Acts 26 - New Testament-et Akuzipigestun

Paul Mesighalghii Sivungani Umiilgem Agrippa‑m

¹ Agrippa‑m pikaa Paul, “Taawa mesighaghyaghqaaghtuten, saaqsin akuzi.” Paul‑em iiggeni nengugulluki, pikaa,

² “Umiilegmi Agrippa‑mi, aghneghmi whani elngaatall aneghneghtunga sivugpeni mesighaghnaqelghiinga Jews‑et anaggutelqennikangitneng,

³ qayughllak nallukenghitngwaaghaten Jews‑et nangaghneghitlu apalluqutkaqegkangitlu. Enkaam nangllegsipigllunga aaptamken nagataghtesqellunga.

⁴ “Nunamnilnguutlu Jerusalem‑emelnguutlu qamaglluteng Jews‑et liisimakaat kiyaghtaalqa anglinghhaatemneng ima.

⁵ Apeghyugyaqumegteggu liisimakegkaghteng apeghnayaghaatnga iiwleng qaatkutngalghiinga Jews‑et Liilightuusiitnun.

⁶ Whaa Jews‑et tagistaatnga whavek nanqigtesqellunga qayughllak neghyukngukegka Kiyaghneghem unguvaghtilleghqaa tuqukaneng akequsaqegkaa sivunemnnun.

⁷ Taanata akequsaq qula maalghuk siipneqelghiit ramkemta neghyukegkangat allgeghhnaluku, elngaatall maniguutnguluteng Kiyaghneghmun unugtuumaan, aghneghtuumaan. Umiilegmi, iwernga taana ataasiq neghyukilleq apalluqluku Jews‑et nanqigtesugaatnga.

⁸ Sangafsi sumeghtaghaghaqetsi Kiyaghneq unguvaghtipagninginniluku tuqukaneng?

⁹ “Sivunghani agani ugpeqepigtekaqaqa kipullginaalleghllaka elqughutnganiluku aatghaneng Jesus‑em Nazareth‑eghmiim.

¹⁰ Tawaten pikaagunga Jerusalem‑emi. Chief priest‑eneng pilleghqangegkaagunga anusimingllaghtesnaluki ugpeqalghutet. Tuququghnaqngatki itagnaqepigtekaqanka tuqutesqelluki.

¹¹ Uglaghngaan aghyuughtestekaqanka tamaghhiitni synagogue‑nni, whatenllu pisnaqutkegkaqanka, ‘Ugpeqnaniimaaqa Jesus.’ Ugumiyagutepigtekaqanka repall malighqaqaqanka talwa Gentile‑et nunangitnun amyuutkennaluki.

Paul‑em Aapqanga Ugpeqaaghtelleni

¹² “Tamaaken apalluqluku Damascus‑etunga pilleghqalighlunga, qelellelighlunga chief priest‑eneng.

¹³ Umiilegmi, igleghtaaluta aghneq qukaghitaquqlu esghaghaqa nighuk nighugataghalghii siqineghmeng, kuukgullghii qilagmeng pamaken. Elngaatall nighupiglluni kuukgutkaaguq uvitemnun, igleghalgutemnunllu.

¹⁴ Qamaglluta ulleghaatukut nunamun. Taagken ma nagaqughaqa whaten pilghii Hebrew‑ghmiistun, ‘Saul, Saul! Sangama amyuutkesinga? Aqnighquuguten elpeneng amyuutkilleghpegun, tawateghpigaq ox‑em aqnighqullghatun ketngighqulleghmikun yugmi maghyaghquusii.’

¹⁵ Aaptaqa, ‘Kinanguzin Ataneq?’ Atanghem kiimsighaanga, ‘Jesus‑nguunga, amyuutkegken.

¹⁶ Nekevi. Aliighvikamken qayughllak nakmikamken qepghaghtengulutenllu liisimakistengulutenllu. Apeghnaketen tamaakut esghaqaghten aghneghmi whani, tamaakutlu kelgusaghqanka kinguvaqun aliighvikegkumken.

