Acts 25 - New Testament-et Akuzipigestun

Paul Nanqigtesulghii Rome‑em Umiilegpigaanun

¹ Festus kaasami Caesarea‑mun igleghutinaluni, pingayut aghneghet atughluki aghulaqegkaq Jerusalem‑emun.

² Tawani chief priest‑etlu, igleghutistengitallu Jews‑et ungipitkaat, Paul seghleliighqiighllakaaniluku Jews‑eneng.

³ Sagiqutkaat Festus‑mun, Paul tagitesqelluku Jerusalem‑emun qayughllak aksaqluku tuqusukaat tumangani.

⁴ Iwernga Festus‑em pikii, “Paul kelengakaqaghput Caesarea‑mi. Qantaghaqun uteghnighyaghqaagunga,

⁵ igleghutistegpesi maliggnakangatnga. Elngaatall tawani sameng anaggusimakan apeghnakangat.”

⁶ Festus Jerusalem‑emetaghaqaq pingayuneng inglulek nalighmeng qula aghneq, taagken Caesarea‑tkaq. Unaamingani nanqigtivigem aqumutagkenkun aqumluni aqfastekaa Paul.

⁷ Tagisatgu, Jerusalem‑eghmiit Jews‑et kanglluqaghlluku anaggutaataghllagumanikaat iwernga ipapighqepagningitkiit anaggutellghi.

⁸ Paul mesighaqaq, “Qaatkiganneghitanka Jews‑et Liilightuusiit, seghletun pingigatunga Temple‑mi, seghletun pimangitaqa Rome‑em Umiilegpigaa.”

⁹ Festus‑em efqughsugluki Jews‑et aaptekaa Paul, “Jerusalem‑emi whangamnun nanqigtesugsiin?”

¹⁰ Paul‑em kiimsiqaa, “Nakaa! Whaa Umiilegpigaam nanqigtivigani nekevghaanga enkaam tamaaken apalluqluku whani nanqigsaghqaagunga. Liisimakngwaaghan Jews‑enun anaggutellghitunga.

¹¹ Anaggusimakuma Rome‑em liilightuusaan pillghani repall tuqusaghqaalunga, anagnaqnaanghitaqa tuqulleq. Iwernga Jews‑et anaggunnillghat temngingukan, kitum alngunak Jews‑enun sastekanganga, taana yuuk qaatkunnaanghituq Rome‑em liilightuusaanun. Rome‑em Umiilegpigaanun nanqigtesugtunga.”

¹² Festus‑enkut agghilgutkullghiit agghinneghmeng taaqsameng Paul‑em piyukellghaneng, Paul pikaa, “Nanqigtesugulghiiten Umiilegpigaghmun, Umiilegpigaghmun aglaghllequten.”

Festus‑em Aapqanga Paul Umiilegmun Agrippa‑mun

¹³ Taam kingungiighhaaneng Umiilek Agrippa kaatkaq Caesarea‑mun kelqelluku nayani Bernice, quyaknaluku Governor Festus.

¹⁴ Tamaansimalukek Festus‑em ungipamsugutkaa Agrippa Paul‑meng. Pikaa, “Governor‑ngughsalghiinga Felix‑em yuuk anusimingllaghvigmetestaqeftaa maani.

¹⁵ Jerusalem‑emellunga chief priest‑etlu, igleghutistengitallu Jews‑et ungipaataatnga Paul‑em anaggutellghaneng. Taagken aaptaatnga whangamnun tuqutestesqelluku,

¹⁶ iwernga kiimsiqaqanka, ‘Whangkuta Rome‑eghmiini kinkut alngunak nanqigtegpenaki tuqusigataput. Liilightuusaput whaten pikaagut, ‘Seghletun pinikaat, sivukluni apeghtesaghqaaguq ipa pimatanga anaggunnistet nagatestekluki. Taagken liigikelleqaghput salleghqaghput.’

¹⁷ Enkaam Paul‑em anaggunnistengi tagilaghaasata aga unaamingani aqumegkaagunga nanqigtivigkun, tagitestekaqaqallu Paul.

¹⁸ Anaggunistengi nekevuulluteng seghletun pillghi apeghyaqmegteki sumeghtaghaatkellemtun seghleghtutkanghiteftut.

¹⁹ Taawanginaghhaq aaghtiiraaghumakangat ugpeqilleghmeggneng, taanallu yuuk aatqelghii Jesus‑meng tuqumaniluku, iwernga Paul‑em sagiqutkaqaa unguvaamaniluku.

²⁰ Liisimakepagunghitutemneng tamaakut, Paul aaptaqa nanqigtesugutanga Jerusalem‑emi.

²¹ Iwernga Paul‑em kiimsighaanga, ‘Nanqigtesugtunga Umiilegpigaghmun. Kelengakestinga kenlanga aglaghtestelleghpenun ellnganun.’ Enkaam anusimingllaghvigmun kanaghtesneqigtaqa kenlanga aglaghtestelleghqamnun Umiilegpigaghmun.”

²² Agrippa‑m pikaa Festus, “Whangallu nagasugaqa Paul.” Pikaa, “Unaami nagalleqan.”

²³ Unaamingani Agrippa‑nkuk Bernice‑enkuk iitqak qerngughutfigllagmun elngaatall aarraghwaaghlutek umiilgem aatkaaneng, maligtestekluki umiilgitlu pilluwaghtet, igleghutistengillu Caesarea‑m. Taagken Festus‑em itghutesqegkaa Paul.

²⁴ Festus‑em pikii, “Umiilegmi Agrippa‑mi, elpesillu qamagllusi whaanlengughni, una yuuk esghaqesi, Paul‑nguuq. Qamaglluteng Jews‑et maanlenguut, Jerusalem‑emelnguutlu qikeghqukegkaqaat whangamkun repall akilghuutkegkaqaat tuqusaghqaaniluku.

²⁵ Iwernga nanqigsaqegka sameng apalliiteftuq tuqusaghqaaluni. Ellmineng nanqigtesukaatanganeng Umiilegpigaghmun aglaghtesnaluku piiqaqa.

²⁶ Iwernga latatgun sameng ipapighqengngalghiimeng apeghyaghqiitunga Umiilegpigaghmun uumeng yugmeng ayuqelghiimeng. Enkaam tagitaqa sivugpesinun, kiyang elpenun Umiilegmi Agrippa‑mi! Neghyukaqa aapqughaaqumteggu sameng latasighqameng naalkefiknayukamkun.

²⁷ Whangamni temnginguuq aglaghtestekumkun anusimingllaghaq Umiilegpigaghmun sameng anaggutelleghmeng apallungunaan.”