Acts 5 - New Testament-et Akuzipigestun

Ananias‑enkuk Sapphira‑nkuk

¹ Taawanguq yuuk aatgha Ananias, nulighha Sapphira. Akikegkaa nalighnegha nunami.

² Nuliighmi liisimanghani aksaqegkaa ilanga manim ellminun pinguluku. Taana siipneni tuunegkaa apostle‑enun sumeghmini qamaglluku tuuniluku pisqelluku.

³ Yeghlegi Peter‑em aaptekaa, “Sangan qaatkesigu Tughneghaam nanghiiqullgha iqlengiqesqelluten Agleghnalghiignun Taghneghagnun aksaqelleghpegun ilanga manim?

⁴ Sangan tawaten sumeghtaghaamazin? Yugnun iqlengiqenghituten, Kiyaghneghmun iqlengiquten. Akikellghilluku nunan elpek piksaghan, enkaam akikaqngavgu maningallu taana piyukelleghpetun piyaghqaqsaghan.”

^5-6 Legan Ananias‑em Peter nagalluku uullghaghlluni tuqukaq. Nukalpigat iteghluteng qiipaghakun iimgulluku yugusii aanulluku lliifqaat. Ungipaq Ananias‑em iqlengiqellghallu tuqullghallu mingitkaq, enkaam nagaquutkat alingruughuteghllakat.

⁷ Pingayut aflut atughluki Ananias‑em tuqullghaneng, nulighha iitqaq nallukluku ugini samatanga.

⁸ Peter‑em aaptekaa, “Tawaten akitutkaan akikestegneguu nunayek?” Sapphira‑m kiimsiqaa, “Aa‑a.”

⁹ Peter‑em aaplaataqaa, “Sangaftek ugikullghiigni sumeghtaghaamastek nanghiiqunalukek Atanghem Taghneghakek? Yuget lliivghikat ugigpeneng qakma manughametut. Elpeklu tawaten pilleqaaten.”

¹⁰ Tawanighlluggiinaq ellngallu uullghaghlluni tuqukaq. Nukalpigat iteghyalghiimeng Sapphira‑llu taawa tuqumalghii, enkaam aanulluku ugingan saaghwakun lliifqaat.

¹¹ Qamagtengngwaaghluteng ugpeqat, qamagllutengllu nagaquullghiit Ananias‑enkuk Sapphira‑nkuk tuqullghegkeneng alingruughuteghllakat.

Apostle‑et Allaaghlluwhaghtillghit

¹² Yulghutet qungangitni apostle‑et allaaghlluwhaghtighllagumanginaqat. Qamaglluteng ugpeqatlu apostle‑etlu qerngughutaqelghiit Temple‑em manughaani aatqelghiimi, Solomon‑em Porch‑ngani.

¹³ Iwernga yuget ugpeqillghilnguut Jesus‑meng ilasigalnguut ugpeqanun qayughllak alingekanighaqelghiit, naqam pinighniiqegkangit.

¹⁴ Iwernga uglapiglleghiit yugetlu aghnatlu ugpeqngukangat Ataneq Jesus, enkaam ugpeqat nulamanginaqat.

¹⁵ Apostle‑et allaaghlluwhaghtillghit apalluqluki kinkut alngunak qinuyugtiiteng allighiitgun tagilluki tumetgun lliiqegkangit. Tawaten pikiit qayughllak Peter‑em naghughtekaki luuraq taghneghangutellghan naallghunnayukaki qinuyulghiit.

¹⁶ Enkaam Jerusalem‑emun qantaghanlengughneng nunaneng tagilaghaatkaq yulghun Jerusalem‑emun. Qinuyugtiitengllu tamaakutlu tughneghalget ilumegteggun tagitkiit apostle‑enun, enkaam qamaglluteng tagitkiit naallghuquutkat.

Amyuutkegkangit Apostle‑et

¹⁷ High priest‑enkut ilakullghiit Sadducees‑et aqinatkat apostle‑neng

¹⁸ enkaam tugusluki kanaghtestekiit anusimingllaghvigmun.

¹⁹ Iwernga unugyan yaqulgan Atanghem qelpeghtekii anusimingllaghvigem amigi. Enkaam aanulluki apostle‑et pikii,

²⁰ “Aglaghlusi Temple‑mun, qamaglluku apeghteggu una nutaghaq kiyaghtaalleq Jesus Christ‑akun ayuqelghii.”

²¹ Apostle‑et qaatkegkaat yaqulek. Aghtaghaghaqaallu iteghluteng Temple‑mun apeghtughikat. High priest‑enkut ilakullghiit qerngughtekiit Jews‑et siivanlleghitlu qamagllukillu agghistet, agghitkennaluki apostle‑et. Taagken anusimingllaghvigem umiilwaaghitnun aqfastekiit apostle‑et.

