enkaam maaten aqumgaaq aghenqigneghani Kiyaghneghem.

³ Sumeghtaghaatkaghtegguqun Jesus. Iilqayugumangituq qaywa seghleghqestet ugumikeraaghllaghngaatni. Tawaten elpesillu ilutullghiinnaanghitusillu iilqayugnaanghitusillu.

⁴ Seghleghqenghinnaqutkelleghpesi salin yugnun tuqutesigatiisi.

⁵ Puygustekii ilutughsaasit akuzitet ungipaatilghiit Kiyaghneghmun ighneqnilusi? Akuzitni Igaqegkani igaqngaaq, “Ighnemni, avelghaqiinaghpenaan Atanghem nallghusanghaten, iilqayugpenangllu aghyuunghaten.

⁶ Qayughllak qamaglluki piniqegkani Atanghem apeghtughaqii qaatkesqelluni, aghyuughaqiillu tugukliqani avaqutaaluki.”

⁷ Tuguklighaqiteggu Kiyaghneghem aghyuughillgha qayughllak ighneqelghiistun piiqiisi. Qamaglluki avaqutateng atangita aghyuughaqiit nallghughqennaluki.

⁸ Qamaglluteng avaqutat aghyuullengaqut. Aghyuullengenghilkuvek taawa atangilnguuguten enkaam avaqutapikenghitaaten.

⁹ Taam saaghwakun, atamta nunamelnguut aghyuughaqiinkut apeghtughnaluta qaatkesqelluteng, iwernga paninang quulvaghaqaput. Enkaam Atavut qilagmelnguq qaatkataghaghyaghqaqaghput unguvanaluta.

¹⁰ Atamta nunamelnguut aghyuughaqinkut natengiighhaq, sumeghmeggni elqughlluku aghyuughinguniluteng. Iwernga Kiyaghneghem aghyuughaqiinkut pinighqelleghqamnnun pelungiightesqelluta ellmitun.

¹¹ Quyaniituq aghyuullengnemta qayughllak aqnightaqegkanginkut. Iwernga tagtalmi, liitfiknemteggu, nekeggmellengaqukut qayughllak kiyaghsagutaqukut elqughulluta.

Apeghtughallghetlu Kelengasaallghetlu

¹² Kevegteki iiggesi qughaghngalghiit, taagken iknaqughsaghteki kayaalnguut segesqusi!

¹³ Taklaghtiki tuumngi tutmalleghpek, taagken kayaalnguq ighun aanqaghnaanghituq naflumineng, iwernga naallghullequq.

¹⁴ Kiyaghhnaqitek nekeggmetullusi tamaghhaanun yugnun, kiyaghhnaqiteklu seghleghqellngunasi. Kinkut alngunak pelunginneghilnguut esghaghnaanghitaat Ataneq.

¹⁵ Esghaamakullusi kinkut alngunak luuraq allgeghhneghisaaghaat Kiyaghneghem nangllegtallgha. Nagusaqunaanllu sungaghnilnguq akuq seghleliighqiiluni naafqiiyaghqaq yulghutmeng.

¹⁶ Esghaamakullusi kinkut alngunak seghleghqesaaghtut sex‑kun, nalighmeng kinkut alngunak quulvaghinghisaaghtut Kiyaghneghmeng Esau‑tun. Akikegkaqegkanga pagitaghqani ataasighhaghmun neghyaghqamun.

¹⁷ Liisimakaghsi taam kingunganeng, allgeghsugaqngamigu atami quyastellgha, atangan ighsakegkaqaa. Esau‑m allangughtepagningitkaqaa apeghiiqani, qaywa qunituumaghmi tungsighngaaghmigu atami quyastillgha.

¹⁸ Sivuneghpesistun ayuqenghitusi Mount Sinai‑mun pikastun. Esghaghyaghqaat, saafsaghqaatlu. Tawani mamlegllagukaq, naafteghllagukaq, naayghaqlu kumaghughllagulghii.

¹⁹ Nagaquqaat qalghightaan qalghighlleghhii, nagaquqaatlu Kiyaghneghem menga. Iwernga nepiiqiisqegkaat,

²⁰ qayughllak tuguklighyunghilkangat qelghillgha whatelnguq, “Taana naayghaq, yugem nalighmeng teghikusam saaftekumigu, tuqusaghqapestaaghuuq milughpagaatameng.”

²¹ Moses‑em esghaqaa kakavaataghnapiglleghhii repall whaten pikaalghii, “Ellngaatall ungelegtunga alingruughem.”

²² Iwernga katam elpesi tagikaagusi Mount Zion‑mun, qilagem Jerusalem‑nganun, neghllaganun unguvalghiim Kiyaghneghem. Tagikaagusi kestekaanghilngughnun yaqulegnun qerngughutkanun quyallelighllagluteng.

²³ Tagikaagusi qerngughutellghitnun qamagtengngwaaghluteng ugpeqat ighneqsuwhaaghestun ayuqelghiit. Qilagmi aatghit igaqngaat igatgun. Tagikaagusi Kiyaghneghmun nanqigtistengitnun qamagtengngwaaghluteng yuget, taghneghiitnunllu elqughutngalghiit yuget iighwightestekanun.

²⁴ Tagikaagusi Jesus‑mun, ellngakun Kiyaghneq akequsaghraghangllaqaaguq. Tagikaagusillu sivillagtaatkamun aawanun Jesus‑em. Pinighataghaghtuq Abel‑em aawaneng, qayughllak Kiyaghneghem seghevutii seghleghqellghet Jesus‑em aawakun.

²⁵ Enkaam kelengatek, nagasunghitegpenaan Kiyaghneq akuzilghii. Sivunemta nagasunghitkaqaat kelengasaaghillgha nunami whani, enkaam anagumangitaat aghyuughillgha. Whangkuta aghyuughataghaghlleqiinkut nagasunghilkumteggu kelengasaallgha qilagmeng.

²⁶ Kiyaghneq akuziiqngami Mount Sinai‑meng, mengan ufsugutkaqaa nuna. Iwernga maaten akeqimaaq whaten, “Ataasighhaghmeng ufsugunneqiglleqaqa nuna, iwernga qilaklu ufsugulleqaqa.”

²⁷ Tawaten akuzillghan, “Ataasighhaghmeng ufsugunneqiglleqaqa nuna,” liigikestengngwaaghiinkut whaten, sangwaat qamaglluki ulimaani, Kiyaghneghem iqilleqii ufsugusaghqat. Tamaakunginaghhaat ufsugutepagningilnguut tamaanllequt quunperugllak.

²⁸ Tamaaken apalluqluku iqamsiqayugvikelteggu Kiyaghneq qayughllak tuunegkanginkut ataneghpagulleghmeng ufsugusaghqaanghilngughmeng. Enkaangam maniguulteggu Kiyaghneq efqughnalkegkaatun alingellelighlutallu quulvaghillelighlutallu,

²⁹ qayughllak Kiyaghneghput naafqiilghiinguuq keneq.