Acts 9 - New Testament-et Akuzipigestun

Saul Ugpelghii

^1-2 Saul Jerusalem‑emelluni taawa paninang alingsiqukii tuququghnaqniluki maligsaaghtengi Atanghem. Qenwat Damascus‑esukaq, luuraq Jesus‑em maligsaaghtengi yugetlu aghnatlu tamaannayukata. Esghaqumiki taginnaluki Jerusalem‑emun anusiminglliisqelluki. Enkaam high priest‑mun piluni latangllaatesqegkaq pilleghqalitesqelluni igleghutistengitnun synagogue‑et Damascus‑melngughnun, tawaten pinaluni.

³ Enkaam Saul aghulaqegkaq Damascus‑mun. Iiwenllu kaasaghtughaquq, qilagmeng nighugllagem kukegtekaa.

⁴ Uullghaghlluni nagaquqaa ma whaten pilghii, “Saul, Saul, sangama amyuutkumanginaghsinga?”

⁵ Saul‑em aaptekaa, “Kinanguzin Ataneq?” Mem kiimsiqaa, “Jesus‑nguunga amyuutkegkan.

⁶ Makelluten aglaa Damascus‑mun, tawani kitum ungipaalleqaaten naten pilleghqaghpeneng.”

⁷ Yuget igleghalgutangi aghuliiqat tawani, akuzipagningunateng nagatkaat ma, naqam kina alngunak esghaamangilkangat.

⁸ Saul makesalghiimi esghaanneghituq qayughllak ayaamalghii. Enkaam tasluqluku aglaatkaat Damascus‑mun.

⁹ Pingayut aghneghet ayaangakaq, talwa neghumangilnguqlu, meghumangilnguqlu.

¹⁰ Taawanguq Damascus‑mi, yuuk ugpeqingalghii Jesus‑meng, aatgha Ananias. Esghaaghwaalleghqun Atanghem tuqluqaa, “Ananias.” Kiimsiqaa, “Ay, Ataneq?”

¹¹ Atanghem pikaa, “Tumenun aglaa aatqelghiinun, ‘Taklaghrukegtaq.’ Taagken Judas‑enkunun aapsaghtughhu yuuk, Saul‑nguuq, Tarsus‑meng pinguuq, yughaghaquq.

¹² Esghaghwaaghqun esghamaa yuuk itelghii, aatgha Ananias, saafsaqminigu esghaghyagunneqigtuq.”

¹³ Iwernga Ananias‑em pikaa, “Ataneq, nagaqughaqaqa taana yuuk uglapiglleghhiineng, apeghnaqepigtaqaat seghletun pilleghllaga yugpenun Jerusalem‑emi.

¹⁴ Pilleghqangegkaaguq chief priest‑eneng tagiluni Damascus‑mun tugulaghnaluki qamaglluki yughaqayuget ateghpegun.”

¹⁵ Iwernga Atanghem pikaa, “Aglaa, takugu qayughllak nakmikumaaqa ungipaqesqellunga Gentile‑enun, umiilegnun, Israel‑eghmiinunllu.

¹⁶ Liigikesnaqngwaaqa aangluku ikfiqelleghmeng whanga apalluqlunga.”

¹⁷ Enkaam Ananias‑em takukaa Saul. Iteghluni saafsimaan pikaa, “Anglegutemni Saul, Atanghem Jesus‑em esghaqaghpek tumeni taginguluten, kayagtaanga elpenun. Kayagutaaten saaftesqelluten esghaasagunneqigtesqelluten, imiisqellutenllu Agleghnalghiigneng Taghneghagneng.”

¹⁸ Tawaninginaq iqallugem qaltesugningi iyegkeneng ifkaquutkat, enkaam esghasagutkaq. Taagken makelluni paaptaayekaq.

¹⁹ Taam kingunganeng neghyalghiimi iknaqsuugtekaq. Saul ugpeqanitkaq Damascus‑mi qafsinat aghneghet.

Saul Ungipaqilghii Damascus‑mi

²⁰ Mulugpenani synagogue‑ni ungipaqegkaa Jesus, Ighneqniluku Kiyaghneghmun.

²¹ Nagatullghiim saghiighayagutkaat repall ellmeggneng aapqughaghutkat, “Unangunghitaa‑a yuuk Jerusalem‑emi amyuqetiqeghllakaq yughaqayugneng Jesus‑em aatghakun? Maavek taginguyalghii tawaten pinaluni, ugpeqat tugulaghnaluki, aglannaluki chief priest‑enun.”

²² Saul‑em ungipaqilleghmikun wata liigikestaghaqaa Jesus, Christ‑angutanga repall Jews‑et Damascus‑melnguut aaghtiiraaghpagningitkaat.

