Acts 24 - New Testament-et Akuzipigestun

Jews‑et Anaggunnikangat Paul

¹ Tallimat aghneghet atughluki High Priest‑a Ananias, ilangillu siivanlleghet, akuzistekaghqaatlu Tertullus, kaatkat Caesarea‑mun. Nanqigtivigmi Governor‑mun Felix‑mun aapqiit Paul‑em seghletun pillghi.

² Tuqlughyatni Tertullus pikaq, “Angellemni Governor Felix‑mi, elpek apalluqluten nekeggmellelguukut nunamnni qavngarugllaggaaneng. Tamaakutlu kiyaghtellemnni allangughquqaghten pinightut.

³ Salleghpenun tamaghhaanun iqamsiqayugllaguukut.

⁴ Kimaawisnayukamken takestaaghhaaluku akuzinaqunga, iqamsiqayugvikamken nagannaqegkefkut.

⁵ Una yuuk Paul seghleliighqistenguuq. Seghleliighqaqii qamaglluki Jews‑et naansaghngaata. Maghyaghqughtekaat Jesus‑em Nazareth‑eghmiim maligsaaghtengita.

⁶ Talwa sakusiiqnaqegkaqsaghaa Temple‑a, iwernga tugukaqaghput.

⁷ Nanqiggnaqegkaqsaghaghput liillightuusamta pillghatun, taawanginaq pilluwaghtet umiilgita Lysias‑em tagiluni pilluwaghteminun wayaghtestekaqaa whangkunneng. Taagken qelghii avutkistengi elpenun tagisqelluki.

⁸ Governor Felix‑mi, aapqughaaquvgu liigikelleqaten anaggunnilleput ipangutangi.”

⁹ Jews‑et ilatqaghtekat Tertullus‑mun, akuzillghi qamaglluki ipangunikiit.

Paul Mesighalghii

¹⁰ Taagken governor‑em Paul akuzisqegkaa. Enkaam Paul pikaq, “Governor Felix‑mi, quyaanga mesighaghnaqelghiinga elpenun, qayughllak liisimakamken qavngarugllaggaaneng nanqigtistenguuten whangkunnun Jews‑enun.

¹¹ Elpeni liigiksugnaghtuq ipangutanga akugaarugllak Jerusalem‑etelqa maniguunnalunga Kiyaghneghmun.

¹² Anaggunnistema liisimakaatnga aaghtiiraaghumangitaqa kina alngunak, qapraghqiimangitungallu yugneng Temple‑mi, synagogue‑nnillu, talwa nani alngunak Jerusalem‑emi.

¹³ Enkaangam tawaten pimanighngaaghmegtengnga ipapighqennaanghitaat.

¹⁴ Iwernga apeghnaqaqa una elpesinun, manigughaqaqa Kiyaghneghat sivunemta maliglluku Tumanga Jesus‑em. Ukut yuget pikangat temnginguniluku. Iwernga whangallu ellngistun ugpeqanka Moses‑em Liilightuusii, uuknaliqistetlu igaqegkiit.

¹⁵ Anaggunnistemtunllu ugpeqaqa Kiyaghneghem unguvaghtesaghqaqii qamagtengngwaaghluki tuqukat pinighyaghngaata, seghleghuyaghngaata.

¹⁶ Enkaangam quunpeng kiyaghhnaqutkaqunga seghleghyugutkaghqiillunga Kiyaghneghmunllu yugnunllu.

¹⁷ “Qafsinegyak ayumiqulleq atughluku qantaghaqunghhaq uteghnightunga Jerusalem‑emun manilinnaluki aklumalghiit Jews‑elgutenka, aghqerraaghnalungallu Kiyaghneghmun.

¹⁸ Pelungighsaneghmeng apeghiighlunga Temple‑mi aghqerraaghumalunga, ilangita Jews‑et Asia‑meng pit esghaghaatnga. Uvitka paaghqituqlu seghleliighituqlu.

¹⁹ Taakut Jews‑et sangameng taginghitat? Sameng anaggusimakuma ellnginguyaghtut aapghistekaghqanka seghletun pillemneng iwernga aviitut.

²⁰ Yeqay ukut whaanlenguut nagatkaqaatnga mesighaghaqngama Jews‑et agghivigitni, apeghlitgu anaggutelleghmeng naalkefikumakumegtengnga.

²¹ Entaqun ellngitni seghleghuuq whaten piiqngamki, ‘Nanqigtaghpesinga qayughllak ugpeqegkenka tuqukat unguvaghyaghqaaniluki.’”

²² Iwernga Felix‑em, liisimakngwaaghluku kiyaghtaalleq Jesus‑em apeghtuusaa, wintakusitkaa nanqigtegpenaan Paul. Pikaq, “Pilluwaghtet umiilgat Lysias kaaskan agghitkelleqaqa Paul.”

²³ Taagken umiilwaaghmun kayagutkaa Paul kelengakesqelluku, naqam anusimingllaghtesnaniqaa. Ighsakesnaniqiillu ilakumtaaghita sameng taginneghatgu aklukegkaaneng.

Felix‑enkuk Drusilla‑nkuk Nagatkangak Paul

²⁴ Qafsinat aghneghet atughluki Felix‑em Jews‑a nuliini, Drusilla, kelqelluku tagikaq. Tagsiqlighluku Paul, nagatkaak ungipalghii ugpeqilleghmeng Jesus Christ‑akun.

²⁵ Paul‑em akuzitkesaki ukut: pinitun kiyaghtaalleq, nuqenneghtulleq, Kiyaghneghemllu nanqigtilleghqaa tamaghhaanun. Governor Felix‑em alingluni pikaa, “Aanelghaatenꞌngam, alla aqfasleqamken pilleghqangegkuma.”

²⁶ Tawani pilleghmi Felix neghyunguyalghii Paul‑mun manililleqniluni pegtekumigu. Tamaaken apalluqluku tagsiqlighaqegkanga mulutegpenaan aleghquunnalutek.

²⁷ Taagken maalghuk ayumiqullghek atughlukek, Porcius Festus governor‑ngughtekaq. Iwernga Felix‑em efqughsugluki Jews‑et Paul unitkaa paninang qiipraghusighngaluku.