Acts 28 - New Testament-et Akuzipigestun

Paul Malta‑mi

¹ Yaywaaseng quutmun uugsamta liigikaghput qiighqaq Malta‑ngutanga.

² Tamaakumiit elngaatall upughatiinkut kumaqisimaamta qayughllak aqlaghaghtekanga eslallugughsimaghmi.

³ Paul saqumigluni quugkameng qiighimaluku, tuqunalghii nemeghyaq maatneghem aanesluku quugneng, iiggakun amqeghtekaa.

⁴ Tamaakumiit esghaghluku nemeghyaq Paul‑em iigganeng qughaghngalghii ilateng pikiit, “Ipapestaaq una yuuk yugtaghtenguuq. Qaywa unꞌgani meghmi tuqunghiteghngaaghmi esghaghhu tuquyaghqaamalghii.”

⁵ Paul‑em iiggeni ufsugusaqminiki nemeghyaq ifkaghtuq kenghegnun iwernga talwa nemeghyam aqnighsimangilkanga.

⁶ Yuget pikaqsaqangat Paul puuveghllagnaqniluku nalighmeng tuqunaqniluku. Iwernga sagpenani muluughllagyan, sumeghtaghaatkegkaat, “Una naliqaat kiyaghneghet.”

⁷ Taam qiighqam umiilga Publius, nunalguftuq ughugsighvimta tungangani. Publius‑em elngaatall upughatiinkut, ellnganitukut pingayut aghneghet.

⁸ Atanga puqleghanguftuq aqsalliqumaghmi. Paul‑em esghaghyaghtughluku yughaatkelluku, saafsaqminigu naallghutuq.

⁹ Paul tawaten piyan qamaglluteng ilangi qinuyuget tagilaghaatkat enkaam naallghutkat.

^10-11 Tamaaken apalluqluku tunqughtaagiinkut tunusameng. Tamaani pingayut tanqit atughluki aghulaqsaghqaaghsamta tunqughtaalaataghiinkut tumangani atughqamnneng. Angyaghpak Alexandria‑meng pi uksughsimalghii tamaani qiighqami. Aatqeftaa “Malghik kiyaghneghek” sivuyaganiteftuklu ulimaaghulutek taakuk. Aghulaqsaghqaaghsan taaggun uugtukut.

Paul Rome‑ellghii

¹² Syracuse‑mun kaalluta tamaantukut pingayut aghneghet.

¹³ Taagken qapiighwtaghtukut Rhegium‑emun kaatellemnnun kenlanga. Aghneq ataasiq atughluku tamaani, unaamingani anuqataghaaghutiinkut ikevaghmeng enkaam awakaghaani Puteoli‑mun kaatukut.

¹⁴ Tamaanteftut ugpeqat, ellmeggnitesqiinkut maaghraghvinlek aghneq. Taagken Rome‑emun nagneghtukut.

¹⁵ Ugpeqat Rome‑emelnguut nagaqughluta, paayghumakanginkut tungangitnun Akilpegaghviget Appius‑melnguut, ilangita paayghumakanginkut tungangitnun Pingayut Aqelqalghutat. Paul‑em esghaghluki ugpeqat ilutughtekaq enkaam iqamsiqayugvikegkaa Kiyaghneq.

Paul Rome‑emi

¹⁶ Rome‑emun kaasamta Paul ellnginaghmetestaat nani piyukelghani iwerngaqun ataasim pilluwaghtem kelengakaa.

¹⁷ Pingayut aghneghet atughluki Paul‑em tagsiqlighii Jews‑et igleghutistengit. Tagiyata pii, “Jew‑lgutemni, sanghiteghngaamki yuput, nalighmeng kipullginaanghiteghngaamki nangaghneghit sivunemta, paninang igleghutistemta Jerusalem‑emelnguut tugulunga tuunaatnga Rome‑eghmiinun.

¹⁸ Aapqughaaghlunga sameng apalliisama tuqutusighqameng itemunnalunga piyaghaatnga.

¹⁹ Iwernga Jews‑et ighlekaatnga enkaam tamaaken apalluqluku piiqa nanqigtista Umiilegpigaghmun nanqigtesugnilunga. Umiilegpigaghmun seghlequughyaghtuunghitanka yulgutenka.

²⁰ Enkaam tagsiqlighamsi apeghnaluki tamaakut elpesinun. Liitesugaqallu elpesinun taana ataasiq Israel‑eghmiit neghyukegkaat apalluqluku qiipraghusighngaanga.”

²¹ Kiimsiqaat, “Judea‑ghmiit latatkigataaten whangkunnun. Talwa nalighhiiniita ugpeqaalgutemta taagegken tagiluteng ungipaqigataaten, nalighmeng seghletun akuzitkigataaten.

²² Whangkuta liisugaghput elpenun sameng sumeghtaghaatkaqutangi tamaakut ugpeqilghiit Jesus‑meng, qayughllak liisimakaghput nani alngunak seghlequughaqiit.”

²³ Taagken nakmikegkaat aghneq ataasiq qerngughutfiguluku. Taana aghneq kaasan uglapiglluteng tagilaghaatkat Paul‑em kiyaghfiganun. Unaaghhaaneng unullghanun kenlanga apeghtuqii Ataneghpagullghaneng Kiyaghneghem, liigikestengngwaaghnaqutkegkiillu Jesus‑meng atuqluki Liilightuusii Moses‑em, uuknaliqistetlu igaqegkiit.

²⁴ Ilangita ugpeqegkaat iwernga ilangita ugpequmangilkangat.

²⁵ Enkaam aaghtiiraaghutkat. Nekevuutaqutlu aanleghaannaluteng Paul‑em pikii, “Agleghnalghiik Taghneghak ipa pimalghiik sivuneghpesigun uuknaliqistekun Isaiah‑kun.

²⁶ Whaten pikaaguq, ‘Takuluki ukut yuget whaten piki, Nagasaghngaaghpesi, esghapagngaaghpesi liigiknaanghitusi.

²⁷ Taakut yuget tawatetut qayughllak umyugiit pineghlluugtekaagut enkaam sigutetengllu iyetengllu saapegkaqiit. Tawatenneghisaqumeng esghaannayaghtut, nagaquunnayaghtut, liigiknayaghtut, qiivnayaghtutlu whangamnun naallghutesqelluteng.’”

²⁸ Paul‑em taaqniitkun pikii, “Elpesinun liigikesugaqa, Kiyaghneghem kayagtengngwaaqaqii ungipaghteni ungipiisqelluki yugulilleghmeng Gentile‑enun. Ellngit nagatepestaaghyaghqaagut.”

²⁹ Tawaten Paul piyan Jews‑et aaghtiiraaghuteghllagumaghmeng aanleghaatkat.

³⁰ Maalghuk ayumiqullghek Paul‑em kiyaghfikegkaa mangteghaq llivikaqluku. Upughataqegkangi qamaglluki iteghteni,

³¹ tetugpenanillu ungipaqaq Ataneghpagullghaneng Kiyaghneghem. Apeghtuutkegkaallu Ataneq Jesus Christ‑a. Tawaten pillgha kitum alngunak aghuliighsimangilkanga.