Hebrews 10 - New Testament-et Akuzipigestun

¹ Liilightuusat taghneghangullghiistun ayuqut pinilghiinun kaasaghqanun, iwernga Liilightuusat taakughpigaanghitut. Liilightuusat qelellghistun Jews‑et aghqerraaghumanginaghaqut ayumiitanga tamaghhaan. Iwernga tamaakut aghqerraallghet ukmangighwaaghpagningitiit seghleghqellghitneng manigughyaghtuneghmegteggu Kiyaghneq.

² Yuget maniguutestengi Kiyaghneghem ukmangipiigumakumeng seghleghqelleghmeggneng, seghleghninanighnayaghtut. Enkaam aghqutkinanighnayaghtut.

³ Iwernga ayumiitanga tamaghhaan, tamaakut aghqerraallghet neqangughtestaqiit yuget seghleghqellghitneng,

⁴ qayughllak aawita bull‑etlu goat‑etlu seghleghqellghighpagningitiit.

⁵ Tamaakut apalluqluki Christ‑a tagiiqngami nunamun pikaqaa Kiyaghneq: “Aghquteyugumangitutenllu tunusaghyugumangitutenllu, iwernga yataaghqegkaqan yugusiq whangamnun.

⁶ Efququmangitaten teghikusat iinguniita paneghtekat aghqefigegni nalighmeng aghqutet seghleghqelleghnun.

⁷ Taagken whanga piiqa, ‘Ii‑i Kiyaghneq, tagiinga piyukelleghpetun pinalunga, katam tawaten igaquqaqegkangatnga Akuzitni Igaqegkani.’”

⁸ Christ‑a pikaalghii, “Aghquteyugumangitutenllu tunusaghyugumangitutenllu. Aghquteyugumangituten teghikusaneng iingunaghmeng paneghtekaneng aghqefigegni nalighmeng aghqutneng seghleghqelleghnun. Tamaakut efqughsimangitaaten.” Christ‑a tawaten pikaaguq Liilightuusat qelghutkaqeghngaatki tamaakut aghqutet pisqelluki.

⁹ Taagken pikaaguq, “Ii‑i, tagiinga piyukelleghpetun pinalunga.” Enkaam Kiyaghneghem qamaglluki iqiqughluki aghquteluget nengitgun nekegtekaqaa Christ‑a aghqutnguluku.

¹⁰ Jesus Christ‑am qaatkesaqminigu Kiyaghneghem piyukellgha, pelungiqaqiinkut seghleghqellemnneng tuunelleghmikun yugusini ataasighhaghmeng quunperugllak.

¹¹ Aghhutanga tamaghhaan, tamaghhaghmeng priest‑et nekevghaghmeng qepghaqateng piiqiit. Uteghpagtiinaq tuuniiqut tawatelkullghiineng aghqutneng. Tawalliima tamaakut aghqutet seghleghqellghighiyaghqaghhaanghitut.

¹² Iwernga Christ‑am tuunegkaqaa ataasiq aghqun seghleghqelleghnun quunperugllagmun. Taagken aqumegkaq aghenqigneghakun Kiyaghneghem.

¹³ Tawani Christ‑a utaqiigaquq kenlanga Kiyaghneghem nekegtelleghqaanun anguyagi itegaan asinganun.

¹⁴ Taaggun ataasikun aghqutkelleghqun, Christ‑am quunperugllak naamigtestekaqii pelungighsaqat seghleghqelleghmeggneng.

¹⁵ Agleghnalghiimllu Taghnegham ungipaatiinkut tamaakuneng. Sivukluni whaten pikaaguq,

¹⁶ “Unanguuq akequsaqa yumnun, kingungitneng tamaakut aghneghet, piiq Ataneq, Liilightuusanka kanaghlleqanka ilungitnun, igaqelleqankallu umyuwiitgun.”

¹⁷ Taagken piiq, “Allamengllu neqamiknaanghitanka seghleghqellghit, seghletunllu pillghit.”

¹⁸ Enkaam Kiyaghneghem seghevuskaki seghleghqellghit, aghqutet atuqsaghqaananighllequt seghleghqelleghnun.

Tughaaghelta Kiyaghneghmun

¹⁹ Tamaaken apalluqluku, ugpeqaalgutemni, alingellngunaamta itelleghqangukut Agleghnalleghpigaghmun aawakun Jesus‑em.

²⁰ Qelpeghusimiinkutlu tumeghraghaghmeng unguvalleghmun safkaaghutkun; taana safkaaghun yugusiqaa.