²² Iwernga umiilwaaghet anusimingllaghvigmun kaasalghiimeng apostle‑et aviiteftut. Enkaam agghistenun aglaghluteng ungipaatkiit,

²³ “Anusimingllaghvigmun kaasalghiikut amiget maghqaqughwaaghngaftut, kelengakistetlu amignituteftut naqam iteghyalghiikut paaghqiteftuq!”

²⁴ Temple‑em kelengakistengita umiilgatlu, chief priest‑etlu ungipaasisteng kukriqutkegkiit samatangi apostle‑et.

²⁵ Taagken kitum iteghluni pikii, “Taakut yuget anusimingllaqaqsaqesi inga Temple‑mi apeghtughiiqut.”

²⁶ Kelengakistet umiilkullghiit aqfakiit apostle‑et. Seghletun pimangilkangit, qayughllak alingelghiit yugneng Temple‑melngughneng tuqunnayukangisteng milughpagaataghhiinaq.

²⁷ Tagilluki itghutkiit agghistenun enkaam high priest‑em pikii apostle‑et,

²⁸ “Ineghtengngwaaqaqsaghamsi allamengllu apeghtughifqaafsi Aatghakun Jesus‑em pisqellusi, iwernga qaatkumangitaghpesikut! Yeghlegi allulluteng Jerusalem‑eghmiit liitaat apeghtuusaghsi, whangkutallu avutngusnaqutkaghpekut Jesus‑em tuqullghanun.”

²⁹ Peter‑em kiimsiitkii apostle‑et, “Qaatkesaghqaqaghput Kiyaghneq avelghaghluki yuget.

³⁰ Qaquuraghluku tuqutestekaqaghsi Jesus, iwernga Kiyaghneghem, sivunemta maniguqiita unguvaghtestekaqaa tuqulleghmeng.

³¹ Enkaangam quulvaghnaluku Jesus aghenqigneghmikun nekegtekaqaa Igleghutistengulukullu Yugulighistengulukullu. Tawaten pikaqaa Israel‑eghmiit avuteghqesaghqaaghtesqelluki seghleghqennaniisqelluki, qiivesqelluki Kiyaghneghmun, seghevunnalukillu seghleghqellghitneng.

³² Whangkuta ungipaghtenguukut tamaakunun pilleghnun, maligulluta Agleghnalghiignun Taghneghagnun Kiyaghneghem tuunegkagkenun tamaakunun qaatkullghiinun ellminun.”

³³ Agghistet sakritutkaalghiit Peter‑em kiimsighyisteng tawaten, repall tuqusukaqegkangit apostle‑et.

³⁴ Iwernga ataasiq agghista nekevegkaq akuzinaluni. Gamaliel‑nguftuq, Pharisee, apeghtughistengat Jews‑et Liilightuusiita, elngaatall kitum alngunak qaatkumtaagha. Kelengakistenun aanutaghtesqegkii apostle‑et.

³⁵ Taagken agghistelgutni pikii, “Israel‑eghmiilgutemni, piraamsilluki taakut yuget piteki.

³⁶ Neqamikenghistegguu qavnganghhaq Theudas pikaalghii igleghutesteghllaguniluni. Enkaam 400 yuuk maligsaaghikaq ellnganeng. Iwernga Theudas tuqusatgu maligsaaghtengi qimaguutkat, talwa kitum alngunak allamengllu akuzitkesugumangilkangat.

³⁷ Taakwaningani Judas‑llu Galilee‑ghmii, qerngughtikaq yugkameng kavema kestistiiqngan yugem uglaghtalanganeng. Iwernga ellngallu tuqutaqngatgu yugi mingitkaagut.

³⁸ Enkaam whaa sumemni itagnaghnayaghtukut safqiita qakemkut yuget piyaqumteki. Ellmeggneng pingukumeng tawaten pillghat satngunanighllequq.

³⁹ Iwernga Kiyaghneghem pilqegkagu aghuliighhnaanghitasi, kipullginaaghlleqaghsillu Kiyaghneq.” Enkaam agghistet qaatkegkaat Gamaliel.

⁴⁰ Taagken kelengakistenun itghutesluki apostle‑et kagsagmigtestekiit. Ineghtengngwaaqiitlu ungipaqnaniisqelluku Jesus. Apeghiighyamegteki aanestekiit.

⁴¹ Apostle‑et aanesisteng quyaghllakat, qayughllak Kiyaghneghem kayngusaghaatestekaqegkangi Jesus apalluqluku.

⁴² Aghhutanga tamaghhaan Temple‑millu kinkunillu ungipaqaqegkangat, apeghtuusaqaqegkangat Jesus, Christ‑anguniluku Kiyaghneghem nakmikegkaa.