Hebrews 11 - New Testament-et Akuzipigestun

Ugpeqilleq

¹ Ugpeqillghem liisimakestengngwaaghiinkut allgeghsaghqaqniluku sighmakegkaghput, ipapighqusiguq esghaghyaghqaqenghilkemnnun.

² Ugpeqilleghmegteggun ayumiim yugi itagnaqellengegkaagut Kiyaghneghmeng.

³ Ugpeqilleghqun liigikegkaqaghput Kiyaghneghem ulimaaqaa nuna akuzitmikun. Tamaakut aliilnguut ulimaaghuut esghaghyaghqaanghilngughmeng.

⁴ Ugpeqilleghqun Abel tuunikaaguq Kiyaghneghmun tuguklighyugnaghataghalghiimeng aghqutmeng Cain‑em aghqutkegkaaneng. Kiyaghneq pikaaguq Abel elqughutngalghiinguniluku yuuk ugpeqillgha apalluqluku. Kiyaghneghem ipapighqegkaqaa Abel elqughutnganiluku tuguklilleghmikun tunusii. Ugpeqilleghmikun Abel paninang akuzinguuq, tuqukaayaghngaaghmi.

⁵ Upeqilleghqun Enoch mayuutestekaaguq qilagmun enkaam nanghiillghitaa tuqulleq. Kitum alngunak naalkellghitaa qayughllak Kiyaghneghem tugukaqegkanga. Mayullghilluni qilagmun, igaqngakaaguq Enoch‑em efqughtekaqaa Kiyaghneq.

⁶ Ugpeqillngunani kitum alngunak efqughtepagningitaa Kiyaghneq. Kina alngunak tagiyukumi Kiyaghneghmun ugpeqepestaaghyaghqaqaa Kiyaghnelguniluku, akileghtughyaghqaqiillu ivaghipiilghiit ellmineng.

⁷ Ugpeqilleghqun Noah‑m nagatkaqii Kiyaghneghem kelengasaaghutkii tamaakut salin pingigalluki. Enkaam qaatkelluku Kiyaghneq angyaghpangllaqaaguq nengllugutni yugulinaluki ulevelleghmeng. Tawaten pilleghmikun Noah‑m nunam yugi nanqigtestekaqii Kiyaghneghmun aghyuughesqelluki. Ugpeqilleni apalluqluku Noah‑m allgeghtekaqaa elqughutngalleq Kiyaghneghmeng.

⁸ Ugpeqilleghqun Abraham‑em qaatkegkaqaa Kiyaghneq tuqlughaqngatni aghulaqesqelluku ilanganun nunam. Kiyaghneghem akequsaqaa taana nuna ellnganun tuunelleqniluku. Enkaam unitkaqaa ellmi nunani nallukluku navek pinaqutni.

⁹ Ugpeqilleghqun kiyaghtekaaguq nunataaluni nunami Kiyaghneghem akequsaqegkaani. Tiintanitkaaguq katam Isaac‑enkuk Jacob‑enkuk pillghegketun. Elkegkenkallu allgeghtekaqaak Kiyaghneghem akequsaqegkaa taana nuna.

¹⁰ Abraham tawaten pikaaguq qayughllak utaqiingulghii kiyaghhnaluni neghllagmi tunemaghtuqami. Kiyaghneghuuq uspeqistengallu ulimaghistengallu neghllagem.

¹¹ Abraham nanevgaghllaghngaaghmi, Sarah‑llu qumingyaghqaanghiteghngaaghmi, paninang ugpeqilleghqun Sarah qumingegkaaguq, qayughllak neghyukegkaqaa Kiyaghneghmun pilleqniluku akequsaqegkani.

¹² Tamaaken apalluqluku Abraham tuquyaghtungestaqaaghngaaghmi, paninang kinguneghtughqaaghllakaaguq. Ellngita uglaghtalngit ighaleqetaaghestun qilagamelngughestun ayuqut, kestekaanghilngughestunllu qenaavzeghaatun esnam.

¹³ Qamaglluteng tamaakut yuget paninang kiyaghtekaagut ugpeqilleghqun tuqulleghmeggnun kenlanga. Tuqulaghaatkaalghiit allgeghtegpenaki Kiyaghneghem akequsaqegkii ellmeggnun. Iwernga ugpeqilleghqun esghaqaqiit Kiyaghneghem akequsaqegkii uyavanlluki sivumeggnilluki quyakegkaqiitlu. Enkaangam ungipaatkaqiit yuget nunataaniluteng whani nunami, nunamun pikenghinniluteng.

¹⁴ Tamaakut tawaten akuzilghiit, whateghlluwaaq aapghwaat nunakaghqaghyugniluteng ellmeggnun pikaghqameng.

¹⁵ Suumqegkaqsaqumegteggu taana nuna unitkaghteng, uteghtelleghqalgunayaghtut.

¹⁶ Yeghlegi piyukataghaqaqaat pinighataghalghii nuna, qilagmelnguq. Enkaam Kiyaghneq kaynguyugigatuq Kiyaghneqninghatni. Talwa yataaghqutkaqii neghllagmeng.

^17-18 Kiyaghneghem akeqegkaqegkanga Abraham, “Isaac‑ekun kinguneghllagullequten.” Ugpeqilleghqun Abraham‑em neghyukegkaqaa Kiyaghneq nanghiiqwaaqngatni. Enkaam aghqutkesaghqaaghtekaa kezemaghhaq ighneni, Isaac.

¹⁹ Abraham‑em ugpeqegkaqaa Kiyaghneq unguvaghtiyaqleguniluku tuqukaneng. Enkaam Kiyaghneghem tuqutesnanighaqngagu Isaac, Abraham‑em veghtekallghuuqaqaa Isaac tuqulleghmeng.

