Acts 23 - New Testament-et Akuzipigestun

¹ Paul‑em qiivluki agghistet pikii, “Jew‑lgutemni, aghneghmun whavek kenlanga seghleghyugutangitunga kiyaghtellemni Kiyaghneghmun.”

² Aga High Priest‑em Ananias‑em nekevghalghiinun Paul‑em tungangani qelghutkaa Paul qasaghtesqelluku qaanghakun.

³ Taagken Paul‑em pikaa, “Ipapestaaq Kiyaghneghem aghyuughlleqaaten, uyuq piniiyugneq! Liilightuusatgun nanqigsaghqaqaghpenga iwernga elpek naafqaten Liilightuusat qasaghtestelleghpegun.”

⁴ Paul‑em saaghwanilnguut nekevghalghiit pikaat, “Seghletun aleghqughan Kiyaghneghem high priest‑nga.”

⁵ Paul‑em pikii, “Jew‑lgutemni, liisimaksaqumkun high priest‑ngutanga tawaten pinayanghitaqa, qayughllak liisimaksaghaqa Akuzitngi Igaqegkani whaten pilleq, ‘Igleghutilghiit yugpesineng seghletun akuzitkesaghqaqenghitasi.’”

⁶ Paul‑em liigikluki ilangi Sadducees‑ngutangi, ilangi Pharisees‑ngutangi iglagtuluni pikii, “Jew‑lgutemni, Pharisee‑nguunga, sivunghenkallu Pharisees‑nguut. Whaa nanqiggnaqaghpesinga qayughllak ugpeqegkenka tuqukat unguvaghsaghqaatangi.”

⁷ Paul tawaten piyan Pharisees‑etlu Sadducees‑etlu aaghtiiraaghutkat aga malghughqengnginaamaghmeng pikat.

⁸ (Tawaten pikat qayughllak Pharisees‑et ugpeqngukangit tuqukat unguvaghyaghqaaniluki, yaqulegtuniluku, taghneghaghtunilukullu, naqam Sadducees‑et ugpeqigalkangit tamaakut).

⁹ Qenwat aaghtiiraaghullghiit iglagtughtekat. Ilangita Pharisees‑et apeghtughikayuget Liilightuusaneng mesiighaatkaat Paul whaten, “Sameng seghleghmeng naalkefikneghmeng aghtughaghput, ipa entaqun taghnegham nalighmeng yaqulgem aleghquumaa.”

¹⁰ Wanlegi aaghtiiraaghuteghllagyata repall Paul wayaalluku lliighyatgu, pilluwaghtet umiilgita yakughyagulluku aqnighhnayukatgu pilluwaghteminun aqfasluku awitutesqegkaa agghisteneng. Enkaam aglaatesqegkaa pilluwaghtet mangteghiitnun.

¹¹ Tawani unugmi Atanghem aliighvikluku Paul pikaa, “Ilutuluten, katam tawaten Jerusalem‑emi ungipaqelleghpetun, Rome‑emillu ungipaqelleqaghpenga.”

Jews‑et Tuqunnaqutqegkangat Paul

^12-13 Unaamingani 40‑neng uglalghiit Jews‑et agghilluteng tuqunnaqegkaat Paul. Ellmeggneng akequtkat neghnaanghinnilutengllu, meghnaanghinnilutengllu kenlanga tuqutelleghmeggnun.

¹⁴ Enkaam chief priest‑enunllu siivanlleghnunllu aglaghluteng pikiit, “Ipapestaaq akeqiikut neghnaanghinniluta kenlanga tuqutellemnnun Paul.

¹⁵ Elpesillu agghistetlu aapteggu pilluwaghtet umiilgat taginneqigtesqelluku Paul aapqughaaghwaaghnaqniluku. Enkaam tumemi taakwani whangkuta tuqulleqaghput.”

¹⁶ Iwernga Paul‑em uyghungan nagaqughluki agghillghit ungipaasaghtuqaa Paul pilluwaghtet mangteghiitnun.