²³ Saul ungipaqilqinaghyan tawaten qafsinegyagllak aghneq, Jews‑et wataqaaghaq ugumiyagutkaat, repall qerngughulluteng agghitkegkaat tuqunnaluku.

²⁴ Enkaam aghneghtuumaan, unugtuumaan Damascus‑em amigllalghutngani kelengakegkaat tuqunnaluku. Iwernga Saul‑em nagaquqaa tawaten agghillghat.

²⁵ Enkaam unugmi ataasimi, Saul‑em maligsaaghtengita pasketeghrugllagegnekun mingllutmeng eslatmun ukigtekaat.

Saul Jerusalem‑ellghii

²⁶ Taagken Saul kaasami Jerusalem‑emun ilannaqegkaayaalghii Jesus‑em maligsaaghtengitnun. Taawanginaq iingunaghhaghmeng alikegkaat, qayughllak aygughikegkaat ellngallu maligsaaghtengughsimatanga.

²⁷ Iwernga Barnabas‑em Saul aglaalluku apostle‑enun aapqaa Saul‑mun tumemi esghaamaniluku Ataneq, aleghquutkaaniluteklu. Aapqaallu Damascus‑mi ungipaqaaniluku tetugpenani Aatghakun Jesus‑em.

^28-29 Enkaam tugukliqaat. Taagken kenlanga Saul ugpeqanitkaq. Igleghutkelluku Jerusalem‑emi, ungipaqikaq tetugpenani aatghakun Atanghem. Iwernga ilangita Jews‑et Greek‑estun akuzikayuget aaghtiiraaqaan tuqusukaqegkangat.

³⁰ Ugpeqat liigiksamegteggu Jews‑enun tuqunnaqniluku Saul, aglaatkaat Caesarea‑mun, taagken kayagtekaat Tarsus‑mun.

³¹ Qamaglluteng ugpeqat Judea‑mi, Galilee‑mi, Samaria‑millu amyuutkestengngunateng kiyaghtekat. Ugpellghit iknaqughtekat, alingaqelghiit qaatkunneghitelleghqameggneng Ataneghmun, Agleghnalghiimllu Taghnegham kayusiingukangi enkaam ugpeqat nulakat.

Peter Lydda‑llghiillu, Joppa‑llghiillu

³² Peter‑em igleghatkelluku laalighfikuqii Kiyaghneghem yugi naansaghngaata. Ataasimi aghneghmi laalightekaq Lydda‑melngughnun.

³³ Tamaani esghaqaa yuuk aatgha Aeneas, pingayuneng inglulek ayumiqulleq makesigalnguq uniighngatmiineng.

³⁴ Peter‑em pikaa, “Aeneas, Jesus Christ‑am naallghutaaten, makelluten allighan iimggu.” Tawaninginaq Aeneas maketkaq.

³⁵ Uglapiglleghhiit Lydda‑ghmiitlu Sharon‑eghmiitlu esghaghyamegteggu Aeneas naallghulluni, ugpeghtuutkat Ataneghqun.

³⁶ Joppa‑minguq taawa ugpeqaq aghnaq aatgha Tabitha, (Greek‑stun Dorcas, whaten pisiq, quyngiq), quunpeng kayusighimaghllak, kiyang tamaakunun aklumalghiinun.

³⁷ Taagken qinuyugluni tuqukaq enkaam ughvughqelluku qemtamun mayuutkaat.

³⁸ Joppa‑ghmiit ugpeqat nagaquqaat Peter Lydda‑menniluku. Lydda, Joppa‑meng qantaghaghhanlenguq, enkaam ugpeqat kevgaqegkagket maalghuk yugek Peter‑mun tagiragkiighesqelluku Joppa‑mun.

³⁹ Peter‑em yataaghqelluni maligtekakek. Kaasan qemtamun mayuutkaat. Legan iteghtuq ugingighat qiyamaghmeng kanglluqaghlluku kelguvikegkaat aatkaneng Dorcas‑em ulimaaghaneng.

⁴⁰ Peter‑em aanesqughluki segesqughlluni yughaqaq. Taaqluni yughaneghmeng qiivluku yugusiq pikaa, “Tabitha, maketen.” Tabitha esghaatkelluku esghaghyamigu Peter aqumegkaq.

⁴¹ Peter‑em iiggakun tuguluku nekevestekaa. Taagken tuqluqii ugpeqatlu ugingighatlu esghiisqelluku unguvaamatanga.

⁴² Qamagtengngwaaghluteng Joppa‑ghmiit nagaquqaat Tabitha‑m unguvallgha enkaam uglapiglleghhiim ugpeqegkaat Ataneq.

⁴³ Peter mulukaq Joppa‑mi, Simon‑enkunitkaq sanaghtistemi.