Acts 2 - New Testament-et Akuzipigestun

Kiyaghneghem Kayagtekek Agleghnalghiik Taghneghak

¹ Pentecost‑em aghneghanun Jerusalem‑eghmiit ugpeqat qerngughutkat ataasimi mangteghami.

² Taagken nuuskagllagan anuqeghllagestun sulugllagem qilagmeng pamaken ukigluni imiqaa mangteghaq.

³ Taagken llangaqa ulusugnilnguut kenghhaat allgeqat, esghapakiit ilameggnun nekeghqaallghiit.

⁴ Enkaam Kiyaghneghem imiqii Agleghnalghiigneng Taghneghagneng qamaglluki tawanlenguut. Taghnegham aghtughyaghqaanghilleghmikun akuzistekii nakumiistun.

⁵ Tamaanguq Jerusalem‑emi, Jews‑et Kiyaghneghmun qaatkutngalghiit. Naken nunaneng tagiiqluteng Jerusalem‑eghmiingughquutkat.

⁶ Nagaquusameng sulugllagmeng uplegutkiit ugpeqat qerngughfigitnun. Kaasalghiimeng nakumiistun ugpeqat akuziteghllaguftut repall kukriqutkegkiit.

⁷ Saghiighayagusimiita pikat, “Ukut akuzillghiit Galilee‑ghmiinguut.

⁸ Naten ukut qamaglluta akuzillemtestun akuziit nallukngwaaqameggneng?

⁹ Whaa whaantutut Parthia‑ghmiit, Media‑ghmiit, Elam‑eghmiit, Mesopotamia‑ghmiit, Judea‑ghmiit, Cappadocia‑ghmiit, Pontus‑eghmiit, Asia‑ghmiit,

^10-11 Phrygia‑ghmiit, Pamphylia‑ghmiit, Egypt‑eghmiit, Libya‑ghmiit Cyrene‑em tunganganeng pit, Crete‑eghmiit, Arabia‑ghmiit, whaa whaantutlu Rome‑emeng laalightat Jews‑et, Gentile‑etlu maniguutkayuget Jews‑estun. Nagataput akuzillemtestun ungipaghtut Kiyaghneghem apeghiilleghllaganeng.”

¹² Qamagtengngwaaghluteng saghiighayagutkiitlu kukriqutkegkiitlu ugpeqat, enkaam ellmeggneng aapqughwaaghutkat, “Saaqat ukut?”

¹³ Iwernga ilangita nenglaghyugsaatkumiita pikiit, “Ukut yuget megheghllaguut!”

Peter‑em Aleghquqangi Yuget

¹⁴ Peter‑llu tawanlenguq apostle‑elgutmini. Nekevluni iglagtuluni yuget pikii, “Jew‑lgutemni, nagatngwaaqaghtengnga.

¹⁵ Megheghllagunighngaaghpesikut megheghllagunghitukut nutaanqun 9‑eklaakanga unaanguluku.

¹⁶ Una whaten aneghtelleq Joel‑em uuknaliqutkegkaqaa whaten:

¹⁷ ‘Kiyaghneq pikaaguq, Kingulighni aghneghni Taghneghagka kayagsaghqaqagka tamaghhaanun yugnun. Enkaam ighnesi, panisi uuknaliqsaghqaagut, nukalpigasi esghaghwaaghyaghqaagut, nanevgasi qavangughyaghqaagut.

¹⁸ Talwa qepghaghtemnun yugnunllu aghnanunllu Taghneghagka kayagsaghqaqagka uuknaliqesqelluki.

¹⁹ Yugnun esghaghtesaghqaqanka sangwaat saghiighanalghiit qilagmillu nunamillu: aakwh, keneq, agepsughllak,

²⁰ siqiineq mamlegsaghqaq, tanqiq kavighsaghqaq aawestun. Tamaakut kingungitneng megnunapiglleghhii Atanghem nanqigtivigkaa aghneq piyaghqaaguq.

²¹ Iwernga aghneq taana kaatestegpenaan, kina alngunak seghevutesqelghii Ataneghmun yugulillengyaghqaaguq.’ Tawaten Joel uuknaliqegkaaguq.

²² “Israel‑eghmiini, nagataghtengnga, liisimakegkaghsi Nazareth‑eghmii Jesus, uglapiglluku allaaghlluwhaghtighllagaataqaalghii. Kiyaghneghem tawaten pistekaqaa aghtughyaghqaanghilleghmikun elpesinun liitesqelluku ellminun nakmikegkaqutni.

²³ Kiyaghneghem liisimalleghmikun tuunegkaqaa Jesus elpesinun piyukelleghpesistun pisqelluku. Taagken elpesi qaquuraghtestaghsi tamaakunun waakigalngughnun Kiyaghneghem Liilightuusaanun.

²⁴ Iwernga Kiyaghneghem tuqulleghmeng unguvaghtestekaqaa, itemutkaqaa tuqullghem asighqutellghaneng, talwa tuqullghem nuqneghpagningitkaqaa.

²⁵ David‑em akuzitkegkaqaa Jesus whaten: ‘Esghaghaqaqa Ataneq sivumnilluku quunpeng: unisigataanga, enkaangam seghleghmun qapragtesnaanghitunga.