¹⁷ Ungipaasatni Paul‑em tuqlughluku umiilwaaq pikaa, “Uum nukalpigaam ungipaasuwaqaa pilluwaghtet umiilgat sameng, aglaataghtigu.”

¹⁸ Umiilwaaghem tuguluku, aglaalluku pilluwaghtet umiilgat pikaa, “Anusimingllagham Paul‑em tagitesqaa elpenun una nukalpigaq, samenguq ungipaasuwaaten.”

¹⁹ Umiilgem tasluqluku iqitulluku ellnginaaghsamek aaptekaa, “Sameng ungipaasugsinga?”

²⁰ Kiimsiqaa, “Jews‑et agghisimaat aapnaluteng Paul aglaataghtesqelluku agghivigmun unaami, aapqughwaghataghaghnaqniluku.

²¹ Ugpeqegpenaki, qayughllak 40‑neng uglaghtut yuget iighluteng tumemi utaqiinaqnilghiit tuqunnaluku. Akeqimaat neghnaanghinnilutengllu, meghnaanghinnilutengllu kenlanga tuqutelleghmeggnun Paul. Apeghiighluteng utaqiigaqut naten pilleghqaghpeneng.”

²² Umiilgem ineghtengngwaaqaa nukalpigaq, “Kina alngunak ungipaategpenaan ungipaasaghtuumanilunga.” Taagken aanestekaa.

Paul Aglaaskangat Governor‑mun Felix‑mun

²³ Taagken pilluwaghtet umiilgita tagsiqlighlukek umiilwaaghek pikakek, “Ungipaasaghtughteki 200 pilluwaghtet, 70 kuunitistet, 200 panastet igleghsaqleggiinaaghllinnguq Caesarea‑mun, ighivgaqun 9‑eklaagmi.

²⁴ Paul‑llu kuunimeng yataaghqunnakesi igleghusighqameng, wataghllak pinitun kaatunnakesi Governor‑mun Felix‑mun.”

²⁵ Taagken governor‑mun latatkegkaa Paul:

²⁶ Ukut latat Claudius Lysias‑meng pinguut Angellemnun Governor‑mun Felix‑mun, quyakamken.

²⁷ Jews‑et tugukaqaat Paul, tuqunnaqaqsaghpetaatlu iwernga liigikluku Rome‑eghmiingutanga pilluwaghtekullghiini aqfaaghput aqnighhnayukatgu.

²⁸ Liigiksugluku Jews‑enun sameng apalluqutanga agghistengitnun aglaataqa.

²⁹ Iwernga liigiksaqegka sameng apalliiteftuq tuqusaghqaaluni, talwa anusimingllaghyaghqaaluni. Taawanginaq Jews‑et qaatkuuneghinniluku Liilightuusameggnun piiqeftaat.

³⁰ Ungipaasatnga Jews‑ennguq tuqunnaqaqaat Paul, tawaninginaq elpenun aglaatestaqa. Taakutlu avutkistengi kayagtanka elpenun apeghyaghtiisqelluku apallaat.

³¹ Enkaam unugmi tawani pilluwaghtet kayagtelleghmegestun aghulaqutkaat Paul kenlanga Antipatris‑mun.

³² Unaamingani ilangi uteghniqat pilluwaghtet mangteghiitnun, taakut kuunitistet nagneghutkaat Paul Caesarea‑mun.

³³ Kaalluteng Paul aglaatkaat governor‑mun, latatlu tuunegkiit.

³⁴ Governor‑em latat atightughluki aaptekaa Paul, “Nalighneghaneng Rome‑em pinguzin?” Paul‑em kiimsiqaa, “Cilicia‑meng”.

³⁵ Governor‑em pilaataqaa, “Avutkisteten kaaskata nanqiglleqamken.” Taagken kelengakistenun kayagutkaa kelengakesqelluku Praetorium‑emi mangteghami Herod‑em ulimastekaani.