Acts 20 - New Testament-et Akuzipigestun

Paul Macedonia‑munllu Greece‑munllu Pilghii

¹ Taana seghleliilleghllak alpagyan Paul‑em aqfastekii ugpeqat. Kayemluki aghulaqegkaq Macedonia‑mun.

² Enkaam Macedonia‑kun igleghutkelluku laalighqwaaghvikegkii ugpeqat, kayemumiita pikii. Taagken nagneqaq Greece‑mun,

³ tamaantekaq pingayut tanqit. Yataaghqaquqlu angyaghpagkun Syria‑nnaluni, liigikegkii Jews‑enꞌnguq yataaghqaqeftut tuqunnaluku. Tamaaken apalluqluku uteghsukaq Macedonia‑kun Jerusalem‑emun.

⁴ Maligtestekeftii Sopater, ighnegha Pyrrhus‑em, Berea‑ghmii, Aristarchus‑enkuk Secundus‑enkuk Thessalonica‑ghmiik, Gaius Derbe‑ghmii, Tychicus‑enkuk Trophimus‑enkuk Asia‑ghmiik, Timothy‑llu.

⁵ Taakut aghulaqekestaghluteng Troas‑mun, tamaani utaqiigut whangkunneng.

⁶ Kingunganeng Neqenghaghqellghan Yeast‑aliimangilnguum Neqekrangllam, Philippi‑meng angyaghpagkun aghulaqukut. Tallimat aghneghet atughluki kaataput ilaput Troas‑mi. Tamaantukut maaghraghvinlek aghneq.

Paul‑em Kinguliq Laalightellgha Troas‑mun

⁷ Sivulighmi aghneghani santillghem Troas‑eghmiit ugpeqiitlu whangkutallu qerngughutukut neghnaluta Atanghem Neqenghaghqellghaneng. Sivukluni Paul ungipaqikaq unugem qukaanun kenlanga, qayughllak unaami aghulaqsugulghii.

⁸ Qemtamelnguukut kenelghutaghtuqami.

⁹ Nukalpigaq Eutychus, aqumluni qergesem esnengakun nagatkaq. Paul ungipaqimaluku qenwat Eutychus qavaghnikaq. Qenwatlu umuqilluni qavaghyalghiimi eslatmun ifkaqaq pamaken pingayaaneng qemtam. Aanluteng tuguyaqmegteggu tuquluni.

¹⁰ Iwernga Paul‑em ukiragkiighluni segesqughfikluku qetkaa. Pikii, “Alingegpenasi, whaa unguvaamaaq!”

¹¹ Taagken mayughtuulluteng Paul‑em neqekrangllaq aavgughluku neghegkat. Aleghquutkat unulqusiq kenlanga aghtelleghmun, taagken Paul aghulaqegkaq.

¹² Ugpeqat nukalpigaq aglaatkaat nenganun ilutullengeghllagluteng unguvallgha apalluqlluku.

Paul Troas‑meng Miletus‑ellghii

¹³ Angyaghpagkun aghulaqukut Assos‑mun sivungani Paul‑em, qayughllak quutkun Assos‑mun piluni wetku tamaani uuggnaqnilghii angyaghpagmun.

¹⁴ Kaasan Assos‑mun qaakluku angyaghpagmun Mitylene‑etukut.

¹⁵ Unaamingani Mitylene‑meng aghulaqluta aghuliightukut Chios‑em tungangakun. Taagken unaamingani kaatukut Samos‑mun, enkaam awakaghaani kaatukut Miletus‑mun.

¹⁶ Paul‑em naghughsukaa Ephesus qayughllak Asia‑mi kimaawiyunghilnguq. Pilleghqalgukumi Jerusalem‑emun kaasupigtengngulghii angiinnaluni Pentecost‑mun.

Paul‑em Aleghquqangi Ephesus‑em Elder‑ngi

¹⁷ Miletus‑melluni Paul‑em tagsiqliqii ugpeqat Elder‑ngit Ephesus‑melnguut.

¹⁸ Kaasata pikii, “Liisimakaghsi naten kiyaghtaalqa elpesinillunga Asia‑mun kaasuwhaallemneng ima.

¹⁹ Qepghaatkaqaqa Ataneq qusevegtepigllunga, qunituumaghmallu qaywa Jews‑et seghleliighqeghllagngaatngallu, tuqunnaqutkeghngaatngallu.