²⁶ Tamaaken apalluqluku qaamnaka quyaghllaguuq, akuzillghenka quyalleperewaaghmeng ayuqut. Tuquyaghqaaghngaaghma sighimaknaqamken Ataneq,

²⁷ qayughllak uninnaanghitagken unguvasigka tuqumalghiini, talwa Seghleghqumangilnguum yugusii aghusnaanghitan.

²⁸ Apeghtuqaqaghpenga kenlengilngughmeng unguvallengelleghqameng, whangamnisimanginalleghpek quyasteghllawaanga.’”

²⁹ Peter‑em nagneghutkii, “Jew‑lgutemni, whateghlluwaaq apeghyugaqa sivuneghput David. Liisimakaghput tuqukaaguq, lliivghallu naantulanga liisimakaghput.

^30-31 Unguvanguluku Kiyaghneghem akeqegkaqaa, ‘Ipapestaaq kingunghen ataasiq igleghutiyaghqaaguq yugpeneng.’ David‑em uuknaliqistengutmineng liisimakegkaqaa Kiyaghneghem akequsaa. Uuknaliqutkegkaqaa Christ‑a tuqumalghiininnaanghinniluku talwa yugusii aghunaanghinniluku, unguvaqaaniluku tuqulleghmeng.

³² Taananguuq Jesus Kiyaghneghem unguvaghtekaa tuqulleghmeng enkaam whangkuta liisimakistenguukut.

³³ Kiyaghneghem nekegtekaqaa Jesus aghenqigneghmikun, tawaten quulvaqaqaa. Akeqelleghmitun Jesus, tuunegkaqaak Agleghnalghiik Taghneghak ellnganun, enkaam Jesus‑em whangkunnun tuunaak. Tamaakut saghiighanalghiit esghaqesi, nagaskesi Taghnegham aghtughyaghqaanghillghakun pillghuut.

^34-35 “David pikaaguq whaten: ‘Atanghem pii Atanqa, Aqumi aghenqignemkun kenlanga kayaalqestellemnun anguyagten.’ David mayuumangitutmineng qilagmun Jesus‑etun, ellmineng akuzitkengngunghituq, akuzitkengngwaa Jesus.

³⁶ “Ungipaataghllamsi qamagllusi Israel‑eghmiini, Kiyaghneghem ipapestaaq nakmikegkaqaa Jesus Atanghulukullu Christ‑angulukullu. Taananguuq Jesus qaquuraqaghsi!”

³⁷ Yuget nagalluku Peter, seghleghyugllakat enkaam Peter‑llu apostle‑elgutangillu aaptekiit, “Ugpeqaalgutemnni, sanaqesta?”

³⁸ Peter‑em kiimsiqii, “Avuteghqellusi, seghleghqennanighlusi qiivitek Kiyaghneghmun, paaptaayeteklu Aatghakun Jesus Christ‑am, seghleghqellesi seghevutellengesqelluki, enkaam Kiyaghneghem tunusakek Agleghnalghiik Taghneghak allgeghtekek.

³⁹ Ataneq Kiyaghneghput tawaten piyaghqaaguq, qayughllak akequsaqegkaqaak Taghneghagni elpesinun, kinguneghpesinun, kitumunllu alngunak uyavaghpansaghngaan tuqluqaminun.”

⁴⁰ Peter‑em tawatenginaq pigpenaki wata sameng allaaghhiinaghmeng pikii. Kelengasaaqiillu, “Kiyaghneghem aghyuughyaghqaqii seghletun pistet, enkaam ellngistun seghletun pigpenasi luuraq elpesillu aghyuughyaaghiisi.”

⁴¹ Taagken ugpeqilghiit ungipaaneng paaptaayekat. Enkaam tawani aghneghmi 3,000 yuuk ilatkaq ugpeqanun.

Ugpeqat Kiyaghtaallghit

⁴² Ugpeqat iiwleng qerngughutngulghiit liinnaluteng apostle‑eneng. Christ‑akun anglegutkullghiistun kiyaghtaaghet, neghaqelghiit, yughaghaqelghiit qerngaghmeng.

⁴³ Apostle‑et uglaghngaan allaaghlluwhaghtikaalghiit Kiyaghneghem aghtughyaghqaanghillghakun. Enkaam qamaglluni saghiighayukaalghii, tallughyagutkaqegkangatlu Kiyaghneq.

⁴⁴ Ugpeqat qamaglluteng nagneqaalghiit ataasistun, saghyateng atunem atuqluki.

⁴⁵ Akikluki nunatengllu saghyatengllu, allgeghtateng manit tuunaqegkangit sameng aklulghiinun.

⁴⁶ Aghhutanga tamaghhaan qerngughutaqelghiit Temple‑mi. Neghelgutengllaghaqluki ilateng, quyakusiqinaghluki neqeteng upughatusiqaqegkangit.

⁴⁷ Kitumun alngunak piniqnighllaget, usuqumanginaghaqegkangatlu Kiyaghneq. Aghhutanga tamaghhaan Atanghem yugulingukangi yuget, enkaam ugpeqat nulamanginaqat.