Acts 17 - New Testament-et Akuzipigestun

Paul‑enkut Thessalonica‑llghiit

¹ Paul‑enkut igleghtekat Amphipolis‑kunllu, Apollonia‑kunllu Thessalonica‑mun kaatelleghmeggnun kenlanga. Tamaani Jews‑et synagogue‑elget.

² Paul piiqelleghmitun synagogue‑mun pikaq. Pingayuni Sabbath‑eni Paul‑em liigikesnaqutkegkii yuget Christ‑ameng Akuzitetgun Igaqegkatgun.

³ Uuknaliqelleghteggun liigikesnaqutkegkaa ipa Christ‑a tuquyaghqapestaaghunilukullu unguvaghyaghqapestaaghunilukullu tuqulleghmeng. Pikii, “Una Jesus aapqegka elpesinun Christ‑anguuq.”

⁴ Ilangi Jews‑et ugpeghluteng ilatkat Paul‑enkugnun Silas‑enkugnun. Tamaakutlu Greek‑elghutet maniguutkayuget Kiyaghneghmun, aghnalghutetlu pingwaaghet ugpeghtuutkat.

⁵ Taagken ugpeqaanghilnguut Jews‑et aqinaklukek Paul‑enkuk Silas‑enkuk tesqagantaqelghiineng sangigalngughneng yugneng qerngughtiluteng seghleliighqiighllakat. Qenwat qamagtengngwaaghluki Thessalonica‑ghmiit qapraghqegkiit. Taagken ketanqusnaq Jason‑enkunun aglaghluteng iitqaghtaatkat Paul‑enkuk Silas‑enkuk aanunnalukek yulghutnun.

⁶ Iwernga naalkenghisamegtekek, Jason‑llu ilangillu ugpeqat qamughsiiqiit Thessalonica‑m igleghutistengitnun. Akilghuukat, “Paul‑enkuk Silas‑enkuk navek alngunak pineghmegni seghleliighqiigaquk, whaa maanillu tawaten piiquk.

⁷ Caesar‑em liilightuusii kipullegmun piiqiik whaten pilleghmegnegun, ‘Jesus umiilegpigaaguq, Caesar umiilgunghituq.’ Jason‑em ellmeggnitestaqaak Paul‑enkuk Silas‑enkuk.”

⁸ Tawaten piyata yugetlu igleghutistengillu Thessalonica‑m sakraaghllakat.

⁹ Taagken igleghutistet pikiit Jason‑enkut, “Qelghutagput Paul‑enkuk Silas‑enkuk elpesinun aghulaqestesqellukek Thessalonica‑meng, iwernga sivuklusi manilitikut. Aghulaqegkayek manizi veghulleqaghput.” Taagken aglaghtestekiit.

Paul‑enkuk Silas‑enkuk Berea‑llghiik

¹⁰ Mamlegtaghesnaghyagu ugpeqat Paul‑enkuk Silas‑enkuk aghulaqestekagket Berea‑mun. Kaasamek synagogue‑mun pikak.

¹¹ Tamaakut Jews‑ngit nagasukestaghlukek ayuqegkegket Paul‑enkuk Silas‑enkuk, Thessalonica‑melngughneng. Aghhutanga tamaghhaan Jews‑et ellmeggneng liinnaqegkiit Akuzitet Igaqegkat, liigiknaluki Paul‑enkuk Silas‑enkuk apeghtughillghik ipangutangi.

¹² Enkaam uglapiglleghhiit ugpeghtuutkat, uglapiglleghhiitlu pingwaaghet Greek‑et aghniitlu yugitlu ugpeghtuutkat.

¹³ Iwernga Jews‑et Thessalonica‑melnguut nagaqughyamegteggu Paul ungipaqiniluku akuzitanganeng Kiyaghneghem Berea‑mi, Berea‑tkat. Kaalluteng qapraghqiikat yugneng seghleliighqiikat tamaani.

¹⁴ Enkaam ugpeqat Paul esnemun atghaatqaghtestekaat iwernga Silas‑enkuk Timothy‑nkuk Berea‑metkak.

¹⁵ Yuget igleghutilghiit Paul‑meng maligutkat Athens‑mun kenlanga. Uteghnighnaqngata Berea‑mun Paul‑em lipeghsaqakek Silas‑enkuk Timothy‑nkuk takusqelluni piyaghqaaghtaghesnaqayek.

Paul Ungipaqilghii Athens‑mi

¹⁶ Athens‑mi Paul utaqiitkelluku Silas‑enkugneng Timothy‑nkugneng, yuvghiighyalghiimi tamaani seghleghyugllakaq, qayughllak kiyaghnengllaqaghtupigteftuq.