²⁰ Iwernga liisimakaghsi nuqetusigatanka sangwaat kayutkaghqasi ungipaqinemni, apeghtunemsi yugtuqamillu negpesinillu.

²¹ Qevuulluki qelghaqsaghanka Jews‑etlu Greek‑etlu avuteghqelluki seghleghqennaniqata qiivesqelluki Kiyaghneghmun, ugpeqisqellukillu Atanemnneng Jesus Christ‑ameng.

²² Whaa maaten qaatkullunga Agleghnalghiignun Taghneghagnun Jerusalem‑ennaqunga, nallukaqa sayaghqaqaatnga Jerusalem‑eghmiit.

²³ Iwerngaqun tamaghhiitni nunani takukamni Agleghnalghiim Taghnegham ungipaataqaanga Jerusalem‑emi seghleliighlleqnilungallu anusimingllaghlleqnilungallu yugnun.

²⁴ Iwernga whanga katam unguvalqa waakigataqa apeghiiqaghhnaluku qepghaqaq Atanghem Jesus‑em qelghutkaa whangamnun. Aapghesqegkaqii Pinilghiit Ungipat Kiyaghneghem piniqellghaneng ayuqelghiit.

²⁵ “Liisimakaqa allameng esghaghnaanghitaghpesinga, elpesi ungipiqutkamni Ataneghpagullghaneng Kiyaghneghem.

²⁶ Tamaaken apalluqluku aghneghmi whani ungipaannaqamsi malghuklillngunaan, nalighsi iflakan whanga pilqenghitaqa,

²⁷ qayughllak nuqetusimangitaqa sangwaa tamaghhaan Kiyaghneghem liitesukaa elpesinun.

²⁸ Kiyaghneghem yugi penniighestun ayuqut, enkaam Agleghnalghiim Taghnegham elpesinun aflengakesqii katam tawaten penniighniightem aflengakellghatun penniini. Enkaam kelengangwaaghlusi, Kiyaghneghemllu yugi kelengakngwaaghluki. Aflengakiteki qayughllak Kiyaghneghem tukfiqaqii ellmi katam aawmikun.

²⁹ Liisimakaqa uniskumsi apeghtughistesighwaaghet takulleqiisi. Katam tawatetut ugighsalghiistun amaastun naafqiinaqelghiit penniighmeng, naafqennaqutkelleqiit ugpeqat apeghtughilleghmegteggun.

³⁰ Talwa ilangi ugpeqaalgutesi iqlengiqsaghqaagut ugpeqesqelluki apeghtughilleteng, ugpeghteqeghtekumegteki maligsaaghteknaluki.

³¹ Enkaam kelengangwaaghlusi puughtellengnayukafsi. Neqamikluku pingayut ayumiqullghet kelengasaaqaqamsi qamagllusi tamaaken aghneghtuumaan, unugtuumaan seghleliighllaghngaaghma, qunituumaghma.

³² “Naangniitkennaqaqa, neghyukutamsi Kiyaghneghmun aflengakesqellusi, ungipamunllu piniqellghanun quyastesqellusi. Nagatelleghpesigun taana ungipaq ugpellesi iknaqughllequtlu allgeghlleqaghsillu elpesi piliisaghqaghsi Kiyaghneghmeng. Taana piliisaghqaq tamaakunun pinguuq aaftekaminun ellminun katam yuguluki.

³³ Elpesinitaqngama manigpesinengllu aatkaghpesinengllu qiliighumangitunga.

³⁴ Liisimakaghpesinga sangwaa aklukegkaqa, ilamallu whangamnilnguut aklukegkiit qepghaatkayuwaanka allgeghhnaluki.

³⁵ Sangwaa qamaglluku pikaqaqa elpesinun usputaasqelluku, whangamtun ughleghiilleghpesigun kayusiitesqelluki pipagningilnguut. Neqamikluku Atanghem Jesus‑em whaten pillgha, ‘Quyanaghataghaghtuq tuuniilleq allgeghutelleghmeng.’”

³⁶ Paul tawaten akuzineghmeng taaqsami, segesqughlluni yughalgusiqii.

³⁷ Qamaglluteng qiyamaghmeng Paul qetaqluku naaghaataqaat.

³⁸ Qivghukelleghpigaqegkangat qayughllak pikaqegkangi allamengllu esghaghnaanghinniluteng. Taagken qanikaat angyaghpagmun.