Acts 27 - New Testament-et Akuzipigestun

Paul Aglaaskangat Rome‑emun

¹ Festus‑em Italy‑tesqesugyinkut angyaghpagkun, aglaatestekii Paul‑llu ilangillu anusimingllaghat umiilwaaghmun Julius‑mun. Julius‑enkut pilluwaghtekullghiit aatqelghiit, “Umiilegpigaam Pilluwaghtengi.”

² Taawa angyaghpak Adramyttium‑emeng pi, aghulaqsaqleggiinaaghtekaq nenun Asia‑m esnenganilngughnun. Tawavek uuglluta aghulaqukut. Aristarchus‑em maligtiinkut Thessalonica‑ghmiim. (Thessalonica Macedonia‑melnguq).

³ Unaamingani kaatukut Sidon‑mun. Julius‑em pinitungwaaq pikaa Paul, laalightestaqluku ilakumtaaghanun Sidon‑mi, sameng aklukegkaaneng tuunaqluku pisqelluku.

⁴ Sidon‑meng aghulaqukut anuqa aygumun enkaam igleghtukut uqiinellghakun qiighqam Cyprus‑em.

⁵ Igleghaakut esnengakun Cilicia‑mllu Pamphylia‑mllu, taagken nagneghtukut Myra‑mun Lycia‑melngughmun.

⁶ Tamaanteftuq angyaghpak Alexandria‑meng pi, enkaam Umiilwaaghem Julius‑em liigikluku Italy‑nnaqutanga uugtestiinkut.

⁷ Nunmaasqughhaq igleghtukut qafsinegyagllak aghneq, iwernga piyaqliighngaamta kaatukut Cnidus‑mun. Anuqliitem igleghapagningiitesinkut taagavek, igleghtukut uqiinellghakun qiighqam Crete‑em, naghughlluku Salmone.

⁸ Esnengiighhaakun igleghtukut piyaqliighngaamta, kaatukut kangighamun aatqelghiimun, Uqitaghvik Kangighaq, taana qantaghanlenguq Lasea‑meng.

⁹ Tamaanteghllagtukut qenwat yakughnaghtaa taakluku igleghamun, siingenllu Aghneq naghughlleghhii priest‑et aghqerraaghvigat seghleghqellghitnun Jews‑et. Enkaam Paul‑em kelengasaaghii angyaghpagem umiilwaaghi.

¹⁰ Pikii, “Ukughsi yugni, sumemni whaa elngaatall yakughniighnaqukut igleghallemnni. Iflaaqelteggullu angyaghpagput usituumaan, entaqun talwa tuqulaghaallequkut.”

¹¹ Iwernga Umiilwaaghem Julius‑em nagatkaqegkek angyaghpagemllu umiilga, angyaghpaleklu yuuk avelghaghluku Paul.

¹² Allullutengllu angyaghpagem yugi igleghsukat qayughllak taana kangighaq yakughnalghii angyaghpagmun uksughfiguluni. Kaannaqnaluteng Phoenix‑mun pikat uksughsaghqaaluteng tamaani. Phoenix‑em kangighaa qiighqamelnguq Crete‑mi, northwest‑munllu southwest‑munllu ayuqelghii.

Anuqlilleghllak

¹³ Ikegkemeng anuqataghaaghsan angyaghpagem yugi pikat, “Taanata anuqa utaqakaghput.” Enkaam uyghiita sayugluku telanangaakut Crete‑em esnengiighhaakun.

¹⁴ Iwernga anuqlighllagtuq nakaghyameng enkaam qiighqameng atghaghteghllagaa.

¹⁵ Angyaghpak awatmun tengsagu quutmun taglaghnaqutkesaghluta iilqayugtukut enkaam upuupeng tengtestukut.

¹⁶ Qiighqasqughhaam Cauda‑m uughqanganun lliighusinkut uqiteghraagtukut. Tawani qamuqsaqefut angyaghhaghput piyaqliighutkeghngaamteggu qaakaghput.

¹⁷ Taagken angyaghpak ayugighsaghaat asighlluku tapghaghmeng. Alingluteng qenaaghllughquunnayukameng Syrtis‑mi telanangat ifkaghqughluki tengtestukut.

¹⁸ Unaamingani paninang esla almesiqeghllagyagu, angyaghpagem usingan ilangi meghmun ateghqughiit.

¹⁹ Awakaghaani esla almesiqsagu angyaghpagem sanqutngi ateghqughiit.

