Acts 18 - New Testament-et Akuzipigestun

Paul Corinth‑ellghii

¹ Taam kingunganeng Paul Corinth‑etkaq Athens‑meng.

² Tamaani nallaqaa Jew aatgha Aquila, Pontus‑mi allgeqaq. Italy‑meng kaanneghhaaftuk nulighqullghiik Priscilla‑nkuk, qayughllak Umiilegpigaam Claudius‑em eflequqii Jews‑et Rome‑emeng. Paul‑em laalighfiklukek

³ elkegkenitkaq qayughllak qepghaqaak ellngan qepghaqaatun ayuqelghii. Tiintangllallghem akinga kiyaghusiqegkangat.

⁴ Sabbath‑a tamaghhaan Paul synagogue‑mun piluni ungipaghaqelghii Jews‑enunllu, Greek‑enunllu ugpeghesqelluki.

⁵ Silas‑enkuk Timothy‑nkuk kaatkak Macedonia‑meng, taagken kenlekluku Paul ungipaqinginaghluni lliiqaq. Jews‑enun aapqaa Jesus, Christ‑anguniluku.

⁶ Jews‑et kipullginaaghyatnillu seghletunllu akuzitkesatni, aatkami pagulangi ufsugulluki pikii, “Iflakufsi elpesi pilqaghsi, whanga pilqennaanghitaqa. Whaken kenlekluku Gentile‑enun ungipaqinaqunga.”

⁷ Enkaam unilluki Jews‑et Titius Justus‑mun lliiqaq, Gentile‑mun maniguutkayugmun Kiyaghneghmun. Mangteghaa synagogue‑em saaghwanilnguq.

⁸ Synagogue‑em igleghutistenga Crispus‑nguftuq. Qamaglluteng nengllugutkullghiit ugpeqegkaat Ataneq. Corinth‑eghmiilghutetlu nagalluku Paul ugpeghluteng paaptaayekat.

⁹ Taagken unugmi ataasimi Paul esghaghwaalleghqun Atanghem pikaa, “Alingegpenang, yeghlegi ungipaqikestaa iilqayufqaavek

¹⁰ qayughllak elpenitaqunga. Kitumun alngunak aqnightesnaanghitamken, qayughllak neghllagmi whani uglapiglleghhii yuuk whanga pikaqa.”

¹¹ Enkaam Paul tamaani apeghtughikaq Kiyaghneghem akuzitanganeng ataasiq ayumiqulleq alla aghvinlek tanqit ilalluki.

Jews‑et Paul Aglaaskangat Nanqigtivigmun

¹² Gallio, Rome‑em umiilgughtestaqngagu Greece‑mun, Jews‑et qerngughulluteng sughugluku Paul aglaatkaat nanqigtivigmun.

¹³ Kaatulluku pikat, “Uum yugem apeghtughaqii yuget Kiyaghneq manigiisqelluku allanguluku Liilightuusamnneng!”

¹⁴ Iiwenllu Paul akuzinaqaquq, Gallio‑m Jews‑et pikii, “Una yuuk tegleguqaayaqan, yugtaqaayaqan nalighmeng sangwaa alngunak seghlepestaaq pikaqsaqagu ilapgapestaaghnayaghamsi.

¹⁵ Iwernga una yuuk tawaten pimangituq. Aaghtiiraaghutkengngunghitasi Rome‑em liilightuusii, aaghtiiraaghutkengngwaasi elpesi katam Liilightuusasi, akuzitetlu aatghetlu sameng pisiitangi. Tamaaken nanqigtiyaghqaanghitunga, elpesineng piteki.”

¹⁶ Enkaam eflequqii aanesqelluki.

¹⁷ Taagken yuget akuqaghluku synagogue‑em igleghutistenga Sosthenes, qevutiiqaat nanqigtivigem manughaani iwernga Gallio‑m avelghaqiinaqii.

Paul‑em Uteghnillgha Antioch‑mun

¹⁸ Taam kingunganeng Paul paninang ugpeqanitkaq qafsinegllak aghneq Corinth‑mi. Taagken angyaghpagkun aghulaqegkaq Syria‑mun kelqellukek Priscilla‑nkuk Aquila‑nkuk. Kaasameng Cenchrea‑mun Paul qiguqaq liigikesqelluku akequsani Kiyaghneghmun apeghiillgha.

¹⁹ Kaalluteng Ephesus‑mun, tamaani Paul‑em unitkakek Priscilla‑nkuk Aquila‑nkuk, synagogue‑elluni liigikesnaqutkegkaa Jews‑enun Jesus, Christ‑anguniluku.

²⁰ Ellmeggnitaghiisqegkaqsaqangat iwernga pipagningitkaq.

²¹ Enkaam aghulaqnaqngami pikii, “Kiyaghneghem piyukelqegkagu alla tagillequnga.” Taagken Ephesus‑meng angyaghpagkun aghulaqegkaq.

²² Kaalluni Caesarea‑mun nagneqaq Jerusalem‑emun laalighfiknaluki ugpeqat, taagken Antioch‑etkaq.

²³ Tamaantaghlluni aghulaqegkaq. Igleghutkelluku Galatia‑kunllu Phrygia‑kunllu, qamaglluki ugpeqat kayemumiita pikii.

Apollos Ungipaqilghii Ephesus‑millu Corinth‑millu

²⁴ Paul tawaten aneghsimaluku Apollos, Ephesus‑mun kaatkaq. Jew‑ngulghii allgeqaq Alexandria‑mi. Elngaatall akuzillegllaklu liiteghllakaqlu Akuzitneng Igaqegkaneng.

²⁵ Salin Alexandria‑melluku kitum apeghtuqaqegkanga Atanghem tumanganeng. Enkaam sagiqepiglluni akuzitkengngukangallu apeghtuusaqngukangallu elqughaghlluku Jesus, apeghtuusiillu. Naqam liisimakegkanga paaptaayelleq John‑em apeghtuutellghiinaatun ayuqelghii.

²⁶ Ephesus‑mi Apollos synagogue‑elluni tetugpenani ungipaqikaq. Priscilla‑nkuk Aquila‑nkuk nagalluku aqelqangllaqaak liigikestaghaghnaluku Kiyaghneghem tumanganeng, wataqaaghaq elqughaghlluku.

²⁷ Apollos Greece‑mun piyugyan, ugpeqat kayemegkaat enkaam latakat Greece‑eghmiit ugpeqiitnun upughatesqelluku. Taakut Greece‑eghmiit ugpeqegkaqegkangat Jesus Kiyaghneghem kayusillghakun. Apollos‑em kaalluni elngaatall iknaqughsaqaqegkangi ugpellghit apeghtughilleghmikun.

²⁸ Yugtuqami aaghtiiraaghllakii Jews‑et, Akuzitet Igaqegkat ipapighqusiqluki Jesus, Christ‑anguniluku.