²¹ Priest‑elegllaaguukutlu igleghutilghii Kiyaghneghem mangteghaaneng.

²² Tamaakut apalluqluki tughaaghelteggu Kiyaghneq ipapighqelluta, neghyukngwaaghluku. Tawaten pilleghqangukut qayughllak umyugalluput sivillagtaqaagut Christ‑am aawaneng ukmangiightesqelluki, yugusiputlu ughvughqegkaagut pelungilngughqun meghqun.

²³ Yeqay ataasiighmelluta sighimalleghmetekestaalta whangkunnun piknikamnnun, qayughllak ugpeqaghput Kiyaghneq ataasiighmetuq enkaam piyaghqaqii akequsani.

²⁴ Yeqay sumeghtaghaalta naten qiilngumighusaghqaaluta piniqsaghqaaluki ilat, pinitunllu piyaghqaaluta.

²⁵ Yeqay taaqefqaamta qerngughunneghmeng pilta manigughnaluku Kiyaghneq, ilangita piiqellghistun. Yeghlegi qerngughusimanginaalta kayemutunnaluta. Wata kayemusimanginaalta qayughllak Atanghem Aghnegha tughaalghii.

²⁶ Seghleghqesugaataqumta kingunganeng liilluku ipapilleq, taawa aghqutkaghqiituq iqitusighqameng tamaavek seghleghqelleghnun.

²⁷ Tamaakut tawaten pilghiit alingruughmeng utaqiillequt Kiyaghneghem nanqigtillghaneng. Atuqelleqaak uguqnaghllagek kenghek naafqennaluki tamaakut kipullginaalghiit ellmineng.

²⁸ Maalghuk nalighmeng pingayut liisimakistet aapqatgu yuuk qaatkusimanginniluku Moses‑em Liilightuusaanun, nanqigtistem nangllekegpenaan tuqutesleqaa.

²⁹ Sumeghtaghaatkaghteggu natenmi angkaslugan Kiyaghneghem aghyuughlleqagu yuuk tutmaasghaqiiqelghii Ighneghaneng Kiyaghneghem, piiqelghii satngunghinniluku aawk apeghiighutkaq akequsaghraghaghmeng (qaywa Kiyaghneghem ukmangiisiqegkaqeghngaagu seghleghqellghanun), seghlequughiiqelghiillu nangllegtalghiignun Tagneghagnun.

³⁰ Liisimakaghput Kiyaghneq; ellngangulghii whaten pikaq, “Whanganguuq aghyuughiyaghqaq, akisaghqaqanka seghletun pillghit.” Whatenllu pikaaguq, “Atanghem nanqigsaghqaqii ellmi yuni.”

³¹ Tatamaataghnapigtuq kina alngunak iigganisaghqaq unguvalghiim Kiyaghneghem Nanqigtillghem Aghneghani!

³² Neqamikegkesi tamaakut aghneghet sivunghani liisuwhaaghaqngafsigu ipapilleq Christ‑ameng ayuqelghii. Aghuliitkaagusi ataasiighmellusi qaywa ikfiqeghllaghngaaghpesi.

³³ Ilangakun yugtuqami yuget seghletun akuzitkaqiisillu amyuqetaatkaqiisillu. Ilangani nekevghalgusighaqasi tamaakut amyuqetaatkesilghiit.

³⁴ Nangllekaqasi anusimingllaghvigmelnguut. Talwa quyangaaqusi yuget tugulanghatki saghyasi qayughllak liisimakaghsi paninang salguusi pinighataghalghiimeng quunpekaghqameng.

³⁵ Enkaangam iilqayugpenasi qayughllak ilutumanginaqufsi allgeghullequsi akileghtuusaghllagmeng.

³⁶ Aklukngwaaghsi nuqenneghtulleq atuqsaghqaaluku Kiyaghneghem piyukellgha. Taagken allgeghlleqasi akequsaqegkii.

³⁷ Katam igaqngalghii Akuzitni Igaqegkani whaten, “Qantaghaqun taana tagiyaghqaq kaallequq; kimaawinaanghituq.

³⁸ Elqughutngalghiit yugenka kiyaghllequt ugpeqilleghqun. Iwernga kitum alngunak pegtekumigu ugpeqilleni, unguvasigma efquqnaanghitaqa.”

³⁹ Iwernga whangkuta pegtikastun ugpeqilleghmeggneng ayuqenghitukut, naafqellengyaghqastun. Iwernga ugpeqillelguukut enkaam unguvasiput yugulikaagukut.