¹⁷ Enkaam Paul‑em synagogue‑mi Jews‑etlu Gentile‑etlu, maniguutkayuget Kiyaghneghmun liigikesnaqutkegkii Jesus, Christ‑anguniluku. Akilpegaghvigmillu aghhutanga tamaghhaan kinkut alngunak tawanneghata aapghaqegkanga Christ‑a.

¹⁸ Ilangita apeghtughistengita Epicurean‑etlu, Stoic‑etlu takuluku Paul aaghtiiraaqaat. Ilangita ilateng aaptekiit, “Una akuzivallughllak sameng piiqa?” Tamaakut ilangita pikaat, “Llangaqa nakumiit kiyaghneghit akuzitkaqii.” Tawaten pikat qayughllak Paul‑em ungipaqngukanga Jesus, unguvallghallu tuqulleghmeng.

¹⁹ Taagken Paul‑mun maligtestekat agghistenun Areopagus‑melngughnun. Enkaam kaasameng pikaat, “Taana nutaghaq apeghtuusaqaqegken liisuwaghput.

²⁰ Sangwaa taana aapqan allaaghlluwhaaguq whangkunni, enkaam liigiksuwaghput sameng pisiitanga.”

²¹ (Sangwaat nutaghat apeghtuusat pinghata Athens‑eghmiitlu, nakumiitlu tamaavek lliiqat apeghyuwaqiitlu nagasugaqiitlu.)

²² Enkaam Areopagus‑mi Paul‑em nekevluni pikii, “Athens‑eghmiini, liigikamsi elngaatall maniguutkayuguftusi elpesi yugni.

²³ Igleghsalghiinga qagani akulmi, esghaghanka manigughvilghutesi, aghqefiklu ataasiq igaqfikngalghii whaten, ‘Nallukegkamun Kiyaghneghmun.’ Taananguuq Kiyaghneq nallukeghngaaghpesigu maniguqaghsi apeghyukegka elpesinun.

²⁴ Taam Kiyaghneghem ulimakaqaa nuna, sangwaallu qamagtengngwaaghluku nunamelnguq. Atanqaa qilagemllu nunamllu enkaam maniguutfingllaqanisigatuq.

²⁵ Taananguuq Kiyaghneq tuunikayuk unguvalleghmeng, aneghneghmeng, samengllu tamaghhaaneng yugnun. Akluksaghqaqenghitaa yuget kayusillghat qayughllak sangwaa tamaghhaan aklukigataa.

²⁶ Kiyaghneghem ulimakaqaa ataasiq yuuk, enkaam taagken ataasimeng allgeqaaguq allaaghhiinaq yuuk nunamelnguq whani. Iingkerugllak yataaghqegkaqiillu qakun yuget allgeghyaghqaatangi, nanillu kiyaghsaghqaatangi.

²⁷ Tawaten pikaqii yugnun iviisqelluni luuraq naalkennayukangatni. Naqamllu nalighhiinamnneng uyavanneghituq

²⁸ qayughllak ‘Ellngakun kiyaghtengnguukutlu, qapraguukutlu, allgeqaagukutlu.’ Talwa ilangi igangllaghtesi whaten pikaalghiit, ‘Ipapestaaq avaqutaqiinkut.’

²⁹ “Kiyaghneghem avaqutaqutanganeng sumeghtaghaatkesaghqaqenghitaghput yuget ulimaaghistun gold‑meng, silver‑meng, nalighmeng uyghagmeng ayuqluki. Yuget sumeghtaghallghistun ayuqenghituq.

³⁰ Sivunghani agani yuget salin nallukluku Kiyaghneq, aghyuughyugumangitii aghyuusaqeghngaata. Iwernga maaten qelghwii qamaglluki yuget naansaghngaata avuteghqelluki, seghleghqennaniisqelluki.

³¹ Kiyaghneghem tawaten qelqaqii qayughllak nekegtekaqaa aghneq nanqigtiviguluku. Nakmikegkamikun yugkun yuuk tamaghhaan tawateghlluwaaq nanqigsaghqaqaa. Liitesnaluku nakmikegkani yuuk unguvaghtestekaqaa tuqulleghmeng.”

³² Nagalluku Paul‑em aapqanga yuuk unguvaghtesimaniluku tuqulleghmeng, ilangita legasiighwaatkegkaat, iwernga ilangita pikaat Paul, “Wataqaaghaq nagasuwaghput alla apeghnaqegkuvgu.”

³³ Taagken Paul‑em unitkii,

³⁴ iwernga ilangita maligsaaghluku Paul ugpeghtuutkat. Ataasiq Dionysius‑nguftuq, Areopagus‑mi agghista, aghnaqlu aatqelghii Damaris‑meng, kinkutlu ilangi ugpeghtuutkat.