²⁰ Qafsinegllak aghneq siqinngunani, ighaleqetaangunani piiq eslam seghleghllagem angtalanganeng. Enkaam talwa iilqayugtukut, isigimaqun tuqulaghaannaqelghiikut.

²¹ Yuget neghegpenateng muluughllagyata Paul‑em nekevluni pikii, “Ukughsi yugni, nagatkaqsaqufsinga kennayanghilnguukut Crete‑meng enkaam aghsaan seghleliighnayanghitusi, saghyangiinnayanghitusi.

²² Iwernga iilqayugpenasi, nalighhiinaghsi tuqunaanghituq iwerngaqun angyaghpagiillequkut.

²³ Unuk Kiyaghneghem yaqulgan takukaqaanga. Taanata Kiyaghneq manigughaqegkegka, ellngan pikaanga.

²⁴ Yaqulgem piinga, ‘Paul, alingegpenang, kaallequten Rome‑emun, nekevellequten sivungakun Umiilegpigaam. Yughaatkegkaqutegpeneng angyaghpagmetelguteten qamaglluki Kiyaghneghem yugulilleqii.’

²⁵ Enkaam quyatek, ugpeqiinga Kiyaghneghqun tawatetngwaaghesqelluku ungipaatellemtun.

²⁶ Iwerngaqun angyaghpagiillequkut qiighqami.”

²⁷ Qula estamat siipneqluku unuk Kelliimi Adriatic‑mi tengtiinkut. Taakwani unugem qukaani yulaaghet piiqut quutmun tughwaaghsugninniluta.

²⁸ Tapghaq uqigkutighluku meghmun ateghsaqmegteggu yuginaq yaagneq uusqaghtutkaftuq. Tazingapighqaaghyamta tapghaq ateghllaataghyaqmegteggu akimigaq yaagneq uusqaghtutkaliimalghii.

²⁹ Yulaaghet alingegkat angyaghpak qalmesinnayukan enkaam estamaneng uyghighaat kingungakun. Taagken yughaghtut aghhragkiighesqelluku.

³⁰ Angyaghpagem yulaaghi anagnaqegkat sivuyaga angyaghpagem uyghiitelighnaqesighwaaghutkelluku, angyaghhaq meghmun ateghtekaat.

³¹ Iwernga Paul‑em pikii umiilwaaqlu pilluwaghtetlu, “Ukut yuget aghulaqegkata kayutepagiillequkut enkaam elpesi tuqulaghaallequsi.”

³² Enkaam pilluwaghtet angyaghhaq keputkaat.

³³ Aghtaghaghnaqaqaallu Paul‑em qamaglluki neghesqughwaaqii, pikii, “Qula estamat siipneqluku aghneq neghelqunghitusi qayughllak elngaatall kelengaruulghiisi.

³⁴ Tamaaken apalluqluku neghesqughwaaghnaqamsi iknaqughtesqellusi. Nalighhiinaghsi tuqunaanghituq talwa aqnighhnaanghituq.”

³⁵ Nepiighyami neqekrangllameng tugulluni igamsiqayugvikluku Kiyaghneq manungitni ikulluni neghegkaq.

³⁶ Yuget ilutughsaghyisteng ellngitlu qamaglluteng neghuutkat.

³⁷ Qerngaghllagemta angyaghpagmelngughni 276‑nguukut.

³⁸ Qamaglluteng neghuunneghmeng apeghiighyameng angyaghpak uqengellinaluku wheat‑a meghmun ateghqughaat.

Angyaghpagiitelleq

³⁹ Aghsagu quutmeng esghaatut, taawanginaq liisuqenghitaat natungutanga. Iwernga kangighalguftuq esnalegmeng enkaam taaggun tamlagnaqsugtut.

⁴⁰ Kepuulluki uyghiitet unitkiit meghmelluki, petugutiiklu aquutak naghighquqiit. Taagken sayugluki telaanangat sivuyagmelnguut tengtestut tespikavek esnamun.

⁴¹ Iwernga angyaghpagem sivuyaga aghqitaghisan kingunga qagighllaget kagimtaat.

⁴² Pilluwaghtet piyaghiit anusimingllaghat tuququghnaluki luuraq quutmun pugimluteng navek anagnayukata.

⁴³ Iwernga umiilwaaghem tuqutesugumangitkaa Paul enkaam iinghutkii. Yeghlegi qelqii pugimaqayuggaat quutmun tagliisqelluki.

⁴⁴ Tamaakut pugimellgilnguut angyaghpagem ikellghaakun tuguluki taglaghnaqesqegkii quutmun. Tawaten qamaglluta yaywaaseng uuglleghaatukut quutmun.