²⁰ Ugpeqilleghqun Isaac‑em quyastekaqaak Jacob‑enkuk Esau‑nkuk, tungsiitkaqaak Kiyaghneghmun quyastesqellukek aaghakaghqiik.

²¹ Ugpeqilleghqun Jacob‑em, tuqunaqnguluni quyastekaqaak allakaqaghtaagkenka ighneghqek Joseph‑em. Taagken qungughlluni ayaviighmikun maniguqaqaa Kiyaghneq.

²² Ugpeqilleghqun Joseph‑em, kenletghuunnaqellghani unguvalleghmi, akuzitkegkaqaa aghulaqelleghqaat Israel‑eghmiit Egypt‑meng. Apeghtuutkaqiillu neghqwaani naten salleghqii.

²³ Ugpeqilleghqun Moses‑em angayuqagkenka iighaghtuqaqaak pingayut tanqit allgellghan kingunganeng. Esghaqangak yuukegtepiglleghii, alingumangilnguuklu qaatkunneghisaghqaalutek umiilgem qelghutellghanun.

²⁴ Ugpeqilleghqun Moses, yugughsami ighsakaaguq ighneqesneghmeng Pharaoh‑m paniganun.

²⁵ Yeghlegi nakmiiqaaguq ikfiqelgusighnaluki Kiyaghneghem yugi, avelghaghluku efqughyugnallgha seghleghqellghem muluyaghqaanghilnguq.

²⁶ Itupill sumeghtaghaatkegkaqaa ikfiqelleghqani Christ‑amun itagnaghataghaghniluku aklungilghutanganeng Egypt‑em. Sumeghtaghaatkengngwii akileghtuusaghqat aga sivumelnguut.

²⁷ Ugpeqilleghqun Moses‑em unitkaqaa Egypt alingellngunani umiilgem sakraallghaneng. Iilqayugumangituq qayughllak esghalghiistun pikaqegkanga aliinneghilnguq Kiyaghneq.

²⁸ Ugpeqilleghqun Moses‑em qelqaqii yuget Passover‑esqelluki, qelghutkaqaallu aakw sivillagtaatesqelluku amigteggun. Enkaam Yaqulgan Tuqullghem tuqutellghitii ighneqsuwhaaghit Israel‑eghmiit.

²⁹ Ugpeqilleghqun Israel‑eghmiit aghviqaqaat Red Sea nikimqun qutestun. Iwernga Egypt‑eghmiit, aghvighnaqutkengnguluteng pekaqutkaagut.

³⁰ Ugpeqilleghqun Israel‑eghmiit maaghraghvinlegni aghneghni uzivgaqaqaat Jericho‑m mingllutanga. Taagken minglluta ulleghaatkaaguq.

³¹ Ugpeqilleghqun Rahab‑em, yugusimineng akikikayugem, upughatkaqaak Israel‑eghmiit riirngistegket. Tamaaken apalluqluku tuqullghituq maligulluni qaatkusigalngughnun Kiyaghneghmun.

³² Wataqaaghaq ungipamsugullamsii yugneng ugpeqikaneng Kiyaghneghmeng? Taakeghllagyaghqaagut akuzitkesaghqaaluki Gideon‑enkut, Barak‑enkut, Samson‑enkut, Jephthah‑nkut, David‑enkut, Samuel‑enkut, uuknaliqistetlu.

³³ Ugpeqilleghqun ilangi yuget whaten pikaagut: kayaalqegkaqiit ataneghpagullghet, elqughutngaluteng igleghutikaagut. Enkaam Kiyaghneghem akequsii tugukaqiit. Ilangita lion‑et qaanghit meqetestaqiit.

³⁴ Kumaghughllaget kenghet qaamtaqiit, anagaqlukillu tuqutistekaghqateng savigpagkun. Kayaataqut iwernga ugpeqillghita iknaqughtaqiit. Ugpeqilleghqun pilluwaghtengit iknaqughteghllagaqut enkaam kayaalqaqiit ilangita nunat pilluwaghtengit.

³⁵ Ugpeqilleghqun aghnat tuqumasliiteng veghtaqiit tuqulleghmeng Kiyaghneghem unguvaghhneghaki. Ilangi elngaatall ikfiqesteghllagaqiit pegtesqelluku ugpeqillghat. Iwernga tuqunaluteng piiqut Kiyaghneghmun unguvaghtesqelluteng pinighataghalghimun unguvalleghmun.

³⁶ Ilangi legasiighwaatkaqluki, ilangi kagsagmigaqluki, ilangi qiipraghusighluki anusimingllaghaqiit.

³⁷ Ilangi milughpagaatameng tuqutaqiit, ilangi yugusiit pilagtughluki malghughqaqiit, ilangi tuqutaqiit savigpagkun. Ilangi temgi tamaani igleghtaqut aalluteng penniighemllu goat‑emllu amiineng. Ilangi aklumapiglleghhiit, yuget amyuqetaatkegkiit, seghletunllu kiyaghutkiit.

³⁸ Nunam yugi pinipagunghitut kiyaghtelgusighyaghqaaluki tamaakut elqughutngalghiit yuget! Ilangi elqughutngalghiit temngi tamaani igleghakaalghiit paaghqillghani, naayghani, kiyaghtaqluteng qayeni, laawaaghnillu.

³⁹ Qamaglluki tamaakut Kiyaghneghem itagnaqegkaqii ugpeqillghit apalluqluki! Naqamllu allgeghsimangitaat Kiyaghneghem akequsaqegkaa,

⁴⁰ qayughllak Kiyaghneghem uspeqegkaa whangkunnun pinighataghalghiinguuq. Uspeqillgha whatetuq: akequsani pinaanghitii ellngitnun whangkungunaki. Qerngaamta qamaglluta iighwighlleqiinkut.