Acts 22 - New Testament-et Akuzipigestun

¹ Paul‑em pikii, “Anglegutemnillu siivanlleghnillu nagataghtengnga, liigikesnaqutkaghhnaqamsi saaqutemneng.”

² Jews‑et nagasamegteggu akuzilghii ellmegestun elngaatall qallegnanighwaaghutkat.

³ Taagken pikii, “Jew‑nguunga allgeqaq Tarsus‑mi Cilicia‑melngughmi iwernga maani Jerusalem‑emi anglikaagunga. Gamaliel apeghtughistekluku liitngwaaqaqanka Liilightuusat sivunemta apeghtuusaqegkiit, enkaam tuunegkaagunga Kiyaghneghmun qaatkengngwaaghnaluku katam tawaten elpesistun.

⁴ Elngaatall amyuqetaatkegkaqanka tamaakut qaatkutngalghiit Jesus‑em apeghtuusaanun repall tuqunnaqutkegkaqanka. Yugetlu aghnatlu tugustaqluki anusimingllaghtesquqaqanka.

⁵ High priest‑emllu agghistetlu ipanguninaaghaat apelqa elpesinun. Whangamkun latat tuyughiit Jews‑elgutemnnun Damascus‑melngughnun, latatkumakangatnga ivaghiyaghtuunilunga ugpeqaneng. Naalkegkumki asighqelluki taginnaqnguyaghanka Jerusalem‑emun aghyuughnaluki.

Paul‑em Aapqanga Allangughtelleni

⁶ “Taagken Jerusalem‑emeng Damascus‑mun kaasaghtughaqungallu aghneghem qukaani qilagmeng nighugllak kuukgutqaghtuq whangamnun.

⁷ Uullghaghllunga nunamun nagaqughaqa ma pilghii, ‘Saul, Saul, sangama amyuutkaqsinga?’

⁸ Aaptaqa, ‘Kinanguzin, Ataneq?’ Kiimsighaanga, ‘Jesus‑nguunga Nazareth‑eghmii amyuqetaatkegken.’

⁹ Tamaakut igleghalgutma esghaqaqaat nighuk iwernga aleghqughtema menga nagaquumangitaat.

¹⁰ Enkaam aaptaqa, ‘Ataneq, salanga?’ Atanghem piinga, ‘Nekevluten aglaa Damascus‑mun. Tawani kitum ungipaalleqaaten Kiyaghneghem yataaghqegkaaneng elpenun.’

¹¹ Ayaamalghiinga nighugllagem angtalanganeng enkaam igleghalgutma taslughaatnga Damascus‑mun.

¹² “Kaasamta yugem Ananias‑nguuniiqegkangita esghaghyaghtughaanga. Elngaatall qaatkutngalghii Liilightuusamnnun, Damascus‑eghmiit Jews‑et pinistaghhiinatun akuzitkaqegkangat.

¹³ Takulunga piinga, ‘Anglegutemni Saul, esghasagunneqigten!’ Enkaam tawaninginaq esghaasagullunga esghaghaqa.

¹⁴ Piinga, ‘Kiyaghneghem, sivunemta maniguqiita, nakmikaaten elpenun liigikesqelluku piyukelleni, esghiisqelluku Seghleghqumangilnguq Qepghaghteni, nagatesqelluku aleghquqangaten.

¹⁵ Enkaam ungipaghtekelleqaaten tamanganun esghaatelleghpenengllu nagatelleghpenengllu.

¹⁶ Sameng utaqiigaqsin? Saaqsin paaptaayesten, seghleghqelleghten ughvughtestiki tuqlughilleghpegun Aatghakun Atanghem.’

Atanghem Kayagtekanga Paul Ungipiisqelluku Gentile‑enun

¹⁷ “Taagken Jerusalem‑emun taginqigllunga, Temple‑mi yughaamalunga esghaghwaalleghqun

¹⁸ esghaghaqa Ataneq. Piinga, ‘Aghulaqragkiighi Jerusalem‑emeng qayughllak maani tuguklighnaanghitaat ungipan whangamneng ayuqelghii.’

¹⁹ Kiimsighaqa, ‘Ataneq, Jerusalem‑eghmiit liisimakngwaaghaat synagogue‑nnun piiqlunga tugulaqaqanka ugpelghiit elpeneng, anaguleghtestaqankallu anusimingllaghtestaqankallu.

²⁰ Ungipaghten Stephen tuqutaqngatgu legan itagnaqegkaqaqa, taakut tuqutistengita qaasliit aatkiit aflengakegkaqanka.’

²¹ Atanghem piinga, ‘Aghulaqi, kayaggnaqngwaamken agavek uyavanun Gentile‑enun.’”

²² Tamaakut yulghutet nagatkaat Paul kenlanga Gentile‑enun pinaqnillghanun. Taagken akilghuughllakat, “Tuquteggu! Unguvanguyaghqaanghituq!”

²³ Sakrituteghllagem angtalanganeng akilghuutkelluku qaasliit aatkateng nengugulluki aghulatkiit, sunamengllu quulmun milughmikat.

²⁴ Pilluwaghtet umiilgita esghapagluki pilluwaghteminun itghutesqegkaa Paul pilluwaghtet mangteghiitnun. Kayagutkaallu kagsagmigesqelluku aapghesqelluku sangan yulghuteghllagnun akilghuutkutanga.

²⁵ Iwernga asighqesatni Paul‑em aaptekaa umiilwaaq, “Rome‑em liilightuusiitni itagnaghyaghqaawaa kagsagmikufsigu Rome‑eghmii, talwa nanqigtegpenaan sameng anaggusimatanga?”

²⁶ Paul‑em tawaten piyatni umiilwaaghem umiilegteng takuluku pikaa, “Sanaqsin? Una yuuk Rome‑eghmiinguuq!”

²⁷ Taagken umiilgem takuluku Paul aaptekaa, “Ipa Rome‑eghmiinguziin?” Kiimsiqaa, “Aa‑a.”

²⁸ Pilluwaghtet umiilgita pikaa, “Whanga llivikuteghllaglunga Rome‑eghmiingughtekaagunga.” Paul‑em pikaa, “Whanga Rome‑eghmiingulunga allgeqaagunga.”

²⁹ Taakut aapqughaaghtekaghqaqsaqangi tawaninginaq iqillaghaatkat ellnganeng. Pilluwaghtet umiilgita liigiksamigu Paul Rome‑eghmiingutanga alingegkaq qayughllak asighqestekaqegkanga.

Paul Aglaaskangat Jews‑et Agghistengitnun

³⁰ Pilluwaghtet umiilgita liigikesukaa Jews‑enun sameng apalluqutanga Paul. Enkaam unaamingani qiipraghutngightestekaa. Taagken chief priest‑etlu agghistetlu qerngughutesluki aglaatkaa Paul ellngitnun.