Ephesians 1 - New Testament-et Akuzipigestun

¹ Ukut latat Paul‑meng pinguut. Christ Jesus‑em apostle‑kaanga Kiyaghneghem piyukellghakun. Latanguunga Kiyaghneghem yugitnun Ephesus‑melngughnun, ataasiighmelnguut maligsaaghtengi Christ Jesus‑em.

² Kiyaghneghem Atamta, Atanemtallu Jesus Christ‑am nanglleklisillu nekeggmellelguslisillu.

Kiyaghneghem Nakmikegkaqiinkut Christ‑akun

³ Usuqellengli Kiyaghneq, Atanga Atanemta Jesus Christ‑am! Christ‑akun Kiyaghneghem quyastengngwiinkut tamaghhaaneng tunusameng qilagtameng.

⁴ Nuna ulimallghilluku Kiyaghneghem nakmikegkaqiinkut Christ‑akun pelungitesqellutallu avutngitesqellutallu ellminun.

⁵ Qayughllak Kiyaghneghem piniqegkanginkut, neghighluku allughqinakegkaqiinkut avaqutaaluta Jesus Christ‑akun. Tawaten pikaaguq qayughllak piyukegkanga, efquqegkangallu.

⁶ Enkaam usuqaghput Kiyaghneq qayughllak ighlegpenani nangllekeghllagiinkut piniqegkamikun Ighneghmikun.

⁷ Christ‑am aawakun, Kiyaghneghem itemutkaqiinkut seghleghqellemnneng. Seghevutii seghleghqelleput apalluqluku nangllegtalleghllani

⁸ aqeghqusiqeghllakanga whangkunnun. Peghqinghustiinkutlu liigikestiinkutlu

⁹ uspeqelleghmineng salin aliighsigalkemmineng sivunghani. Taananguuq Kiyaghneghem uspeqegkaa, pikaqaa Christ‑akun.

¹⁰ Kiyaghneghem uspeqelleni apeghiighlleqaa pilleghqaghllugwaaghmi. Qamagtengngwaaghluki ulimaani qilagmelnguutlu nunamelnguutlu qerngughlleqii, Christ‑amun igleghutesqelluki.

¹¹ Christ‑akun Kiyaghneghem nakmikegkaqiinkut ellminun yuguluta. Ayumirugllak piyukelleghmitun uspeqegkaqaa. Ellngan sangwaa tamaghhaan piyukelleghmitun pistaqaa.

¹² Whangkuta Jews‑eni ugpeqani sighimakiyuwhaaqaagukut Christ‑akun. Enkaam kiyaghtaallemteggun usuqesleqaghput Kiyaghneq aangelleghllaganun.

¹³ Christ‑akun elpesillu nagaquqaqaghsi ipapik ungipaq. Pinilghiinguuq Ungipaq ungipaatilghii yugulilleghpesineng. Ugpeqaqngafsigu Christ‑a, Kiyaghneghem nalluniiqaqiisi Agleghnalghiigneng Taghneghagneng, akequsaqegkamineng tuunelleqnilukek.

¹⁴ Agleghnalghiim Taghnegham ipapighqestiinkut pagitaghqamnneng kenlanga whangkuta piliitelleghqamnnun. Enkaam usuqelleqaghput Kiyaghneq aangelleghllaganun!

Paul‑em Yughii

¹⁵ Nagaquumaaqa ugpeqilleghsi Ataneghqun Jesus‑kun, piniqelleghsillu tamaghhiitnun Kiyaghneghem yugitnun. Tamaaken apalluqluku,

¹⁶ neqamikaqamsi yughanemni, iqamsiqayagunneghmeng taaqigatamsi Kiyaghneghmun.

¹⁷ Ataghllakaa Atanemta Jesus Christ‑am. Ellnganun tungsiitaqamsi peghqinghusqellusi Taghneghagkenkun, liigikataghiisqellusi Kiyaghneghmeng.

¹⁸ Yughaatkaqa nighuk kuukgutesqelluku ilugpesinun, liigikesqelluku sighimalleq Kiyaghneghem elpesinun pikestekaa qayughllak nakmikegkaqiisi. Yughaatkamsillu liigikesqelluki kemnaghllaget quyastelleghllaget Kiyaghneghem akequsaqegkii yugminun.

^19-20 Yughaghtungallu liigikesqelluku seghleghllaguuq Kiyaghneghem aghtughyaghqaanghilleghllaga qepghalghii whangkunni ugpeqilghiini. Taana aghtughyaghqaanghitelleghllak ataasiiguq Kiyaghneghem unguvaghtisiqegkaa Christ‑amun tuqulleghmeng. Taagken qilagmi Kiyaghneghem aqumesimaa aghenqigneghmikun.

²¹ Kiyaghneghem qulighpigaaghtestekaqaa Christ‑a tamaghhiitneng igleghutisteneng, qelghikayugneng, aghtughyaghqaanghillelegneng, umiilegnengllu. Aatgha ingyaatngaghllagtuq ateghyaggaghneng nunami whani, nunaghraghaghqamillu.

²² Kiyaghneghem llikaqaa sangwaa qamagtengngwaaghluku Christ‑am itegaan asinganun, naasquutistengllaqaqaallu samun tamaghhaanun apalluqluki ugpeqat.

²³ Qamaglluteng ugpeqat yugusiqii Christ‑am, enkaam ellnga iighwightuq. Christ‑am iighwightaa sangwaa qamaglluku nani alngunak.