¹⁷ Yuguliiqnaaghamkenllu elpek katam yugpeneng, Gentile‑enengllu. Ellngitnun kayaggnaqngwaamken

¹⁸ esghaghtestesqelluki, tunulluki mamlegmeng qiivesqelluki nighughmun, tunulluki Tughneghaam aghtughyaghqaanghillghaneng qiivesqelluki Kiyaghneghem aghtughyaghqaanghillghanun. Taagken Kiyaghneghem seghevulleqii seghleghqellghitneng, ilalleqiillu tamaavek aaftekaminun ugpeqillghitgun whangamneng.’

Paul‑em Aapqanga Qepghaqani

¹⁹ “Umiilegmi Agrippa‑mi, qaatkegkaqaqa taana esghaghwaalqa qilagmeng.

²⁰ Sivuklunga ungipaqiinga Damascus‑mi taagken Jerusalem‑emi, tamanganillu Judea‑mi. Ungipaqiinga Jews‑enunllu Gentile‑enunllu avuteghqelluki seghleghqennanighluki qiivesqelluki Kiyaghneghmun, pinitunllu pisqanka ipapighqutkesqelluku avuteghqelluteng seghleghqennaniimatangi.

²¹ Tawaten ungipaqilqa apalluqluku Temple‑mi Jews‑et tugulunga tuqunnaqutkegkaqaatnga.

²² Iwernga Kiyaghneghem kayusiitaqaanga whavemun kenlanga, enkaam sivugpesigun nekevlunga aapghaqa Christ‑a pingwaaghllagnunllu ukavantalghiinunllu. Aapqaqa taananguuq ataasiq uuknaliqistetlu Moses‑emllu uuknaliqutkegkaat.

²³ Pikaagut Christ‑a ikfiqepestaaghlleqniluku enkaam sivuliiluni unguvaghyaghqaaniluku tuqulleghmeng. Apeghyaghqaanilukullu nighuga yugulillghem yugnunllu Gentile‑enunllu.”

Festus‑em Nallungughhnikanga Paul

²⁴ Paul mesighaamaluku Festus‑em akilghuughllakaa, “Paul, nallungughtuten! Liitelleghllagpek nallungughtestaaten!”

²⁵ Iwernga Paul‑em pikaa, “Governor Festus‑mi, nallungughtellghitunga, liisimalunga ipameng akuzinguunga.

²⁶ Umiilgem Agrippa‑m liisimakngwaaghaa tamaana enkaam tetugpenaan aleghqughaqa. Liisimakaqa nagaquqaqii qamaglluki tamaakut qayughllak aksaqluku pikaanghitut.

²⁷ Umiilegmi Agrippa‑mi, ugpeqaqsikii uuknaliqistet igaqegkiit? Liisimakamken ugpeqaqaten!”

²⁸ Umiilgem Agrippa‑m aaptekaa Paul, “Sumeghpenii‑i whaa takesqughhaan aleghqughlunga ugpeghtesnaqsingaa Christ‑ameng?”

²⁹ Paul‑em kiimsiqaa, “Takesqughhaaghngaan, nalighmeng taakluku aleghqughyaghngaamken yughaatkengngwaamken Kiyaghneghmun ugpeghesqelluten. Ellnginaghpek yughaatkengngunghitamken, yughaatkengngwaamsi qamagllusi nagallghiini whangamneng aghneghmi whani, whangamtun lliighesqellusi iwerngaqun qiipraghutngunasi!”

³⁰ Taagken Umiilek Agrippa, Governor Festus, Bernice, tamaakutlu ilangi nekevuutkat.

³¹ Aanluteng ellmeggneng aleghquutkat, “Uumun yugmun sameng apalliitukut tuqutusighqameng nalighmeng anusimingllaasighqameng.”

³² Agrippa‑m pikaa Festus, “Aanesnayaghaghput Umiilegpigaghmun nanqigtesqelluni pikaanghisaqan.”